گلزمین!من ءَ گوں منی مھروان ءَ ھمبازاں بُہ زور
نبشتہ کار: کمبر اسماعیل
دی بلوچستان پوسٹ
من مدام ھمے جیڑاں جھان ءَ ھر مردم ءِ وتی ڈول ءُ انداز اَنت کئے ءَ چی وڑ چیزاں جیڑ ایت ۔منی واستا جیڑگ ءِ گپ تھنا اِش نہ اِنت کہ کئے چی وڑ ءَ چیزاں جیڑ ایت، چار ایت ءُ پھم ایت۔گپ ایش اِنت،کہ چوں مردم وتی اندر ءِ ھما اھساساں،جزبگاں کئے کَسے ءِ دیم ءَ پدر کُت اِش نہ کنت گڑا آھاں چونین رنگے ءَ دیم ءَ کار ایت۔من بازیں جاھاں دیستگ کَسے شَیرانی اندر ءَ وتی درداں پلگار ایت ءُ کَسّے چار ایت ئِے دیم ءَ رَنگاں زبان دنت۔ھر کَس وتی ھُنراں وتی رھشون کنت کئے آئی ءِ ناسرجمی گپاں دیم ءَ سر بِہ کنت۔
من ءَ یات اِنت،من وھدے کہ وانگ جاہ ءَ وانگ ات اَنت ۔گڑا مدام ھمے جیڑ اِت منی ھما ھُنر کجام اِنت کہ منی رھشونی ءَ کُت بِکنت۔منی گپاں ھما اندر ءِ آس ءَ وت ءَ اَبید منی گُشگ ءَ دیم ءَ بیار ایت ۔ھمے چیز ءِ شوھاز ءَ من دُرستیں کاراں وتی دست مان کُت بلے اِچ نہ دیست۔
من مدام کہ وانگ جاہ ءِ کوٹی ءَ نشتاں بس چم گوں تَاک ءَ سَک ات انت ،دیم پہ دیم ءَ دُور یک مزنیں کوھے درا اَت،آئی ءِ بُرزیں بالاد گوں آزمان ءِ جَمبراں ھبر کَنگ ءَ اَت۔پد ءَ مدام ھمے کُوھاں بَرے یک رنگے ءَ وتی ھیالانی توک ءَ جَاگہ دات۔برے جیڑ اِتگ کوہ کتار اَنت ،یک دومے ءِ انچیں سنگت اَنت کہ تاں زند ءِ گُڈی روچاں یک دُومی ءِ کوپگ گِپتگ ءُ سپر کنگ ءَ اَنت۔اَنچو سما بوت تھنا منی ودار ءَ اُوشاتگ اَنت ءُ گوش ئے من گِیشّگ ءَ نَھاں۔منی زند ءُ وانگ جاھ ءِ کوٹی ءَ ھر چیز کہ بوت ،من بے سما ات انت ،مدام گوں دیم ءِ کَوھاں مان گِشیتگ ات انت۔
اے کُوھاں گوں منی مھر ءِ واستا ھم گیش بُوان اَت کہ ایشاں ھما بچ وتی دلبند ءَ جاگہ داتگ ات انر کہ آ زمین ءِ پھازوک ات انت ۔زمین ءَ وتی سرمَچنڈ ھمے کوھانی امانت کتگ ات اَنت ۔ھمے واستا منی مھر روچ پہ روچ پہ اے کوھاں گیش بوان ات اَنت ۔
منی تلب گیش بوان ات،من زانگ لُوٹَ اتگ ھما دُرست کِسّھاناں کہ زمین ءِ بچاں گوں اے کوھاں درشان کتگ ات اَنت۔ آ کِسہ من ءَ پہ ٹِیکی ات انت۔من پہ کوہ ءُ آھانی کِسّھاں روچ پہ روچ گیش تلوسگ ات اَنت ۔ زمین ءِ تُن گیش بواں ءُ من ءَ تہ ءَ چی وت ءَ چُنڈان ات اَنت ۔ بے تاھیری ءِ جمبرے منی سر ءَ ساہیل ات۔ کم کم ءَ من وتی لبزاں گوں سنگتی بندات کنگ ءَ ات اَنت۔ سنگتی گیش بُوان ءُ من پہ وتی اندر ءِ بے تاھیرے ءَ کِسّہ نبشہ کنگ بندات کُت۔یک ءُ دو کِسّہ کہ سرجم بوت۔ایشاں ھم منی بےتَاھیری کم کُت نَہ کت ۔انگت منی تُن ءِ زپتی نُک ءِ بُن ءَ ھست ات۔ وھد گوزان من پہ وتی ناسرجمیں واھشتاں سپر کناں اتاں۔
بنی آدم مدام پہ واھشتانی پِیلو کنگ ءَ سپر کنت ،وتی شپ روچاں یک کَنت ءُ واھشتان سرجم کَنت۔بازیں واھشت گوں مَکسد ءَ بندوک اَنت ءُ بازینے انسان ءِ جندے زاتی واھگ بنت۔بلے انسان پہ دوئینانی پِیلو کنگ ءَ سَر جَنت۔
منی واھگ ھمش ات من وتی زمین ءِ زییبائی ءَ ایر بَراں بِہ کناں،ھما کوہ کہ مدام منی چمانی دیم ءَ زاھر اتاں آھان گوں ھم کوپگ بہ باں۔آھانی کسھاں پہ منی گوش ئے تلوسگ ءَ آں ۔
روچ پہ روچ کہ منی تلب گیش بواں ات۔گڑا دیر نہ گوست کہ من پہ وتی بانوریں زمین ءَ سرگِپتاں۔نوں گوش ئے منی درست وابانی مانا منی دیم ءَ پَریچاں ات انت۔من وتی بانور ءَ سک نزدیک ءَ چی گندگ ءَ ات اَنت۔منی نُک نوں روچ پہ روچ شِرکن بوان اَت۔
ھمے کوہ کہ من پہ آھانی ھم نیادی ءُ دیوان ءَ اُمری ودار کتگ ات۔نوں شپ روچ گوں آھاں دیوان ءُ وش گپ ات انت۔
ماہھیکانی شپاں من مدام یک مزینیں کوھے ءِ سر ٹُل ءَ نشتاں، گوں ماہ ءِ زیبائی ءَ مان گش ات اتاں۔ماہ ءَ من ءَ مدام منی وابانی ھما مھروان ءِ ترانگ دات اَنت ،کہ آئی ءَ منی ودار ءَ راھسران نِشتگ ات۔منی دُوری ءِ روچاں ھساب کنگ ءَ ات۔
بازیں مدّتے گوستگ ات کہ من وتی مھروان یل کتگ ات ءُ وت ءَ گلزمین ءِ باھوٹ کتگ اَت۔آئی ءِ دیم ءِ رنگ روچ پہ روچ لگشان ات ۔درد، جتائی ،ناسرجمیں واھگ ءُ منی یک دیدارے ءَ گوش ئے چو ھما مات ءَ کتگ ات کہ آئی ءِ نوجوانیں بچ چہ آئی ءِ چمانی دیم ءَ پچ گرگ بوتگ ءُ ملکموت ءِ چَنک ءَ دَیگ بوتگ ات۔
گلزمین ءَ من ءَ ھر ساھت ءَ آئی ءِ مھرانی اھساس دات،جنگ جاہ ءِ سنگر بہ بیت یا تُن ءِ تلب،تِیرانی آواز بہ بیت یا تھار ماھیں شپانی ھاموشی ءَ روچ پہ روچ منی اندر ءَ ایر کپاں ات۔آئی مھر من ءَ گُلاٹگ ات اَنت۔
بلے من وتی مھروان ءَ را گوشگ لُوٹاں اے زند من تھنا زمین ءِ نام ءَ ندر کتگ۔ من تھنا پہ زمین ءَ زندگ بُوھگ لوٹ آں ءُ تھنا ھمائی ءِ ھمبازاں ساہ دیگ لوٹاں ۔بہ گندے اے جھان ءَ منی تئی ھواری دُروگ ءِ مئے مھر دوری ءِ ھرجان اَنت ۔بلے نوں من ترا گوشگ لوٹاں اے دوری ءَ تئی مھر انچو سَر ریتکگاں کہ دمانے ترا مہ جیڑاں گڑا الّم گنوک باں۔من ءَ سِتک اِنت من ءُ تو دگہ جھانے المّ ھوار کپ ایں ۔ اودا من وتی درستیں جِتائی ءُ مھراں گوں ترا درشان کناں ۔اگاں جھان ءِ چَپ راستاں دگہ زندے رس ات گڑا الّم ترا بانور کناں۔ پد ءَ من ءُ تو ھواری ءَ زمین ءِ زیبائی ءَ ایر براں ءُ پھریزان ۔ جنگ جاھ ءِ سنگر ءَ ھوار تِیران ھساب کناں،مھکانی شپاں کوہ ءِ دلبند ءَ نندا گوں ماہ ءَ دیوان کناں۔من ءَ پہ ترا باز ٹیکی گوں زمستانی شپاں آس ءِ دیم ءَ نندیں دُرستیں جنگانی کساھاں کاریں۔ ھما روچاں کہ زمین ءِ مھر منی تئی بدن ءَ چی سَر ریچاں گڑا من ترابانور کناں ءُھوار گلزمین ءَ توار جَن ایً ءُ گوشیں؛
گلزمین!ءُ گلزمین من ءَ گوں منی مھروان ءَ ھوار ھمبازاں بُہ زور ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔