نوشکی ءَ بی ایل اے ءِ اُرش
ٹی بی پی شونگال
سیزدہ اپریل ءِ شپ ءَ چہ نوشکی دمگ ءَ شھر ءَ سئے کلومیٹر دیر سلاہ بندیں مردماں شال – تپتان آر سی ڈی شھدگ ءِ سر ءَ سلطان کنڈگ (بُرزی) ءِ ھند ءَ دگ بستگ ءُ بس ءُ گاڑیانی پَٹ ءُ پول کُتگ ءُ پجار کنگ ءَ پد نُھ مردم بیگواہ کُتگ اَنت، کہ پد ءَ آیانی جون دزکپتگ اَنت۔ بلوچستان ءِ تہ ءَ دو ماھانی نیام ءَ اے چارمی مزنیں وئیل اِنت، چریشی ءَ پیسر مچھ شھر ءَ ترسناکیں اُرشے کنان ءَ بلوچ لبریشن آرمی ءَ شھر داں دو روچ ءَ دستیگ کُتگ بیتگ، گوادر شھر ءَ پورٹ کمپلکس ءُ تربت ءَ پی این ایس صدیق ءِ سر ءَ مجید بریگیڈ ءِ پدائیاں اُرش کُتگ اَنت۔
بلوچ آجوئی دوستیں سلاہ بندیں گلانی شوربندیں اُرشانی تہ ءَ مزنیں کچے ءَ گیشی پیداک اِنت ءُ بلوچستان جاڑیگیں پوجی شوربندی، زرکاری بنجاہ ءُ ھاسیں شھدگ یکشلیں ارشانی آماچ اَنت۔ بلوچ سلاہ بندیں گلاں وتی ارشانی ت ہءَ ترندی ءُ دیمروئی آورتگ ءُ بلوچستان ءِ ھما ھند کہ رکیتگیں پھمگ بیتگ اَنت، ھما دمگانی تہءَ ھم مزنیں اُرش کنگ ءَ اَنت۔ چہ نوشکی ءَ پیسر شال – سندھ ءُ گوادر – کراچی ءِ بنجاھی شھدگانی سر ءَ بلوچ راجی آجوئی سنگر ءُ بی ایل اے ءَ پاکستانی پوج ءُ نیوی ءِ سر ءَ ھمے دروشمیں اُرش کُتگ اَنت۔
پاکستانی پوج ءُ بلوچستان ءِ پرگینگی سرکار ٹاہ دے اَنت کہ بلوچستان ءِ گیشتریں دمگ پوج ءِ دست ءَ اَنت ءُ بلوچستان ءِ اڑوکی سر وزیر سرفراز بگٹی ءَ بلوچ سلاہ بندیں گلانی بگیر ءَ انٹیلیجنس بیسڈ بیڑ ءِ اشارگ داتگ چریشی ءَ پد بازیں دمگانی تہ ءَ پوجی بیڑ برجاہ اَنت بلے سلاہ بندیں گلانی ترندیں ءُ پیچنیں اُرشاں چہ پدر اِنت کہ آ بلوچستان ءُ پاکستان ءِ بنجاھی شھرانی تہ ءَ مزنیں اُرش کنگ ءِ بودیشت ءَ دار اَنت ءُ گمان اِنت کہ دیمتر ءَ ھم ھمے پئیمیں اُرش گوں ترندی ءَ برجاہ مان اَنت۔