بلوچ نبشتہ کارانی نام ءَ نمدی یے
نبشتہ کار : آئیشہ بلوچ
دی بلوچستان پوسٹ
بانُک ءُ واجھیں نبشتہ کاراں دْروت ءُ دْراہ بات اِت، ما اِمیت کہ شما وش ءُ جوڑ اِت۔ مارا باز وشی بوگ ءَ اِنت کہ موبائل ءُ انٹرنیٹ ءِ آسراتی ءَ بلوچ راج ءِ واِنندہ وتی راجی زبان ءَ وانگ ءُ دربرگ ءِ جُھد کنگ ءَ اَنت بلے اے جُھد ءَ بازیں وانِندہ بلوچی دربری(کورس) ءِ دروونتاں نہ وان اَنت چہ ایشی ءَ آ یکشل ءَ رَد نبیس اَنت۔ ردی وَ بنی آدم ءِ دست ءَ بیت ءُ ما دْراہ وتی ردیاں راست کنان ءَ دربرگ ءَ ایں۔ سک بژن اِنت کہ لھتیں بلوچ بلوچی درونتاں نہ وان اَنت، بے درونتانی وانگ ءَ دْراجیں نبشتانکاں رَد نبیس اَنت ءُ پد ءَ گْوش اَنت “منی نبشتانک ءَ راست بہ کن“-
گُڑا ما اِے وڑیں بلوچاں دلبڈی دیگ لوٹ ایں کہ ما شُمئے رَدیاں وَ راست کن ایں، ما پہ شُمئے ھزمت ءَ مُدام ساڑی ءُ تیار ایں۔ چوناھا ما ھم لوٹ ایں کہ شما دْراہ راجی زبان ءِ آشوبی نبشتہ کار بِہ بَہ اِت ءُ بلوچی نبشتانکاں نبیسّان ءَ راج ءَ گلامی ءِ ھلاپ ءَ آگاہ بہ کن اِت۔ بلے شُمئے ھم یک زمہ واری یے ھست، باید اِنت شما ھم چہ وتی رَدیاں دربرگ ءِ جُھد بکن اِت، شما ھم پیسر بلوچی دَرونت ءُ زُبان دوستی نبشتانکاں گوں دلگوش ءَ بہ وان اِت ءُ پد ءَ راجدوستی ءُ ڈیھ دوستی نبشتانکاں نبشتہ بکن اِت۔ وتی ھر ونتگین ءُ دربُرتگیں دَرونت ءَ دیم ءَ ھم بہ وانین اِت کہ چہ وانینگ ءَ ترا وتی ونتگیں مُدام یات ءُ تاجگ بنت۔ چوناھا بلوچی ھم گوں وانینگ ءَ دیمروی کنت۔ کم از کم وتی نبشتکانی نبیسگ ءَ پیسر تھنا ھمے بزان اِت نبشتہ چے ءَ گْوش اَنت؟ ءُ نبشتہ ءِ چُند کاریچ(Process) اَنت؟ وھدیکہ شما اِے چیزاں سرپد بوتگ اِت گُڑا شما راجی زبان ءِ شریں نبشتہ کار بَہ اِت۔
گْوشگ ءِ مول ءُ مُراد ایش اِنت کہ چہ درونتانی وانگ ءَ پد وھدیکہ شما نبشتہ کن اِت گُڑا وتی ھر نبشتگیں گالرِد ءَ یکبرے وت ھم چمشانکے بدے اِت ءُ راست کنگ ءِ جُھد بکن اِت پرچا کہ ردیانی راست کنگ ءَ ما کم کم ءَ بلوچی نبشتہ بلد بَہ ایں۔ البت اگاں نبشتہ ءِ توک ءَ ردی یے ھست گُڑا ما وت راست ئِے کن ایں۔ ما شمئے ھر نبشتانک ءَ یک لبزانکی دروشمے دے ایں چوناھا یک دست ءَ چاپ نہ بیت، داں وھدے کہ تو وت وانگ ءُ دربرگ ءِ جُھد مہ کن ئے گُڑا ھر وھد ءَ دِگہ کَس نہ وانین ایت ءُ کس تئی نبشتانک ءَ راست نہ کنت پمیشکا پیسر ترا وت ءَ وانگ ءُ راست نبیسّگ ءِ جُھد کنگی اِنت۔ پد ءَ ما ھم شُمئے نبشتانکاں، وان ایں، چار ایں ءُ راست اش کن ایں۔ اے وڑ ءَ نہ بیت کہ تو مُدام رَد نبیس ئے ءُ ما تئی رَدیاں راست بہ کن ایں۔ وھدیکہ تئی ردیاں دِگرے راست بہ کنت گُڑا ترا چے پائدگ رس ایت؟ زاناں شُما لوٹ اِت کہ یک آسانیں کارے گِران بہ بیت ءُ ھرکس تکانسر بہ بیت؟
گوں شما دزبندی اِنت کہ پیسر بلوچی درونتاں بہ وان اِت۔ پد ءَ نبشتہ بہ کن اِت ءُ جُنزان بات اِت۔ اِے راجی زبان ءِ جُنز ءَ ما شُمئے ھمگامی ءُ ھمراھداری لوٹ ایں۔ بلوچی شالا دیمروئی بہ کنات ءُ بلوچ راج شالا یکمُشت ءُ یکتوار بہ بات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔