راج ءِ بے سمائیں وانِندہ
نبشتہ کار: آئیشہ بلوچ
دی بلوچستان پوسٹ
بلوچ وانِندھانی مستریں زمہ واری ھمے بہ بیت کہ موبائل، انٹرنیٹ ءُ شوشل ءِ آسراتیاں پہ زبان ءَ کارمَرز بہ کن اَنت۔ بلے ما گِندگ ءَ ایں بدبھتی ءَ بلوچ راج اِے پِڑ ءَ دلگوش نہ کنگ ءَ اِنت پرچا کہ راج ءِ تہ ءَ رھشون نیست کہ راج ءَ سرسوج بہ کنت کہ یک زُبان دوست ءُ راجدوستیں اُستاد، نودربر ءُ وانِندھے ءِ اولی واھشت ھمے بیت کہ پہ وتی زُبان ءِ دیمروی، بلوچ راج ءُ چاگِردی جیڑھانی سر ءَ شائِری کنگ ءُ راجدوستی نبشتانک نبیسّگ، بے سمائیں راج ءِ آگاھی ءُ رھشُونی کنگ ءَ من وتی ند ءَ چِست بہ کنان ءُ بلوچی نبشتہ بہ کن آں۔ من وتی راجی زُبان ءِ سرمچار، جُھدکارے جوڑ بِہ بَہ آں ءُ مُدام بلوچی راجدوستی نبشتانکاں نبیسّ آں یا شائری بِہ کن آں کہ گلامیں راج ءِ تہ ءَ راجدوستی البار بہ بیت۔
البت پہ بلوچی زُبان ءِ یک شریں سرمچار ءُ نبشتہ کارے بوگ ءَ مارا وتی لھتیں نزوری ھم دلگوش کنَگی اَنت۔ اگاں ما بلوچی زُبان ءِ جُھد ءَ ھورت بِہ چار ایں گُڑا ما سرپد بَہ ایں کہ مئے بلوچ وانِندھانی دو مستریں نزوری اَنت۔ وھدے ما وتی ھمے دوئیں نزوریاں دلگوش بَہ ایں گُڑا ما زیت وتی راجی زُبان ءِ وانگ ءُ راست نبیسّگ ءَ وت ھم زبر بَہ ایں ءُ راجی زُبان ءِ شریں نبشتہ کار جوڑ بَہ ایں پرچا کہ بلوچی مئے جِند ءِ ماتی ءُ راجی زُبان اِنت پمیشکا پہ ما بلوچی وانگ ءُ راست نبیسّگ سک آسان اِنت۔ اگاں تو بلوچے ئے ءُ بلوچی ونت کن ئے گُڑا اِے ھم گنج اِنت۔ ترا کس نہ گْوش ایت کہ بْیا ءُ یکپارگی بلوچی نبشتہ بہ کن۔ گِند ئے ما بلوچ داں دوازدہ سال ءَ ھمے پارسی، ھِندی ءُ سندھی ءِ وڑیں زُبانانی دَرونتاں وان ایں بلے پہ وتی جند ءِ بلوچی آسانیں دَرونتانی وانگ ءَ ما وھد نہ کَش ایں کہ مئے بلوچی دربری (کورس) ءِ تہ ءَ تھنا سَے دَرونت اَنت ءُ ھمے سے ئیں دَرونت یکیں روچ ءَ ھم وانگ ءُ ھلاس کنگ بنت۔
گِند ئے اے نزوری ءِ مستریں سبب ایش اِنت کہ ما کَس ءَ دلگوش نہ کن ایں، کَسی پنت ءُ سرسوجاں نہ منّ ایں۔ ما لوٹ ایں کہ مارا ھرکَس دلگوش بہ کنت، تھنا ما گپ کن ایں ءُ شما تھنا مارا دلگوش بَہ اِت۔ ما وت دَرونتاں نہ وان ایں بلے بے سیتیں جُست وَ لازم کن ایں۔ البت ماں وانگجاھاں نودربر پیسر درونتاں وان اَنت، وھدیکہ دَرونت ھلاس بیت پد ءَ درونت ءِ سوال ءُ جُستانی بھر کیت ناں کہ جُستانی بھر چہ درونتاں پیسر وانینگ بنت پمیشکا گْوش اَنت داں وھدیکہ یک نودربرے ءَ دَرونت نہ ونتگ ءُ سرپد بوگ ءِ جُھد ئِے نہ کُتگ گُڑا آئی ءَ جُست ءِ ھم ھچ ھک نیست۔
باید اِنت ما وتی راجی زبان ءِ جھد ءَ دلپْروش مہ بَہ ایں، پروش مہ ور ایں کہ من بلوچی وانگ ءُ نبشتہ نزور آں یا بلوچی نہ ونتگ۔ بلکیں چہ دُرستاں پیسر بلوچی دَرونتاں بِہ وان ایں کہ سرپدی چہ درونتانی وانگ ءَ رس ایت، بلوچی کُمکارگال، تپورگال(ءِ ءُ ءَ)، رنگ گال(یں ءُ ئیں) ءِ وڑیں چیزاں دلگوش بکن ایں ءُ پد ءَ زُبان دوستی ءُ راجدوستی نبشتانکاں بہ وان ایں۔ لبزانکی چیدگ ءُ بھرگاں سرپد بوگ ءِ جُھد بہ کن ایں۔ ھمُک لبزانکی چیدگ ءِ راستیں جاہ ءُ بھرگانی سنج کنگ ءَ بزان ایں۔
دومی مستریں نزوری ایش اِنت کہ ھر وھدے ما نبشتہ کن ایں گُڑا وتی نبشتگیں گالرِداں وت نہ وان ایں، وت آیاں ھچ چمشانکے نہ دے ایں کہ آیانی رَدی راست کنگ بہ بنت۔ ما گوں راج ءِ وانِندھیں مھلوک ءَ دزبندی کن ایں کہ سرپدی چہ وانگ ءَ رس ایت، دُنیا ءِ ھر جاہ ءَ نودربر چہ دَرونت ءُ نبشتانکانی وانگ ءَ زبر بنت پمیشکا اول وتی راجی زُبان ءِ دَرونت ءُ بلوچ راجدوستانی نبشتانکاں بوان اِت کہ باندا شمارا وتی راجی زُبان ءِ سرمچار ءُ جُھدکاریں نبشتہ کار جوڑ بوگی اِنت۔ وھدیکہ نبشتہ کن اِت گُڑا مُدام وتی نبشتگیں چیزاں وت دوبر وت ھم بِہ وان اِت، آیانی رَدیاں وت راست کنگ ءِ جُھد بہ کن اِت۔ چوناھا یک روچے ءِ تہ ءَ پکیر مُلا وَ جوڑ نہ بیت۔ البت اگاں ما وتی اِے دوئیں نزوریاں دلگوش بَہ ایں ءُ اے دوئیں کاراں ھیل کن ایں گُڑا ما زیت وتی راجی زُبان ءِ راست نبیسّی ءَ وت ھم زبر بَہ ایں ءُ وتی راجی زُبان ءِ شریں نبشتہ کار جوڑ بَہ ایں۔ وھدیکہ ما بلوچی راست نبیسّگ ءَ شر ھیل کُتگ گُڑا پد ءَ ما اشتاپی نبیسّگ ءَ ھم رَدی نہ کن ایں۔
بلوچ ءُ بلوچ راجی زُبان بلوچی شالا دیمروی بکنات ءُ بلوچ راج ءِ تہ ءَ زبان دوستی ءُ راجدوستی البار بہ بات۔ شالا انچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔