دره ءِ بولان ءِ شهیداں پہ
سیپ بلوچ
دی بلوچستان پوسٹ
بیا هورکیں نگاهاں گوانگ بجن
چہ دوریں هلکاں پیداکاں
تئی یات دل ءَ پنزان کن انت
زیدانی شلوکیں شنزاں گوں
دردانی گیابیں پداں گوں
شیدا ءُ گنوکیں مهمان انت
بولان ءُ دشت ءِ پاسبان انت
زهیرانی ابیتکیں بیگاه ءِ
جنگجاه ءِ سپاهیگ تنیگاں
اے شهر پتاتگ یک پیم ءَ
آپ کُمب ءَ سر ءَ اوژناگ نہ بنت
شپ باریں کدی واتر ایت کیت
زرمبانی چکاریں آوازاں
گوشانی چڑکہ بئے سازان
آژناگیں تهاری واب کپ ایت
دیدانکے چراگاں شهمینتگ
بولان ءِ دمکاں دیوان انت
استال شپ ءِ واب پیچان انت
گیابان ءَ گوات ءِ شیکوکیں
کوهانی سروزیں آواز ءَ
دیدوکاں مھر ءِ درپشان انت
درداں زیراپیں استان ءِ
آزمان ءُ تیابیں ماهکان ءَ
شیدا ءُ گنوکیں مهمان انت
بولان ءُ مچ ءِ پاسپان اَنت
گژن ءَ گوں جنگ ءِ دیمپان انت
گوں گڈی تیر ءِ دستان ءَ