نمیرانیں زاھر بلوچ ءِ نام ءَ
فیروز بلوچ
دی بلوچستان پوسٹ
تو بیا پد ءَ!
ابیتکیانی موسماں
مساپتانی رولھیں چڑکھاں
مانشاتگ میتگ ءَ منی
پہ بے تواری ءَ
اجب ھسابی ءَ
زرد ءِ آھویں رنج ءُ گم
کسھاں تئی مانش ءِ کاراں گیگ ءُ گَم
اے وش بوئیں مھلباں کہ گوپتگ اَت
بیگھے بدن
تو بیاپد ءَ !
موسمانی سرگوات ءَ
تو بیا پد ءَ!
اے زند ءِ گیدی ئیں اندام ءَ
دوبر ھانی ءِ مھرانی سرمگیں شام ءَ
مینو ءِ گپانی وشوکیں گام ءَ
رپت ئے تو
شیپ گران اَنت ارس ءِ بچکند
تئی گڈی ترانگ چماں بازاریں
واب ءِ اندوہ ءَ
ھرچی مارا ارمانیں
ھرچی زرد ءَ تاوانیں
شال ءِ نازینک مرچی کشکاں تاپائیں
تو بیا پد ءَ!
جُلگھانی آتراپ ءَ
تو بیا پد ءَ !
آھوگ پتو رھچاریں
ماتی نازینک آتاریں
موتکے الھانیں پروم ءِ تڑاں نوکاپیں
ترانگ گرنچ ءَ بوجان انت
رھن انت زمین ءِ دلبند ءَ
زانت ءَ مرچی زانگ دروھینتگ
ھاک ءِ بھشتیں وشبو ءَ
اُمر ءِ بے سِتّیں شاجو ءَ
دیدگ راہ ءِ گباراں مانشانتاں
چماں زبریں واب ءِ ڈکالیں
تو بیا پد ءَ!
اوست ءِ چمّگ تُنیگ اِنت