بلوچستان ءِ جتاجتائیں دمگاں دو مردم بیگواہ کنگ ءُ یک مردم یل کنگ بیتگ

بلوچستان ءِ جتاجتائیں دمگ ھُزدار ، نال ءُ کیچ ءَ دو مردم آوار جنگ بیتگ ءُ یک بیگواھیں مردمے یل کنگ بیتگ-

بلوچستان استان ھُزدار ءَ گوستگیں شپ ءَ پاکستانی پوج ءَ بیڑبرتگ بی ایل اے مجید برگیڈ گوادر اُرش ءِ کماندار شوکت حکیم گنگو ءِ پت آوار جتگ ءُ ناشناسیں جاھے ءَ برتگ-

گیشیں ھالانی رِد ءَ گوستگیں شپ ءَ ھُزدار ءِ دمگ گزگی ءَ پاکستانی پوج ءَ بیڑبرتگ ءُ عبدالحکیم نامیں مردمے آوار جتگ ءُ بیگواہ کتگ- عبدالحکیم گوستگیں روچ ءَ گوادر اُرش ءَ ھوار فدائی شوکت حکیم ءِ پت اِنت-

زانگ بہ بیت گوستگیں روچ ءَ سے نیم نزیک ءَ بلوچ لبریشن آرمی ءِ پدائی بُنز مجید بریگیڈ ءِ ھشت پدائیاں گوادر ءَ پاکستانی چیریں ادارھانی آئی ایس آئی ءُ ایم آئی ءِ ھیڈکوارٹرز سر ءَ اُرش کتگ-

بی ایل اے جارکش رِد ءَ مجید بریگیڈ ءِ ھشت پدائیاں بابر ناصر پنّام سھیل، کامریڈ صوالی پنّام ءِ میرین، مسلم مھر پنّام ءِ سالار، کریم جان پنّام ءِ زوران، شوکت حکیم پنّام ءِ سفر خان، مروان پنّام محراب، خدادوست پنّام ءِ اسد ءُ ریاض الھیٰ پنّام جنگی خان ءَ بھر زرتگ اَت-

بی ایل اے رِد ءَ اے آپریشن کمان شھید فدائی شوکت ءَ کتگ – وھدے کہ گوستگیں ءَ روچ ءَ بی ایل اے نیمگ ءَ فدائیانی پجّار کنگ ءَ پد پاکستانی پوج ءَ لوگ سر ءَ بیڑبرتگ ءُ شوکت حکیم پت زورانسری آوار جتگ ءُ ناشناسیں جاھے ءَ برتگ-

دومی نیمگ ءَ پشمبے ءِ بیگاہ ءِ ساھت چار ءَ ھُزدار ءِ تھسیل نال بازار ءَ دو ویگو گاڑیاں سواریں ناشناسیں مردماں درنیلی ءِ جھمنند امیر احسان آوار جتگ ءُ گوں وت برتگ-

ھمے وڑ ءَ بلوچستان ءِ استان کیچ ءِ دمگ تربت آپسر کولوائی بازار ءَ سیادی داروکیں شعیب لیاقت جھمنند آپسر کولواھی بازار پشمبے ءِ روچ ءَ آجو بیتگ ءُ وتی لوگ ءَ سر بیتگ-

شعیب گوستگیں ءِ سال نُھ اپریل ءَ چہ وتی دکان ءَ چہ پوج ءَ آوار جتگ ءُ بیگواہ کتگ اَت-

زانگ بہ بیت کہ بلوچستان ءَ زورانسری آوار جنیانی نشانگ بیتگیں لھتے مردم یل کنگ بیتگ اَنت دومی نیمگ ءَ پد جتاجتائیں دمگاں دگہ گیش مردم زورانسری آوار جنی ھال سر بیتگ اَنت-

بلوچستان ءَ زورانسری آوار جنی ءِ نشانگ بیتگیں مردمانی یل کنائینگ ھاتر ءَ کارکنوکیں گل وائس فار بلوچ مسنگ پرسنز ءُ بلوچ یکجھتی کمیٹی رِد ءَ ھمکروچ زورانسری آوار جنیانی تہ ءَ گیشی آیگ ءَ اِنت وھدے کہ بازیں بیگواھیں مردم دروگیں میڑاں کُشتگ اَنت-