چیرمین زاھد بلوچ
نبشتہ کار: مھروان کمبر
دی بلوچستان پوسٹ
بلوچستان سرجم ءَ یک کسھے ءُ اے کسہ ءِ ھزاراں سرمتابیں کارست اَنت، اے کسہ ھون مینتگیں وشبوھانی سینگ ءَ سرپتگیں پُلانی کسہ اِنت کہ برے برے آوار جنگ ءُ تھاریں کوٹیاں دور دیگ بیت، برے آئی ءِ ژانگولیں جون جنگل ءُ ویرانگاں گندگ بیت، بلے کسہ ھلاس بوھگ ءِ نام ءَ نہ زانت۔ بس اے کسھے کارست مٹ ءُ سٹ بنت، برے لکمیر جان، برے زاکر جان، برے دین جان ءُ برے چیر مین زاھد ءُ دگہ ھزاراں کارستانی دروشم ءَ برگ ءُ گار ءُ بیگواہ کنگ ءُ سیاہ تھاریں زندان ءِ کوٹیاں بند کنگ بہ اَنت۔
مروچی ھژدہ مارچ اِنت ءُ چیرمین زاھد جان ءِ آوار جنگ ءُ بیگواہ کنگ ءَ دہ سال سرجم اِنت، دُوری ءِ پُریں دہ سال۔۔۔ !! اے دھیں سالانی تہ ءَ باریں چِنچو موسم مٹ بیتگ، چنچو رند ءَ درچکاں وتی تاک چَنڈ اِتگ اَنت، چنچو رند ءَ ھزام اَتکگ ءُ پدی بیتگ، باریں چِنچو تاسپیں بچ پہ وتن کربان بیتگ، بلے چیرمین زاھد جان ءِ آجو بوھگ ءِ ودار ءَ اَنگت ابیتکیں کُڈُک ءِ پیشگاہ، تُنیگیں لُنٹ، ارسیگیں دیدُوک ءُ آئی ءِ لوگ ءِ مردم درست ودار ءَ اَنت۔
نوزدہ سد ءُ ھشتاد ءُ سے ءَ نال ھُزدار ءَ واجہ الھی بکش ءِ لوگ ءَ ودی بیتگیں چیرمین زاھد جان بلوچ وانندہ گَل بزاں بی ایس او ءِ تلو ءَ دوازدہ سال ءَ گیش نودربر سیاست ءَ گوں ھمگرنچ اَت۔ چیرمین زاھد جان دوھزار ھشت ءَ اولی رند ءَ بی ایس او آزاد ءِ بُنجائی جنرل سیکٹری گچین کنگ بوت، دوھزار دوازدہ ءِ کونسل سیشن ءَ مرکزی چیرمین گچین بوگ ءَ رند بلوچ ھان ءِ نام ءَ دیم ءَ اَتک۔
اے ھمے دَور ءُ زمانگ ات کہ گل ءِ گیشتر باسک آوار جنگ ءُ زندان ءَ بند کنگ بیتگ اِت اَنت، یا کہ آیانی ژانگولیں جُون پٹ ءُ میدان ءَ دست کپتگ اِت اَنت۔
بلوچ راج یک اَنچیں زُوراکے ءِ گُلام اِنت کہ آئی ءَ گوں کتاب ءُ کَلم ءَ سک نپرت اِنت. آ چہ راستی ءَ ترس ایت، پمیشکا زاھد جان وڑیں وانندھے زندان ءِ تھاریں کوٹیانی میار اِنت، زاھد جان ءِ میار ھمیش اِنت کہ آئی ءَ انسانیت ءِ گپ جتگ ءُ بلوچ ءُ بلوچستان ءِ درد مار اِتگ ءُ گوں وتی سرڈگار ءَ مھر ئِے بوتگ ءُ کتاب وتی رھشون ءُ ند وتی توار جوڑ ئِے کُتگ، پاکستان چو کُجا وش بیت کہ بلوچ راج ءِ پُسگ بہ وان ایت ءُ وتی راجی بزگی ءَ سرپد بہ بیت۔
چیرمین زاھد جان ءِ ھر پنت ءُ سوج پہ بلوچ راج ءِ ھاتر ءَ بیتگ اَنت، آئی ءَ دُژمن ءِ ھر زُلم ءُ زُوراکیانی ھِلاپ ءَ توار چِست کُتگ ءُ بلوچ نودربراناں اے زانت شکساتگ کہ وت ءَ ندریگ بہ کن اِت بلے چہ وتی لیکہ ءَ گامے ھم پد کنز مہ بہ اِت، چیرمین زاھد ءَ وتی ھمک سرکلانی تہ ءَ کتاب، وانگ ءُ زانگ ءِ گپ جتگ۔۔۔ وتی یک گُلگدارے ءِ تہ ءَ ھمے گُش ایت ”من وتی کارکنوکاں(ورکراں)ھمے کُلو ءَ دیاں کہ بوان اَنت، لبزانک (ادب) ، شھزانتی (فلسفہ)، تبزانتی (نفسیات)، گوستانک (تاریخ) ءَ بوان اَنت گڑا آ زُرمبشت ءَ شریں وڑے ءَ سرپد بوت کن اَنت، آ پچ روہ (مستقل مزاج) بیت کن اَنت، آیانی تہ ءَ کُربانی دیگ ءِ جزبگ گیشتر بوت کن اَنت اگاں آ کتاب ءَ چہ دیر بہ بنت گڑا آ نِزور بنت دمان ءَ پُرش اَنت، آیانی پروشگ ارزانیں کارے بیت،اگاں ماوتی لیکھاں دارگ لوٹیں گڑا کتاب ءَ وتی رھشون بہ کن ایں۔”
یک وھدے ریاستی زوراکی، ترس، وتیگانی لُچی ءُ دگہ بازی، شرگداری ءِ نام ءَ گلانی نِزور کنگ ءُ گلانی رازانی پاشک کنگ ءِ سوب ءَ بازیں باسک دلپروش اِت اَنت ءُ آیاں وتار ءَ چہ وانندہ سیاست ءَ گستا کُتگ اَت، اے زاھد بلوچ ءِ بُراتگیں پندانی سوب اَت کہ بی ایس او آزاد پد ءَ ھما جاہ ءَ سر بوت۔ چُونائی ءَ بلوچستان ءِ تہ ءَ سیاست کنگ پہ زمین ءَ مُدام تنگ کنگ بیتگ، بلے بی ایس او آزاد ءِ سنگت ریاستی زلم ءُ زُوراکی ءِ ھلاپ ءَ ھر وھد مُھکمیں دیوالے ءَ اُوشتاتگ انت۔
اگاں من بُگش آں زاھد جان یک انچیں بے مٹ ءُ بے بھائیں کتابے کہ آئی ءِ ھر تاکے سر ءَ بلوچ راجی زرمبشت ءُ بلوچ وانندہ گل ءِ راہ ءُ راھبند نبشتہ اِنت گڑا من رد نہ باں۔۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔