بلوچ اسٹوڈنٹس ایکشن کمیٹی ءَ شنگ کتگیں درشان ءِ تہ ءَ گْوشتگ کپ بی ایس اے سی لورالائی ھنکین ءِ ھنکینی لس دیوان اڈ دیگ بوتگ۔آسودی بلوچ ھنکینی کارمستر ءُ مھبوب بلوچ ھنکینی کارگشاد گچین کنگ بوتگ اَنت۔
بلوچ اسٹوڈنٹس ایکشن کمیٹی لورالائی ھنکین ءِ ھنکینی لس دیوان ھنکینی آرگنائزر آسودی بلوچ ءِ سروکی ءَ اڈ دیگ بوتگ۔ دیوان ءَ بُنجاہی مزن کارگشاد اظھر بلوچ بستار مھمان ءِ ھاس سانڑی بوتگ۔ دیوان ءَ بُنجاہی سرکیولر، گوستگیں ھنکینی اھوال، ایراد گری، گل ءِ کاربندی، ھندی ءُ میان اُستمانی سیاسی جاورھال ءِ بنگپانی سر ءَ دلجمی ءَ گوں گپ ءُ تران ءَ پد آوکیں کامگیج ءَ ھنکینی آرگنائزنگ باڈی ھلاس کنگ بوتگ ءُ نوکیں ھنکینی کابینہ ٹھینگ بوتگ۔
آئی ءَ گْوشتگ کہ دیوان ءِ کُلیں بُنگپانی سر ءَ دلجمی ءَ گوں گپ ءُ تران ءَ پد آوکیں گامگیج ءَ ھنکینی آرگنائزنگ باڈی ھلاس کنگ بوتگ ءُ نوکیں ھنکینی کابینہ جوڈ کنگ بوتگ۔ نوکیں ھنکینی کابینہ ءَ آسودی بلوچ ھنکینی کارمستر، ابرار بلوچ ھنکینی کمک کارمستر، مھبوب بلوچ ھنکینی کارگشاد، عامر بلوچ ھنکینی کمک کارگشاد ءُ عدنان بلوچ ھنکینی ھالرسانی کارگشاد گچین کنگ بوتگ اَنت۔ بُنجاہی مزن کارگشاد ءَ نوک گچین بوتگ ایں کابینہ سوگند داتگ ءُ نوک گچیں بوتگیں سنگتاں وتی زمہ واریانی سرجم کنگ ءِ پیمان کُتگ۔
آئی ءَ گْوشتگ کہ دیمتر ءَ سنگتاں تران کنان ءَ گوشتگ کہ لورالائی ھنکین ءِ جوڑ بوئگ ءَ کسانیں مدتے بوتگ بلے سنگتانی نرم تبی ءُ کار کنگ ءِ ھب ءِ برورد اِنت کہ اے کسانیں مدت ءِ تہ ءَ ساک ءَ وتی اسٹرکچر لورالائی ءِ تہ ءَ مھکم کُرتگ ءُ مزنیں کچے ءَ بلوچ نودربر مرچی بساک ءِ بھر اِنت۔
آئی ءَ گْوشتگ کہ لورالائی ھما جاہ اِنت کہ اد ءَ بازیں وانگی ادارہ ھست اَنت ءُ بلوچ نودربر مزنیں کچے ءَ اے ادارھاں وانگ ءَ اَنت بلے مھکم ایں نودربر گل نہ بوگ ءِ سوب ءَ گیشتر نودربر چہ بلوچ سیاست ءَ زبھر بوتگ اَنت۔ ایشی ءَ ابید لورالائی ءَ بلوچ لس مھلوک ھاس کوہ سلیمانءِ دمگانی مزنیں کچے ءَ مردم جھمننِد اَنت۔ لورالائی وڑیں جاھے ءَ گل ءِ فعال بوگ ءُ بلوچ نودربرانی ھوار بوگ گل ءِ سوبمندی اِنت۔ گل لورالائی تہ ءَ وانوک ایں بلوچ نودربرانی سیاسی، زانشتی، ءُ پِگری ھیلکاری ءِ واستا وتی سرجمیں وس ءُ واک ءَ کارمرز کنت۔ امیت اِنت کہ بلوچ نودربر اے کاروان ءِ بھر بنت ءُ یک سیاسی ءُ زانشتی چاگردے ءِ جوڈ کنگ ءِ جھد کن اَنت۔
آئی ءَ گْوشتگ کہ دیوان ءَ سنگتاں گپ ءُ تران کنان ءَ گوشتگ کہ بلوچ سیاست ءِ اولی بُنشت نودربر سیاست اِنت۔ بلوچ ءِ ھمک نودربر وت ءَ را گوں نودربر سیاست ءَ ھمگرنچ بہ کنت پرچاکہ بلوچ چاگرد انچیں جاورھالانی تھ ءَ سپر کنگ اِنت کہ اے جاورھالانی دیمپان بوگ ءِ واستا مھکم ایں ءُ زرنگیں ورنا راج ءِ زرورت اَنت۔ وھدیکہ بلوچ نودربر مھکم ایں دروشم ءَ سیاسی ادارھانی بھر بنت ءُ نودربر سیاست ءَ گوں وتار ءَ ھمگرنچ کن اَنت گُڑا بلوچ چاگرد ءِ واستا سیاسی کیڈرز پیداک بنت ءُ دیمتر ءَ ھمے ورنا بلوچ راجی جُنز ءِ واستا وتی سرجمیں بودشتاں کارمرز کن اَنت۔ مرچی بساک بلوچستان ءِ مستریں نودبر گل ءِ بستار ءَ زمین ءِ کُنڈ کُنڈاں بلوچ نودربرانی واستا یک مھکمیں سیاسی پتریے ءِ دروشم ءَ جھد کنگ اِنت ءُ نودربرانی سیاسی باسمائی ءِ واستا وتی سرجمیں تاکت ءَ دیگ اِنت گُڑا بلوچ نودربرانی سر ءَ ھم پرز بیت کہ آ وت ءَ چہ زاتی سیت ءُ پائیدگاں بہ کشّ اَنت ءُ بساک ءِ پتر ءَ گوں ھمگرنچ بہ بنت ءُ سرجم ءَ نودربر سیاست ءِ بھر جوڑ بہ بنت۔