زاھد بلوچ ءُ اسد ءِ زورانسری بیگواھی ءِ دہ سال
ٹی بی پی شونگال
بلوچ اسٹوڈنٹس آرگنائزیشن آزاد ءِ سرکماش زاھد بلوچ ءُ کَستر کمک کارگشُاد اسد بلوچ ءِ زورانسری بیگواھی ءَ دہ سال سرجم بیتگ اَنت، آ ھژدہ مارچ دو ھزار ءُ چاردہ ءَ چہ شال ءِ سیٹلائٹ ٹاون ءَ بانک کریمہ بلوچ ءِ دیم ءَ پاکستانی پوج ءَ زورانسری بیگواھی ءِ نشانگ کُتگ اَت اَنت، یک دھکے ءِ گوزگ ءَ پد ھم آ یل کنگ نہ بوتگ اَنت۔
بلوچ اسٹوڈنٹس آرگنائزیشن ءَ زاھد بلوچ ءِ یل کنائنگ ءِ ھاتر ءَ داں مرگ شُد ھڑتال ءِ راہ گچین کُتگ اَت ءُ لتیپ جوھر داں چِل ءُ شش روچاں داں مرگ زھرشانی کنگ ءَ بیتگ، اولی بر ءَ بلوچستان ءِ سروزیر ڈاکٹر مالک ءَ زھرشانی بنجل ءِ تَر ءُ تاب کُتگ، کہ اود ءَ آئی ءَ زورانسری بیگواھیاں بلوچستان ءِ پُرارزشتیں جیڑہ نامینتگ، چریشی ءَ پد زورانسری بیگواھی ءِ سنگینیں جنجال ءِ سر ءَ پارلیمانی پاٹیاں وتی راجکاری ءِ بھر کُتگ بلے سرکارانی رند پہ رندی دلسدکیاں پد ھم اے جیڑہ کدی ھم گیش ءُ گیوار نہ بوتگ۔
دہ سال زھرشانیانی تہ ءَ گوست اَنت بلے زورانسری بیگواھی ءِ جیڑہ ھما پئیم ءَ برجاہ اِنت ءُ بلوچستان ءَ چُشیں یک روچے نہ گوز ایت کہ زورانسری بیگواھیانی بگیری ءَ زھرشانی بوگ ءَ مہ بیت، سرگودھا شھدربرجاہ ءِ نودربر خدا داد گنج ءِ ھاتر ءَ بلوچ نودربر پنجاب ءَ زھرشانی کنگ ءَ اَنت، پسنی ءَ عبدرزاق ءِ کھول ءَ تیاب دپی شھدگ بند کُتگ ءُ آئی ءِ یل کنائنگ ءِ ھاتر ءَ توار چست کنگ ءَ اَنت ءُ کیچ ءِ دمگ ءَ زورانسری بیگواھیانی بگیری ءَ ھوشاب، تجابان ءُ آبسر ءَ زھرشانی کنان ءَ سی پیک شھدگ ءُ دگ بند کنگ بیتگ اَنت۔
راجکاریں پاٹی ءُ نودربر گلانی رھشون ءُ باسکانی زورانسری بیگواھیاں گوں راجکاریں زرمبشت ءِ ھلاس کنگ اگاں دارگ باوری نہ اِنت ءُ بلوچستان اگاں زورانسری بیگواھیانی درچ ھلاس نہ بیتگ گُڑا زھرشانی زرمبشتانی یکشلی ھمے پئیم ءَ برجاہ بیت اِنت۔