نازانی پروم
شوکت اَبرار
دی بلوچستان پوسٹ
نازانی پروم بے نوُر اِنت
پَنجگُور سرجم ءَ بے شھم اِنت
انگور گوارگو ءِ گیمُرتاں
رنگاں یل کُت اَنت موُزاتی
سبزو پونوکیں چَل بُوتاں
شیرّگ بُوت اَنت چو زکوُر ءَ
جوان سُھر کھربا بے تام اَنت
کوش ءَ کولواہ یل داتہ
آپاں زُمزمیں کَلرّ بست
گیمُرتاں کھیر زوُمدان ءِ
نالاں بُوت آواران سرجم
نال ءِ زردَلوُ بے رنگ اَنت
گُلوُنٹیں انار ھُشک بُوتاں
دریا گْوادر ءِ مدھوش اِنت
دشت ءِ کوٹگ اَں تام یل دات
مند ءَ فاضُل ءِ پِریات کُت
تُمپ ءَ بانڑی ءَ زار جَت
تاک رِتک اَنت چِنال ءَ کیچ ءِ
سورآپ ھُشک بُوت گوں گّورم ءَ
بَھِشتیں زامُران بے چاڑ بُوت
مشکے گوں نلاں سر جھل کُت
گِریشگ سارتی ءَ یل داتہ
خُضدار وت سرا ھیران بُوت
رنگاناں شموشت سوُراب ءَ
مستونگ ءُ کلات ءَ گِریتہ
شال ءَ براہ وتی اندیم کُت
بیلہ جلوھاں بے ھال اِنت
گار کُت اوتھل ءَ پجّار ءِ
وِندر ھوناں گوں ھم رنگ اِنت
آھِرّ اِنت بلوچِستان سرجم
کوھاں سرجم ءَ پُرس داشتہ
ورنا شش بَروت نوکشنزیں
مستیں ملکموُت بے رحم ءَ
یکجاہ تُرکِت اَنت بے وھدا
ٹِلَگ کَشِّت اَنت ماتانی
براتاناں سِرین پُروش کُرتَنت
ارمان گار کُت اَنت پِسّانی
گار بُوتاں گُھارُک ماھیں
ارساں شوکت مئے رِد بستہ
پُرسیگ اِنت پروم بے بھتیں
موتک ءَ اِنت بلوچ ءِ ھنکین
موتک ءَ اِنت بلوچِستان سرجم