روکپتی بلوچستان ءَ پاکستان ءِ ارشاں سیاسی باسک دوستا محمود ءَ ھوار دھ جنین ءُ زھگ نمیران بیتگ انت – بی این ایم

بلوچ نیشنل مومنٹ ( بی این ایم )  ءِ بنجاھی جارکش ءَ  رسانکدراں وتی شنگ کرتگیں درشانے ءِ تہ ءَ گوشتگ کہ پنچ شمبے ءِ روچ ءَ روکپتی بلوچستان ءَ پاکستانی موشکانی نشانگ چہ رودرکتی بلوچستان ءَ لڈ اتگ ءُ شتگیں بلوچ بیتگ اَنت – اے ارشاں جنین ءُ زھگاں ھوار دہ باھوٹی نمیران بیتگ انت –

جارکش ءَ وتی درشان ءِ تہ ءَ گوشتگ کہ پاکستان ءِ اُرش ءَ بی این ایم ءِ راجمان پتر ءِ باسک دوستا محمود ھم ھوار اِنت – بی این ایم نمیرانیں چیئرمین دوستا ءُ دگہ نمیران بوتگیں سراں ستک شانی نْدر کنت – چیئرمین دوستا ءِ پہ زْرمبشت ءُ گل ءَ دیمونی مدام یات کنگ بہ اَنت ءُ آ مدامی مئے یاتاں زندگ مان ایت –

بی این ایم ءِ جارکش ءَ گْوشتگ کہ دوستا محمود، رودرتکی بلوچستان ءِ ھند پروم ءِ جاہ منند بوتگ، چہ پاکستانی پوج ءِ  ھمک روچگیں زوراکیاں دلسیاہ بیتگ ءُ گوں وتی کھول ءَ چہ پروم ءَ لھتیں کلومیٹر دور ایران ءِ بست ءُ بند ءِ تہ ءِ  روکپتی بلوچستان ءَ ’ شمسر ( ھک آباد) ‘ نامیں میتگے ءَ وتی نزیکیں سیادانی کِر ءَ لڈ اتگ ءُ شتگ  لھتے سال اِنت کہ ھمود ءَ انت – پنچ شمبے ءِ روچ ءَ پاکستانی پوج ءَ  ارش کرتگ ءُ بی این ایم ءِ کلانھیں باسک چئیرمین دوستا گوں وتی سجھیں کھول ءَ کشتگ –

آئی ءَ گْوشتگ کہ اے بلوچ راج ءِ سر ءَ پاکستان ءِ زوراکیانی بدتریں درورے۔ پاکستان ءَ میتگانی سر ءَ ھپت موشک آس داتگ کہ جتائیں ٹکاں کپتگ اَنت ءُ مزنیں کچے ءَ تباھی بیتگ – اے ارش ءِ آسر ءَ دہ  بے میاریں مردم کشگ بیتگ کہ آ چہ پاکستانی پوج ءِ زوراکیاں پہ وتی جان ءِ پھریز ءَ روکپتی بلوچستان ءَ  شتگ اَنت کہ آیانی تہ ءَ جنین ءُ زھگ ھم ھوار اَنت۔ نمیران بیتگیں مردمانی تہ ءَ  دوست محمد ء محمود ( چیئرمین دوستا) آئی  ءِ لوگ بانک شازیہ، آئی ءِ  کسانیں سالیں زھگ : بابر دوست، ھانی دوست، چراگ دوست ءُ چہ پنجگور ءَ لڈ ءُ بار کرتگیں  نمیرانیں یونس ءِ کھول مات نجمہ، کودکیں ماھکان ءُ ماہ زیب ھوار اَنت –

بی این ایم ءِ جارکش ءَ گْوشتگ ، جنین ءُ زھگانی نمیران کنگ ءَ پد پاکستانی سرکار ءُ رسانکدر ھمے دروگ ءَ بندگ ءَ اَنت کہ پاکستانی پوج ءَ ’ ایران ءِ پنجگور ارش‘ ءِ ترندیں پسو داتگ ءُ سرمچارانی بندر تباہ کرتگ اَنت، بلے راستی ءَ پاکستان ءَ  میتگ نشانگ کرتگ اَنت۔  نمیرانیں جنین ءُ زھگانی تامر ءُ اکس اے گپ ءِ گواہ  اَنت۔ چئیرمین دوستا کہ آئی ءَ پاکستان اے ارش ءِ  مستریں نشانگ گْوشگ ءَ اِنت دست ءُ گوشیں سیاسی باسک ءں بوتگ کہ آ ماں چاگردی رسانکدر ءَ گوں وتی راستیں پجار ءَ نبشتہ کنگ ءَ بوتگ اگاں آ سلاہ بندیں گلے ءِ کماندار بوتیں گڑا گوں وتی پجار ءَ چاگردی رسانکدر ءَ سھرا نہ بیتگ اَت –

آئی ءَ گْوشتگ کہ اے ارش چہ وتی ترندی ءُ مزنیں کچے ءَ جنین ءُ زھگانی بیرانی ءِ  رد ءَ الم ءَ بنداتی ویلے، بلے چہ ایشی ءَ پیش ھم بلوچ باھوٹی ھمساھگیں ڈیھ  اوگانستان ءُ ایران  ءِ پجیگ ءَ جھان ءِ آدگہ ڈیھانی تہ ءَ ھم پاکستان ءِ چیریں تْرامگیجانی کارمنداں کشتگ اَنت۔ بلوچ نیشنل مومنٹ ( بی این ایم ) یکشل ءَ گوں میان استمان ءَ لوٹ کنگ ءَ اِنت کہ روکپتی بلوچستان ءَ شتگیں مردماں میان استمان ءِ پارست ءَ باھوٹی بہ لیک ایت ءُ پہ آیانی زندمان ءِ پھریزگ  ءَ گامگیج بہ زیر ایت۔

جارکش ءَ گْوشتگ ،  پاکستان ءِ ارش ءِ سر ءَ بے  تْرک ءُ سُک نک بیگ  ءِ جاہ ءَ پاکستان ءِ اے ناشریں کارروائی ءِ سر ءَ آ چہ میان استمان ءِ نیمگ ءَ جست کنگ بہ بیت – اے گپ  رد کنگ نہ بیت کہ  آئی ءَ پہ زانت میتگانی سر ءَ ارش کرتگ ءُ  ھما مردم نشانگ کرتگ اَنت کہ آیاں گوں سلاہ بندیں جھد ءَ ھچ وڑیں ھمگرنچی نہ بیتگ – اے ارشاں سیاسی باسکے ءَ ھوار جنین ءُ زھگ نمیران کنگ بیتگ اَنت ءُ آیانی کوش ءِ زمہ واری پاکستان ءَ گوں پھری من اتگ –

جارکش ءَ گڈسر ءَ وتی درشانے تہ ءَ گوشتگ کہ چہ پاکستان ءِ زوراکیاں سداں پارٹی ءِ باسکانی پجیگ ءَ  بلوچ پہ وتی جان ءِ پھریزگ  ءَ چہ وتی بیھی ھنکیناں لڈ اتگ ءُ  روکپتی بلوچستان، اوگانستان، مزن ھور، یورپ، امریکا ءُ سرجمیں جھان ءَ جاہ منند اَنت – بلے میان استمانی تْرامگیجاں دنیگت ءَ بلوچ ’ باھوٹی‘ بستار ءَ نہ من اتگ اَنت پمیشکا بلوچ  باھوٹ ءِ بستار ءَ وتی نامانی نبشتہ کنائینگ ءَ دلسیاہ اَنت ءُ چہ میان استمان ءِ نیمگ ءَ باھوٹی اگبالاں زبھر اَنت –