اسلام آباد ءِ ننداک ءُ پنجاپ ءِ روشت – کماش بلوچ

نبشتانک: اسلام آباد ءِ ننداک ءُ پنجاپ ءِ روشت

نبشتہ کار: کماش بلوچ 

دی بلوچستان پوسٹ

انچوشکہ شُما سرپد اِت مرچی ھشتمی روچ اِنت اسلام آباد نیشنل پریس کلب ءِ دیم ءَ بلوچ گار ءُ بیگواھیں مردمانی کھول نندانکے ءِ دروشم ءَ نندوک انت ءُ پہ وتی مردمانی پَد جنگ ءَ چہ بلوچستان ءَ سرجنان پہ واری ءُ بزگی ماں اسلام آباد ءَ اتکگ انت. اے نندانک ماں پاکستان ءِ مزن شھر اسلام آباد ءَ بلوچانی اولی نندانک نہ انت ایشی ءَ ساری ءَ ھم سمی دین جان ءَ گوں آ دگہ بیگواھیں مردمانی کھولاں ھوار ڈی چار راہ بند کتگ بیتگ ءُ زھرشانی کتگ.بیگواھیں مردمانی کھول پہ ھمے اوست ءَ نشتگ انت کہ میان استمانی رسانکدر،دری ملکانی سفیر،پاکستان ءِ نام نھادیں جرنلسٹ ءُ وزیرانی گوشاں بلکیں مٸے چیھانٹ ءُ ھیسکارگ بہ کپ انت ءُ بلوچ ءُ بلوچستان ءِ درد ءَ بمار انت ھمے ھاترا آھانی نندانک برجا انت-

 پاکستان ءِ مزن شھر اسلام آباد ءَ احتجاج ریکارڈ کنگ پاکستان ءَ ھمے باور کنائینگ اِنت کہ بلوچ راج ناں زلم ءُ زوراکی ءِ ھلاپ ءَ ھاموش بیتگ ءُ نیکہ ھاموش بیت اِنت بلوچ راج ماں تئی دلبند ءَ نشتگ پہ وتی بیگواھیں مردمانی پد جنگ ءُ وتی توار ءَ ماں تیوگیں دگنیا ءِ سر ءَ سر کنگ ءَ

2 دسمبر ءَ نندانک ءَ نندوکیں بیگواھیں مردمانی کھولاں بی وائی سی اسلام آباد ءِ ھواری ءَ پریس کلب ءِ دیم ءَ یک روانکے کش اِتگ ات اے ساھت ءَ کساس بیست ءَ گیش پاکستان ءِ نیوز چینل ءُ جرنلسٹانی موٹل اوشتوک ات انت بلٸے بژن بیت کہ یکے ھم نیتک ءُ مٸے مات ءُ گوھارے نہ پُرس ات انت کہ شما پرچا اینچو دور ءَ اتکگے ءُ ادا دگانی سرا نشتگ ئے؟ شمئے جیڑہ چی انت؟

ھمے روانک ءَ سعید احمد ءِ مات ءُ جھانزیب ءِ مکھیں مات،آصف ءُ رشید ءِ بانکیں گوھار ءُ راشد حسین ءِ مات ءُ گوھاراں پریات زاری کُت کہ ھُدا ءَ بچار اِت مئے بچاں بیار ات مارا سر کن ات اگاں مٸے بچاں گُناھے کُتگ گڑا آھاں وتی جوڑ کتگیں عدالتاں پیش کن ات ھرچ سزا یے کہ عدالت دنت مارا سر ءُ چم اِنت-

ماھزیب ءَ تران کنان ءُ گوشت کہ ”راشد حسین امارات ءَ گپتگ ءُ ناشریں وڑے ءَ پاکستان ءِ دست ءَ داتگ مٸے گورا منانک ھست انت بلٸے اے ھردو ریاست مننگ ءَ ساڑی نہ انت راشد حسین ءِ گناہ ھمیش انت کہ آٸی ءَ بلوچ ءُ بلوچستان ءِ بزگی مار اتگ ءُ پہ وتی راج ءَ گپ جتگ اگاں پہ وتی راج ءَ ھبر کنگ گناھے گڑا اے گناہ ءَ ھمک بلوچ کنت ریاست ءَ چہ منی دو لوٹ انت یکے راشد حسین ءِ یلہ کنگ ءُ دومی بلوچستان ءِ وتواجھی نو بس انت گلامی بلوچستان مٸے زمین انت مٸے گِس انت بلوچستان ءِ وتواجھی ءِ لوٹ ءَ ما الم کنٸیں بازیں ماتاں وتی تنگھیں بچ پہ اے سرڈگار ءَ ندر کُتگ انت نو بس انت مارا گلامیں زند”.

بیگواھیں مردمانی کھول ءِ گڈی اوست بلوج راج انت آھاں ھمے گپ جت کہ پاکستان ءُ پنجاب ءِ مھلوک پہ ما توار چست نہ کن انت ءُ نٸیکہ آ مٸے اد ءِ آیگ ءُ نندگ ءَ وش انت مٸے گوں بلوچ راج ءِ ورناھاں ،نودربراں،پیرکماش زالبول ءُ رسانکدری مردماں گوں دستبندی انت کہ مٸے توار بہ بہ ئے-

وھدے کہ ما روانک کش اِت گُڑا پنجاب ءُ اسلام آباد ءِ مردم مٸے سرا برانز گپت انت ءُ مارا کانود ءُ آٸین ءِ درونت دیگ ءَ لگ ات انت کہ اے کُج ءِ کانود انت شما دگ بند کتگ انت لھتے ءِ دپ ءِ ھبر ھمیش ات انت کہ اے بلوچانی کار انت کہ ھر کجا رو انت بدماشی کن انت ءُ لھتے ءَ مارا زاہ ءُ بد ھم کُت اے اولی رند نہ انت کہ پنجاب ءُ اسلام آباد ءِ مردم بلوچاں وحشی ءُ دھشتگرد گُش انت یاکہ کوٸٹہ ءُ کراچی ءَ ماں ریاستی ادارھانی دست ءَ لٹ ءُ کُٹ کنگ بنت-

بلوچ راج ءَ اے پھمگی انت کہ آئی ءِ باندات ءِ رکینگ ءِ گڈی راہ گھگیری انت کجام ھم دروشم ءَ جھد کت کن ئے بکن ءُ پہ تو المی انت کہ توار چست بکن ئے بلوچ  بیگواھیں مردم پد جنگی انت ءُ ھاموش نندگ ءُ ندارہ چارگی نہ انت بلکیں یک مشت بٸیگی انت ءُ بلوچ راجی جیڑہ وتی جیڑہ کنگی انت ءُ ماں زرمبشتانی ھوار بٸیگی انت- بابائے بلوچ واجہ ھیربکش مری جاھے گُش ایت کہ ”زلم ءُ زوراکی ءِ ھلاپ ءَ گھگیری کنگ ءَ ھمینچو وھد زیرے دو ھمینچو تاوان بار بہ ئے.چہ مٸے ھاموشی ءَ دژمن مارا گیشتر جنت ءُ گار کنت“-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔