نبشتانک: تربت ءِ نندانک ءُ ڈن ءِ مردمانی وتگڑیں سر ءُ سوج
نبشتہ کار: میرو مری
دی بلوچستان پوسٹ
ناسرپدی ءُ نابزانتی مدام ناسرجمیں شور ودی کن انت ءُ مردماں چہ راستیں جھد ءَ دور کن انت۔ پمیشکا آ نزاناں کہ من کئے آں ءُ چہ کجا اتکگاں ءُ مئے راستیں جیڑہ چے پیما اِنت مردم چیزاں مدام وتی رنگ ءَ چارگ ءِ جھد ءَ کن انت۔ وتی سر ءُ سوج ءَ دیاں کہ آیانی ھیال ءَ چیز اے وڑ بہ بہ بیت ءُ پد ءَ موسمے گپ ءَ کناں۔اے بژن ئے گپّ ئے کہ مرچی تحریک ءِ تہ ءَ موسمے چارگ بیت۔ اے وَ مئے نا سرپدی اِنت کہ ما انگت تحریک ءَ سرپد نہ اِنت۔ اگاں کسے تحریک ءَ سرپد بیت گڑا تحریک ءِ اولی لوٹ”کربانی” اِنت ءُ کربانی ءِ تہ ءَ سرد ءُ گرم چارگ نہ بیت۔اگاں ما تربت ءِ نندانک ءِ گپّ ءَ کنیں گڑا اے نندانک تحریک ءِ دروشم ءَ دیم ءَ اتکگ۔ اگاں مردماں لگّیت کہ اے تحریک تھنا تربت ءَ مھدود کنگ بہ بیت گڑا بوت کنت اے ھلاس بہ بیت، بلے اگاں ایشی ءَ یک تحریکے ءِ رنگ ءَ دیم ءَ برگ ءُ بلوچستان ءِ دمک دمکاں ءُ گدان ءَ سر کنگ بہ بیت گڑا اے مئے باندات ءِ واستا یک بلائیں مٹی یے کاریت کہ اے تحریک مئے مردمانی دل ءِ تہ ءَ ھما ترس ءَ ھلاس بکنت ءُ اے ظلم ءُ زوراکانی دیم ءَ چو کوہ ئیگ ءَ مک بہ بیت بلے مئے مردم چہ وتی ناسرپدی ءَ نزان اَنت کہ ما چی گشگ ءَ ایں، بلے مرچی اے تھنا یک نندانکے نہ اِنت۔ اے نوں یک تحریک ءِ، ءُ ایشی ءِ تہ ءَ ہر بلوچ ھوار اِنت۔ ایشی ءِ سروک ہمدا نشتگ اَنت ءُ سرپد آں کہ مارا چی کنگی اِنت پرچاکہ نوں بلوچ راج زانت کہ مارا چہ اے ظلم ءُ زوراکی آں چہ رکینگ ئے راہ،بس ھمے یکیں تحریک اِنت۔ مرچی ہر بلوچ ءَ اے تحریک ءِ بہر بوئگی اِنت ءُ آ کجام ھم دروشم بہ بیت، آ دروشم احتجاج ئے بیت کہ روانک ئے۔ اے نوں بلوچ راج ءِ زمہ واری اِنت کہ اے نندانک ءَ یک تحریکے ءِ دروشم ءَ دیم ءَ بہ بارت ءُ وت ءَ چہ ظلم ءُ زوراکی آں چہ بہ رکّینیت۔ اگاں مرچی بلوچ ءَ سما نہ کرت گڈا ھمے رنگ ءَ مردم گار کنگ بنت ءُ کشگ بنت ءُ پدا لہتیں وتگڑیں مردم پاد کایاں، گشاں کہ ما سیاسی اوشت ءِ آماچ آں،اگاں مرچی اے سیاسی اوشت پروش دئیگی اِنت گڑا اے سیاست ھمے دروشم ءَ برجاہ دارگی اِنت ءُ تحریک ءِ دروشم ءَ دیما برگیءُ بلوچستان ءِ ہر جاہ ءُ دمگ ءَ سر کنگی اِنت۔
چہ تُرس ءَ تتکگیں مردم گُشنت کہ اےکیمپئین ئے، بِلّے کہ وتی وڑا جُنزگ ءَ اِنت زوت ھلاس بیت,چُشین باز کیمپئین جُنز اِتگ، وھدے ھمرائی ءَ آسر بوتگ اَنت، گوں ایشی ءَ بائید اِنت کس ءَ کار مہ بیت. بلے اے تتکگئیں سنگت نزانگءَ اَنت یا نہ جیڑگ ءَ اَنت کہ اے تہنا کیمپئینءِ نہ اِنت اے جُنزے۔ ہرچ ہما بلوچے کہ جنزے تہ ءَ ھوار اِنت ءُ اے جُنز ہمے داب ءَ روان کنت ءُ وتی مردم آں وت گچین کنت۔بلے جہد ءَ چہ سِستگئیں مردم انگت گُشنت کہ اے تِیرسُپتگیں جون آں گوں کَس ءَ کار مہ بیت ، ایشان سما نہ اِنت کہ اے بلوچ ءِ جون اَنت ہمے سرڈگارے پُسّگ آنی جون اَنت اے دگانی سرا ایر اَنت وتی وت واجہی ءَ لوٹگ ءَ اَنت، سرزمین ءِ سرا نِندوکیں بلوچ ءَ سَما اِنت کہ اے بلوچے جون اَنت، ایشانی وارثی مارا بزاں کہ “بلوچ” ءَ کنگی اِنت، آ مردم کہ جہد ءَ سِستگ ءُ چہ سرڈگار ء تَتکگ اَنت گوں درانڈھی ءُ وشھالی یے ملاران اَنت آ مردم آں چے سما کہ بلوچ چنچو جیڑھانی آماچ اِنت ، اے جیڑہ زمین ءِ نِندوکیں پُسّگ آں وتی کُتگ اَنت ءُ تحریک اے دُروشم داتگ۔ اے جُنز داں ہما وھد ءَ برجاہ مانیت داں بلوچ وتی سرڈگارے سرا بّوؤکیں ھرچ زورکی یےھساب ءَ چہ دُژمن ءَ مہ گِیپت۔
درملک ءَ نندوکیں مَردم انچو بے سما ءُ ناسرپد جوڈ بوتگ اَنت کہ مول ءُ مراد ئے گَپ ءَ کن اَنت کہ اے نِندانک ءِ مول ءُ مراد چی اَنت، بلے مارا اے سرپد بوئگی اِنت کہ نِندانک ءِ مول ءُ مراد “بلوچ” اِنت، اَگں کَسے بلوچ ءَ سرپد بیت گُڑا اے الّم زانت کہ بلوچ ءَ چے مُراد “بلوچستان ءُ بلوچستان ءِ اَجوئی” اِنت۔
او بلوچ تو کُشگ بوئگ ءَ ئے، گار کنگ بوئگ ءَ ئے، تئ گلزمین بمب ءُ توپ آنی دیمپان اِنت۔ پادا اشانی دیما بوشت ءُ گہگیری بکن کہ گہگیری ترا چہ اے درستاں رکینت کنت۔
بیا اِت وتی شہیدانی ریتکگیں ھونانی سوگند ءَ وریں کہ ما چہ اے جُنز ءَ ھِچ وڑا پد کِنز ءُ دگا بازی نہ کنیں تُری ھر وڑیں آس گواریں جاورے دیم پاں بہ بئیں!
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔