نبشتانک: شھید میجر بھرام درویش
نبشتہ کار: باھڈ بلوچ
دی بلوچستان پوسٹ
لھتیں مردمانی کردار انچو بُرز ءُ بالا بیت کہ دُگنیا ءُ جَھان ءِ گِچینی لبز آھانی مانا کنگ ءَ بے سوب بنت، میجر چہ ہما مَردماں یَکّے اَت کہ آئی ءَ پہ بلوچستان ءِ تاھاپیں درچک ءُ دارانی سَبزینگءَ وتی ھون رِیتک ءُ ھزاراں انچیں ورنا جوڑ کُرت کہ آ مروچی ماتیں زَمینءَ گوں وتی زَگریں ھوناں سیراپ کنان اَنت، رِتکگیں ھونانی ھَمُک تْرمپ گُشگ ءَ اِنت کہ میجر! تو نہ مُرتگ ئے، ھست ئے ءُ نمیرانے۔میجر1979 جون ءَ، مزن بند ءَ شئے مھمد ءُ مات ھوا ءِ لوگ ءَ وتی چَمّاں پَچ کَنت، میجر ءِ بُنکی نام مھمد کریم بیت، چوناھا میجر ءِ کماش “بانسر”ءِ نندوک بیت بلے چوش کہ شئے مھمد مالداریں مردمے بیت گُڑا آ پہ وتی دلوتاں چراگ جاہ ءُ زید یے شوھاز ءَ لَڑ ءُ بار کنت ءُ گورھگی مزن بند ءَ کئیت
میجر بلوچستان ءِ ھما پدمنتگیں کونہ ءَ ودی بیت کہ اود ءَ اسکول ءِ نام ءُ نشان نہ بیت پمیشکا وھدے کہ پنچ ءُ شش سال ءِ اُمبر ءَ رس اِیت گُڑا آ وتی کماش ءِ ھمرائی ءَ دلوت ءُ ڈگاراں دلگوش بیت، پَرے کوہ ءُ پَرا کوہ، پرے ڈگار ءُ پرا ڈگار، گُڈی ءَ میجر چہ اےجاگھاں ھمینکس پُھتو (بلد) بیت کہ ترا پہ لَنکُک گْوش اِیت کہ پِلاں شِیپ پِلاں کور ءَ اِیر کَپ اِیت ءُ پلاں گَٹّ پلاں جاگَہ ءَ درکَپ اِیت، اے ھمے کوہ ءُ کورانی مِھر بیت کہ “مھمد کریم” ءَ “میجر بھرام” جوڑ کنت میجر 2001 ءَ آروس کَنت ءُ آروس کَنگ ءَ پد آ مزن بند ءَ چہ لَڈ اِیت ءُ مند گوبُرد ءَ کَئیت، کساس سئے سال ھمداں جَلّ اِیت، بلے تنگدستی ءُ شُد آئی ءَ مجبور کَنت کہ آ وتی مَکَھیں ڈیھ ءَ بِلّ اِیت ءُ ھپت دریا ھما پُشت بُروت۔
2004 ءَ آ دراں ڈِیھ بیت، بلے درامدیں ڈیھ ءِ رنگ ءُ روگنیں ماڑیاں آئی ءِ دل پہ وَت کَشّ اِت نہ کُرت، موٹلانی ھِیرّ ءُ ھاراں آ بے وار کُتگ اَت، آئی ءَ مزن بند ءِ ھما بیگاہ یات پیداگ اَت انت کہ آ بند ءِ سر ءَ نشتگ ءُ کپوتانی کوکواں دِلگوش اِنت، یا کہ سُھب ءَ لوگ ءِ دیم ءَ نشتگ ءُ سیاہ چاہ ءُ پرانگ آئی ءِ دیم ءَ اَنت، چہ کوھاں بُرز چِست بیوکیں روچ ءِ برانزانی ندارگ ءَ مُلما اِنت، آئی ءَ انچو سما بیت کہ زَمین من ءَ گوانک جَنگ ءَ اِنت، راست گْوشتگ ڈولی بیگ ءَ” کزا مَردے چَرے ھئوپ ءَ بہ رَکّ اِیت زَمین ءِ ھاک تَریاکی نَشائے” پمیشکا میجر 2007 ءَ وتی گَرنچاں بَند ایت ءُ ڈیھ ءَ واتر کَنت، اے ھما زَمانگ بیت کہ بلوچ ءِ بَچ پہ وتی ماتین زَمین ءَ کوھانی سَر ٹُلّاں کَپن پوش بنت، حالد ءُ دلجان ءِ وڑیں بَچانی ھون ءِ وشبو تالان بیت، میجر ھمے وشبو ءِ ملاراں بندیگ بیتءُ اے ملارانی سپر 2008ءَ آئی ءَ گوں بلوچ لِبریشن پرنٹ ءَ بندوک کَن انت پد ءَ میجر بیت، بلوچستان ءِ کوہ بنت ءُ لَجوزیں دُژمن بیت۔ میجر ءَ بلوچستان ءِ کوچگاں پہ دِلے داتگ، گُش اَنت کہ یک روچے آ مزن بند ءَ کَھیر ءِ سارتیں ساھگ ءَ نندوک بیت گُڑا مات ھوا آئی ءَ توار کَنت بلے میجر انچو مُلما بیت کہ گوشے زاناں زَمین چو پِیریں ماتے ءَ کِسّہ کَنگ ءَ ایں ءُ میجر چو کودکی ءَ ھاموش ءُ ھُبناکی گوشدارگ ءَ اَنت-
مات آئی ءَ سئے رند ءَ توار پِر جَنت بلے زَمین ءِ مَلار انت کہ پُرشگے نام ءَ نہ زان انت، پد ءَ مات نرم نرم ءَ وتی دست ءَ آئی ءِ کوپگ ءِ سر ءَ اِیر کَنت، آ جَھ سِرّ اِیت انچو کہ کَسے چہ واب ءَ گُڑ اِیت، آئی ءِ ارس اِیر رِچ اَنت ءُ گُش اِیت “ماتی! من دوشی وابے دِیستگ کہ بلاھیں ھَژدیا ءِ منی زَمین ءَ اِیر کَپتگ، آ منی جنگل ءُ کوھاں آس شانگ ءَ اِنت، منی رَمگ ءَ ورگ ءَ اِنت، دومی نیمگ ءَ منی کوہ ءُ گیابان من گوانک جَنَگ ءَ اَنت، ماتی! اے کوہ منیگ اَنت، اے راستے کہ تو من ءَ پیداگ کُتگ بلے زَمین ءَ من ءَ رودِینتگ، من ءَ جاہ دَاتگ، اگان من مِر آں ھم ھمے زَمین انت کہ من ءَ وتی امبازاں زور اِیت، من پہ وتی کوہ ءُ ڈگاراں اَلم مِڑ آں، من ءَ وتی ماتین ھَنکین پہ ھژدیا ءُ وروکاں دل نہ بیت”میجر ءَ بِلّے اسکولی وانگ نیست اَت بلے پد ءَ اوں آ سَکیں کَمیٹڈیں ءُ ھُنرمندیں مردمے اَت، آئی ءِ کِرّا وڑ وَڑیں جنگی رھبند ھست اَت، دژمن ھِجبر چہ آئی ءِ نشانگ ءَ نہ رَکّ اِت ءُ سلامتی بُنجل ءَ نہ شُت، میجر کہ بی ایل ایف ءَ ھوار بیت گڑا دز ھورکیں وھدءَ آ جُھد کَنت کہ بوان اِیت، سنگتانی کُمک ءَ آ کم کَم وانگ ھیل کَنان کَنت پد ءَ انچیں روچے کَئیت کہ میجر ءِ دیوان ءَ ابید سیاسی ءُ لبزانکی ھبر ءَ دگہ ھِچ نہ بیت، آئی ءَ کم وھد ءِ تہ ءَ یک سُپاھیگی ءَ چہ میجری ءِ بستار دئیگ بیت، ءُ اے دمگ ءِ دُراھیں زِمہ واری پُرّیں پانزدہ سال ءَ آئیءِ کوپگ ءَ بنت۔
میجر یک اُمیت یے اَت، باز وھد ءَ سنگت چہ جُنز ءَ دل پروش بوتگ اَت انت گُڑا میجر اَت کہ مردماں دِلبڈی دَئیگ ءَ اَت، آھاں گوشگ ءَ اَت کہ پہ زَر ءَ یک سُپاھیگے تہ چُنت ءَ سنگر ءَ نند ایت؟ آھر آ دَم بارت، بلے پہ جزبگے ، پہ مِھرے سنگر ءَ نشتگیں مردم داں گڈی ساہ ءَ جنگ دنت۔ اے ھبر چو رُژنائیں روچ ءَ پَدّر اِنت کہ سوب مئیگ اِنت، لجوزیں دُژمن ءَ شکست وارتگ!-
22فروری،2023 ءَ لگوریں دُژمن مزنبند ءَ میجر ءِ سر ءَ ڈرون اُرشے کَنت ءُ آ گوں شش دگہ سلاہ بندیں ورناھاں نمیران بیت، بلے مات ھوا چہ دَپءَ اُپے نہ کَشّ اِیت ءُ گْوش اِیت کہ میجر تھنا منی بَچ نہ اِنت آ اے زَمین ءِ بَچ اِنت ءُ پہ زَمین ءَ ھزار بَچ کُربان! داں بی بی ھوا دابیں مات زندگ ءُ ھست اَنت بلوچستان ءَ “میجرانی” ھامین اِیرَھت نہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔