گڈانی ءِ تیاب ءَ جنکے گریوگ ءَ اَت – کادر ھسرت

سرگْوست: گڈانی ءِ تیاب ءَ جنکے گریوگ ءَ اَت

نبشتہ کار: کادر ھسرت

(بنگیجی بھر)

دی بلوچستان پوسٹ

سال 2019 اَت ساچان (اگست)  ءِ شوکیں بیگاھے اَت کساس چار ءُ نیم بوگ اَت ھَور لھم لھم شنزگ ءَ اَت ءُ مسکیں زمین ءَ تَر کنگ ءَ اَت۔ منی دل ءَ لوٹ اِت کہ اے موسم ءَ من گوں سنگتاں کمو دور بہ رو آن ءُ اے موسم یک انچیں جاگھے ءَ بہ نند ایں کہ اود ءَ تھنا ما بِہ بَہ ایں ءُ ابیتکی بہ بیت اِنت۔ من گوں سنگتاں ھال ءُ اھوال کت درائینت کہ” مرچی موسم سک دلکش اِنت، شما چے گْوش اِت باریں؟” یک جْوانیں جاگھے ءَ تر ءُ تابے ءَ بہ رو ایں یا انا” سنگتاں پسو دات” ھو رو ایں تو بیا ھُزدار ھوٹل ءَ بہ نند ما کا ایں من چہ لوگ ءَ درآتک آن ھُزدار ھوٹل ءَ شُت آں ۔

 ساھتے ءَ پد سنگت منی کَر ءَ آتک اَنت کمو ھوٹل ءَ نشت ایں جْوانیں شیرچاھے وارت ءُ من چہ سنگتاں جُست گپت” سنگتاں! مرچی شمئے ھیال ءَ ما کجا بہ رو ایں۔ دْراھیں سنگتاں پسو دات کہ یار گڑانی جْوانیں جاگھے ھمود ءَ رو ایں، ما چداں رھادگ بوت ایں ءُ گپ کنان بوت ایں تاں گڑانی ءِ کراس رس اِت ما کراس ءَ اوشتات ایں پہ وت ءَ ورگی سامان زرت ءُ دیم پہ گڑانی ءِ تیاب ءَ سپر بندات کت، ما میزان میزان ءَ جُنزان بوت ایں وھدے کہ ما گڑانی ءِ تیاب ءَ رس اِت ایں ما وتی پرپٹ شریں جاگھے ءَ اوشتارینت اَنت، تیاب ءِ نیمگ ءَ جُنز اِت ایں، ما جْوانیں رنگے ءَ تر ءُ تاب کت، من سنگت گْوشت اَنت کہ تر ءُ تاب وَ جْوانیں رنگے ءَ بوگ ءَ انت نوں رو ایں کہ وھد بے وھد اِنت ءُ روچ ھم ایر بکگ ءَ اِنت۔ سنگتاں پسو دات” شر گڑا تیار بِہ بَہ اِت رو ایں۔ 

ما پہ وتی میتگ ءَ واتر بوگ ءَ ات ایں کہ ھمے دمان ءَ منی چم یک بلوچیں گْوھارے ءَ کپت اَنت اچ ما کمو دُور تیاب ءِ نزیک ءَ نشتگ اَت ءُ دست ئِے زنوک ءَ اَت دیم ئِے گوں زِر ءَ داتگ اَت من ھیران بوت آں کہ اے چونیں جنکے بیت کہ اے ساھت ءَ تیاب ءِ نزیک ءَ نشتگ ءُ تھنا اِنت۔ من جیڑ اِت کہ گْوھار ءِ کِر ءَ برو پد ءَ من جیڑ اِت کہ ھدا بزانت باریں کئیگ گماں دچار اِنت منی روگ ءَ پائدگ نیست اِنت، بَلے اے دل ھچ وڑ ءَ من ءَ نہ مرینگ ءَ اَت یکوئی ھمے سکین ءَ دیگ ءَ اَت کِر ءِ برو چکرے بہ جن بلکیں کارے چیزے بیت ئِے” من توکل کت ءُ گْوھار ءِ نزیک ءَ شُت آں سلام دات گْوھار ءَ کہ من ءَ دیست زوت وتی گشان ئِے زرت وتی ارس ئِے پھک کُت اَنت درائینت ئِے” والیکم السلام جی بہ گْوش لالا ترا ھیر اِنت۔

من پہ مُلوری پسہ دات” جی ھو گْوھار من ءَ وَ ھیر اِنت، آ دگہ مردم گوں وتی کَھول ءِ مردماں تیاب ءِ لمب ءَ تر ءُ تاب ءَ اَنت ءُ شاتکامی کنگ ءَ اَنت بَلے تو اے تیاب ءِ لمب ءَ ایوک ءَ نشتگ ئے ءُ جیڑگ ءَ ئے ؟-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔