نبشتانک: تابوت ءِ تہ ءِ لاش ءُ مئے زمہ واری
نبشتہ کار: ڈاکٹرشلی بلوچ
دی بلوچستان پوسٹ
مردماں گار ءُ بیگواہ کنگ ، آیاں دُروگیں میڑ ءَ جنگ ریاست ءِ ھوری ءِ سزا ءِ بھر اِنت کہ اِیشی ءِ کُمک ءَ چہ بلوچ سیاست ءَ را نِزور کنگ ءُ ھلاس کنگ لوٹ اِیت۔ بے گُناھیں بلوچ مھلوک ءِ گار ءُ بیگواہ کنگ ءُ آیاں دُروگیں میڑ ءَ جنگ ءَ چہ ریاست سرپد بیت کہ آ بلوچ سیاست ءَ ھتم کنت تہ اے ریاست ءِ مزنیں نابودی ءُ نا سرپدی اِنت۔
ریاست بلوچاں گُش اِیت کہ منی کانود ءَ پیلو بہ کن اِت منی راھبند ءِ ھِساب ءَ وتی ھکانی لُوٹ ءَ بِہ کن اِت، بلے دُومی نیمگ ءَ ھمے ریاست ءَ ما گند اِیں وتی راھبند ءُ کانون ءِ ھلاپ ءَ رُوت وتی جند ءِ راھبند ءَ پُرشت ءُ پروش کنت۔ اے گپ الم جیڑگی گپے کہ آ کُجام ریاست ءِ کانون اِنت یک بندیگی ورناھے بیار آمیدگس ءَ پیش کن ءُ پد ءَ آئی ءَ دُروگیں میڑے ءَ شھید کن ءُ لس مھلوک ءِ دیم ءَ آئی ءَ دھشت گرد بہ گش۔ دھشتگرد بالاچ نہ اِنت بلکیں سی ٹی ڈی اِنت شپ ءِ تھاری ءَ چُو دُزاں لُوگاں اُرش کنت ءُ بے گُناھیں مردماں چِست کنت گار ءُ بیگواہ کنت ءُ دُروگیں میڑ ءَ شھید کنت ۔
تُربت ءَ شھید پدا چُوک ءَ پہ شھید بالاچ ءَ نندانک نُوکیں تھریکے نہ اِنت چِد ءُ پیش ھُوشاپ ءِ کماشیں مھراب وتی دو تپلیں نُماسگانی نہ ھکیں کُوش ءِ ھلاپ ءَ گُوں وتی پاگ ءِ کرچکان ءُ بے ریائیں پاد ءِ سواساں کیچ تاں شال ءَ سپر کنت ءُ گُڈی ءَ وتی نُماسگاں نیوکاھان شال ءَ شھیدانی باھُوٹ کنت ۔دُروگیں میڑانی ھلاس کنگ ءِ ھاتر ءَ شال ءَ پنج ءَ رُوچ ھُون بادینوکیں سارتی ءَ بلوچ زالبول گُوں شِیر مِچیں چُکاں بے آسراتی ءَ ھور ءِ سر ءَ دھرنا دے اَنت ، زِیک ءُ پیری نُوشکی ءَ بلوچ زالبولے مُپت ءِ نہ ھک ءَ تیر بار کنگ بیت تُربت ءَ بالاچ ءُ دگہ ھپت مردُمانی جنگ ریاست ءِ زُوراکیانی تسلسل اِنت کہ برجاہ اِنت۔
ریاست اے گپ ءَ الّم بزانت کہ بلوچ ءِ سیاسی جُھد پہ زُوراکی ءَ ھچبر ھلاس کنگ نہ بیت ۔ ریاست باید اِنت بلوچ ءِ راج دپتر ءَ چمشانکے بِہ دنت کہ ھما جاہ زُوراکی گِیشتر بُوتگ ھمود ءَ بالاچ رنگیں ورنا گھگیری ءِ چیدگ بوان بُوتگ اَنت۔
زوارکی ھرچ وڑ ءُ ھرچ داب ءَ بہ بیت بلے مرچی ئیں وھد ءِ لُوٹ ءُ مئے کومی زمہ واری ھمیش اِنت کہ ما زوارکی ءِ ھلاپ ءَ توار چِست بہ کن اِیں۔ما اَگاں توار چِست کن اِیں تہ مارا دِگہ بالاچانی ژانگولیں لاش کُوپگ ءَ بنت ۔توار چِست نہ کنگ ءِ مُز اَنت کہ بالاچ ءَ پیش دُو سال ءِ تہ ءَ دُو سد مردُم ءَ گیش گار ءُ بیگواھیں بلوچ دُروگیں میڑ ءَ شھید کنگ بیتگ ۔
ءُ ما اے گپ ءَ بہ زان ایں کہ اے واکیات اوّلی ءُ گڈی نہ اِنت ۔ مارا پہ اے زُلم ءُ زوراکی ءِ ھلاپ ءَ توار چِست کنگ ءِ ھاتر ءَ بالاچ گُونگیں ورنایانی شھید بوگ ءِ ودار مہ بیت بلکیں مارا (مُستقل مزاجی ءُ تسلسلے) ءِ گُوما ریاستی زُلم ءُ زوراکیانی ھلاپ ءَ توار چِست کنگی اِنت۔ مرچی بلوچستان ءَ چُشیں لُوگے پشت نہ کپتگ کہ آ ریاستی (collective punishment) ءِ آس ءَ نہ گپتگ۔ما اے گپ ءَ بہ زان ایں کہ مئے ھاموشی ریاست ءَ گیش ءَ چہ گیش زُوراک کنت ۔ مئے ھاموشی مرچی ریاست ءَ ھمک (غیر آئینی) ءُ (غیر اِنسانی عمل) کنگ ءِ رزا ءَ دیگ ءَ اِنت۔پمیشکا مئے راجی زمہ واری بیت کہ ما ھمک ھما نزام ءُ زُوراکی ءِ ھلاپ بہ اوشت این ءُ املی پڑ ءَ توار چِست بہ کن اِیں کہ آ بلوچ راج ءَ تاوان بھر کنگ ءَ اِنت۔
سرپدیں بلوچ مھلوک ءُ سیاسی جُھدکار اے گپ ءَ وتی جبین ءَ نکش بہ کن اَنت کہ مئے واستا توار چِست کنگ ءُ مئے ارسانی پھک کنگ ءَ دِگہ کس نئیت،بلکیں ھرچ جُھدے کہ کنگی اِنت گڑا آ بلوچ ءِ سرپدیں مھلوک ءُ سیاسی جُھدکاراں کنگی اِنت۔ما ھمک ھما بلوچ ھاندان ءِ ھمراہ اِیں کہ آ ریاست ءِ زُوراکیانی آماچ بیتگ۔ھرچ ھما بلوچ ءِ اِدارہ اے زُوراکی، جبر ءُ زُلمانی دارگ ءِ جُھد ءَ کنگ ءَ اِنت مئے اِدارہ اے پاکیں جُھد ءَ دُومی اِدارھانی ھمکوپگی ءَ کنت چے ءَ کہ اے مئے ایمان اِنت کہ بید ء ادارہ ءَ جُھد ءُ ھمکوپگی ءَ ما اے زُلم ءُ زُوراکیاں داشت کُت نہ کن ایں، ایش زلم ءُ زوراکی ءِ دارگ ءِ واستا مارا یکجاہ، یکتوار ءُ یکمُشت بیگی ایں دیم ءَ جُنزگی اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔