بلوچستان ءِ پارلیمانی سیاست ءِ مولمی مُرگ
ٹی بی پی شونگال
نوزدہ سد ءُ ھپتاد ءَ عوامی نیشنل پارٹی ءِ سرکار ءَ پد بلوچستان ءِ پارلیمانی سیاست پاکستان ءِ بنجاھی پتر ءِ کَش ءُ گوراں گردگ ءَ اِنت ءُ پاکستان ءَ ھما پارٹی کہ تاکت ءَ کئیت، ھما پارٹی بلوچستان ءَ سرکار جوڑ کنت۔ بلوچستان ءِ پیسلہ سیاست ءِ پتراں گیشتر پاکستان ءِ تاکتوریں واکدار کن اَنت ءُ ھمایانی لُنککانی سُرینگ ءِ پد ءَ سیاست دان وتی پیسلھاں کن اَنت۔
گوستگیں روچاں پاکستان مسلم لیگ نون ءِ سروک میاں نواز شریف ءَ پاکستان ءِ پیسرگیں مزن وزیر شھباز شریف ءُ وتی پارٹی ءِ رھشونانی پجیگ ءَ بلوچستان ءِ بنجاھی شھر شال ءِ تر ءُ تاب کُتگ، کہ اے نیام ءَ پاکستان پیپلز پارٹی، بلوچستان عوامی پارٹی، بلوچستان نیشنل پارٹی مینگل ءُ نیشنل پارٹی ءِ جتا جتائیں رھشون پاکستان مسلم لیگ نون ءَ ھوار بیتگ اَنت۔
پاکستان ءَ گچین کاریانی روچ ءِ جار ءَ پد بلوچستان ءَ پارلیمانی سیاست ءَ گوں بندوکیں سیاست دانانی جتاجتائیں پارٹیانی تہ ءَ بال کنگ ءِ درچ بندات بیتگ انت۔ بلوچستان ءِ پارلیمانی سیاستدان واکداریں تاکتانی اشارگانی چم چار بنت ءُ آیانی پرمان ءِ پد ءَ ھمک پنچ سالاں پد پارٹیاں مٹ کن اَنت۔
ھما سیاستدان کہ دو ھدزار ءُ ھژدہ ءَ تاکتوریں واکدارانی گُشگ ءِ پد ءَ بلوچستان ءِ تہ ءَ مسلم لیگ نون ءِ سرکار ءِ ھلاس کنگ ءِ سوب جوڑ بوت اَنت، مروچی ھمایانی گشگ ءِ پد ءَ نون لیگ ءِ دروازگ ءَ ٹُکگ ءَ اَنت ءُ مسلم لیگ نون تاکت ءِ گرگ ءِ ھاتر ءَ اے مردماں پہ وشی زیرگ ءَ اِنت۔
بلوچستان ءِ تہ ءَ راجدوستیں پاٹیانی سیاست ءِ ھلاس کنگ ءِ ھاتر ءَ پاکستان ءِ بنجاھی پاٹیاں تاکتوریں واکدارنی آشیرباد ءَ گوں مھکم کنگ بیتگ بلے راجدوستیں پاٹیانی بنجاھی پاٹیاں گوں ھمسنتی ءُ سرکار ءِ تہ ءَ بھر گِرگ ءِ سیاست ءَ بلوچستان ءِ تہ ءَ بلوچ راجی سیاست نزور کُتگ۔ اگاں راجدوستیں گل وھد ءُ جاوراں سرپد مہ بنت ءُ بلوچ راجی سیاست ءَ مھکم کنگ ءِ نیمگ ءَ مہ جُنز اَنت گُڑا آ وھد دیر نہ اِنت کہ بلوچستان ءِ تہ ءَ پارلیمانی سیاست ءِ ٹاہ جنوکیں راجدوستیں پاٹیانی سیاست ءِ راہ ھم بند کنگ بنت اِنت۔