نبشتانک: مارا وتی دود ءُ ربیدگ زانگی اَنت
نبشتہ کار: نپیسہ مجید
دی بلوچستان پوسٹ
برے برے لبز دْروہ اَنت، سسّا هم گار بیت، انچیں جیڑه سر ءَ کپ اِیت کہ ھچ پھم کار نہ کنت کہ چے بوگ ءَ اِنت؟ هما وهد ءَ کہ راست ءَ را دْروگ ءِ پارسنگ ءَ کنگ بہ بیت۔ بلے اد ءَ منی جیڑه تهنا پہ وت ءَ نہ اِنت بلکیں پہ وتی راج ءِ گْران بھائیں گهار ءُ زالبولان اِنت۔
آ ھک کہ مارا مئے شریت ءُ دین ءَ داتگ اَنت آهاں یلہ بدے کہ اِد ءَ مُسلمانی ءِ نام پَش کپتگ ءُ بس بکول ء مبارک کازی ئیگ ءَ کہ ”مُسُلمانی کجا پشت کپت باریں یزیدیں کاپرانی واجھی اِنت“ بلے هما ھک کہ مارا مئے دود ءُ ربیدگ ءَ داتگ هما چہ ما پُلگ بوتگ۔ کمو گْوست ءَ بچار اِت ءُ چمشانکے بہ دے اِت، راجدپتر ءَ بہ پول اِت کہ گْوست ءَ زالبول ءِ بستار ماں بلوچ چاگرد ءِ تہ ءَچے بوتگ ءُ بلوچ ءِ دود ءُ ربیدگ چے بوتگ؟ بلوچ ءِ گور ءَ زالبول ءَ را چینچوکیں ارزشتے دیگ بوتگ اگاں جنگے، مزنیں کُشت ءُ کوشے بوتگ زالبولے اگاں میان ءَ اَتکگ ھما جنگ بند کنگ بوتگ بیر بکشگ بوتگ۔ بلوچ ءِ گور ءَ زالبول ھچ بَر پُشت ءَ کنگ نہ بوتگ راجدپتر ءِ نمیرانیں کارستے بانڑی ءِ نام وت اِے گپ ءِ گْواھی ءَ دنت کہ دھلی ءِ بادشاہ ءَ گوں دیم پہ دیم جنگ ئِے کُتگ بلے چاکر گوں لشکر ءَ تتکگ رند ءَ کہ ھوش ئِے کُتگ بانڑی گوں نہ اِنت نو میران ءَ جبزگ کُتگ کہ ”من رو آں ھوتیں بکر ءَ چار آں من وتی مات ءِ لاش ءَ کار آں “ ایشی ءَ چہ اِے زانگ بیت کہ بلوچ ءِ زالبول ءُ مردین برابر بوتگ اَنت جنگانی تہ ھم بھر زُرت اِش کُتگ ایوک ءَ لوگ ءِ تہ بند نہ بوتگ اَنت۔
ھمے وڑ ءَ گُل بی بی اِنت کہ بلاھیں لشکرے ءِ کماندار بوتگ۔ چُشیں بازیں کارست ھست کہ بلوچ راجدپتر آیانی سر ءَ پھر بنت ایت، اگاں ما بلوچ راجدپتر ءَ بوان ایں اود ءَ زالبول ءِ ھوال ءَ بلوچ ءِ دود ءُ ربیدگ چہ دُنیا ءِ کُلیں راجانی دود ءُ ربیدگاں چہ سرجم ءُ برجم تِر بوتگ چُش کہ ایندگہ راجانی تہ ءَ زالبول پدمنتگ ءُ ڈالچار کنگ بوتگ آیانی سر ءَ زُلم ءُ زیادتی کنگ بوتگ بلوچ ءِ گور ءَ نہ بوتگ، برات ءُ گھار یک ھساب بوتگ اَنت۔
بلے مرچی کہ بلوچ گُلام اِنت بلوچ ءِ دود ءُ ربیدگ، زمین ءُ زُبان، مال ءُ مَڈّی ءَ ھوار لج ءُ ننگ ھم پُلگ بوگ ءَ اِنت۔ ایشانی رکینگ ءِ واست ءَ جَد ءُ جُھد کنگی اِنت، وت ءَ چہ گُلامی ءِ زمزیلاں در کنگی اِنت۔ ایوک ءَ جنگ کنگ ءُ زمین ءَ آزات کنگ ءَ پہ ما اِے گُلامی ءِ زمزیلاں دراَتک نہ کن ایں بلکیں مارا وتی بلوچی ءِ پجّار اوں رکینگی اِنت، گُڑا مئے پجّار ھمیش اِنت کہ دست ءَ ماں دلبند ءَ بہ جن ءُ بروتاں تاب بہ دے این ءُ شلوار ءِ پادگاں گوازے گوازے بہ کن ایں کہ ما بلوچ ایں؟
پسّو : اِنّا-
واجہ سید زھور شاہ ھاشمی ءَ گُشت کہ”بلوچ پہ دود بلوچے” ایشی ءِ بزانت ایش اِنت کہ مئے تہ ءَ بلوچیت بہ بیت گُڑا ما وت ءَ چہ اِے گُلامی ءَ در کُت کن ایں۔
وتی زُبان ءَ چہ بے سما، وتی دود ءُ ربیدگ، راجدپتر ءُ پجّار ءَ چہ بے سما بس وتی شلوار ءَ گوازے پِر کن ریش ءَ بہ رند سیکل ءَ سوار بو گُش ئے زاناں ”پی آئی جھاز“ ءَ سوار آں، ھوٹل ءَ بہ نِند ٹانگ ءَ ٹانگ ءِ سر ءَ کن سگریٹ پہ سگریٹ بو ءُ چاہ بور گوں سنگتاں بٹاک بہ جن کہ من بلوچے آں اِے کجام بلوچی اِنت؟.یکبرے بلوچیت ءِ جِند ءَ بزان ایں گُڑا وت ءَ بلوچے بکن ایں، مات ءُ گوھارانی سر ءَ زُلم کنگ ءَ پہ ما بلوچ بوت نہ کن ایں ءُ نیکہ وتی آزاتی ءَ پچ گِپت کن ایں۔ مرچی وتی دود ءُ ربیدگاں چہ بےھیال اِیں ءُ کبزہ گیر ءِ زُبان ءُ دود ربیدگ زُرتگ اَنت گُڑا کجام شَرم ءَ آجوئی ءِ گپ ءَ بجن ایں؟ ما زالبول ھم ھمے چاگِرد ءِ بھرے ایں گُڑا مارا چی ءَ مئے ھک دیگ بوگ ءَ نہ اِنت؟ مرچی اے کم نِزّریں چاگرد ءَ مارا انچو نز آؤرتگ کہ ما یک لبزانکی دیوانے( وٹسپی گُروپ) ءَ ھوار بوت ءُ وتی زُبان ءَ ونت اوں نہ کن ایں۔
مئے بدواہ وَ وش اَنت کہ بلوچی گار ءُ بیگواہ بہ بیت پمیشکا چُشیں ادارھے نیست کہ اود ءَ بلوچی وانینگ بہ بیت بلے لھتیں راجدوست ءُ زُبان دوستیں واجھاں کہ وٹسپی دیوان اڈ کُتگ ءُ بلوچی وانینگ ءَ اَنت ھمے دیواناں ھم ما ھوار بوت نہ کن ایں کہ وتی زُبان ءَ بوان ایں ھیل بکن ایں۔ من ءَ گوں وتی زُبان ءَ مھر اِنت پمیشکا من وٹساپی دیواناں ھوار بوتگ آں کہ وتی زُبان ءَ ھیل کن آں۔ بلے برے یک گونگیں مردے کیت کہ وتی اکس یا تواربندے دیم بہ دے تانکہ ما بزان ایں کہ تو جنکے ئے یا ما گوں تو گپ کن ایں۔
دُنیا ھمے سوشل میڈیا ءُ دامگ ءَ چہ کجا کجا سر بوتگ پہ زُبان ءِ واستا مرچیگیں سوشل میڈیا چینچو ارزشت دار ایت بلے مارا اِے سُد نیست ءُ ما چے کنگ ءَ ایں؟ یک جنکے اگاں وتی زُبان ءِ وانگ ءَ دیوانے ءَ ھوار اِنت آئی ءَ دل سیاہ ءُ ٹارچر کنگ بیت کہ تو وتی اکسے، تامُرے ءُ تواربندے روان دے باریں تو جنکے ئے یا بچکے۔
جِند ءِ براتانی کہ ھال ایش اِنت گُڑا دْرامداں چَہ چے گِلگ؟ نو باید اِنت مارا جیڑگ لوٹ ایت، سما کنگ لوٹ ایت کہ اِے مئے دود نہ بوتگ کہ زالبول ءَ وانگ ءِ ھک نیست یا زالبول لوگ ءَ ڈن دراَتک نہ کنت، نو دُژمن ءِ دود یلہ کنگی اِنت مارا وتی دود ءُ ربیدگ ءُ زُبان زِندگ کنگی اِنت گُڑا ما باج ءَ بُرت کن ایں۔ گُڈّسر ءَ ھمے گُش آں کہ وتی تہ ءَ بلوچیت ءَ زندگ بدار اِت۔ بلوچستان آجو بات، بلوچ ءُ بلوچی زندگ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔