تربت: پولیس کارگس ءِ سر ءَ اُرش، پولیس کارمندے ءَ ھوار پنجاب ءِ جھمنندیں 4 کس بیران

بلوچستان ءِ دمگ کیچ ناصر آباد ءَ ناشناسیں سلاہ بندیں مردماں تیرگواری کنان ءَ پولیس کارمندے ءَ ھوار چار دری مزدور کشتگ انت ءُ یکے زدگ کتگ-

پولیس ءِ رد ءَ سَے شمبے ءِ شپ ءِ ساھت چار ءَ ناشناسیں مردماں تربت ءِ ھند ناصر آباد ءَ تیرگواری کتگ ءُ چار دری مزدور کشتگ اَنت ءُ یک پولیس کارمندے کُشتگ-

پولیس ءِ رد ءَ بیران بیتگیں مزدورانی پجار محمد عظیم ء ظفر علی جھمنند مظفر گڑھ پنجاب،شھباز ء غلام رسول جھمنند مظفر گڑھ پنجاب، باقر علی ء شیر محمد جھمنند مظفر گڑھ پنجاب ءُ شھزاد احمد جھمنند مظفر گڑھ پنجاب ءِ ناماں زانگ بیتگ اَنت – پولیس کارمند ءِ پجار عطا جان ء محمد اسلم جھمنند نودز تربت ءِ ناماں زانگ بیتگ اَنت-

تیرگواری ءَ زدگ بیتگین ءِ پجار مدثر ء شیر محمد جھمنند ڈی جی خان زدگ بیتگ ءُ پولیس ءَ تربت سول ھسپتال ءَ رسینتگ-

وئیل ءَ پد ایس ایس پی محمد بلوچ ءِ گوشگ ءَ پولیس ءِ کارمند وئیل جاہ ءَ سر بیتگ اَنت ءُ چم دیستگیں مردماں یکجاہ کنگ ءُ وئیل ءِ پٹ ءُ پول ءَ کنگ ءَ اَنت –

زانگ بہ بیت گوستگیں روچاں تربت سیٹلائیٹ ٹاؤن ءَ دری آبادکارانی سر ءَ جان کُشیں اُرشے بیتگ ات کہ آئی ءِ زمہ واری بلوچ لبریشن آرمی ءَ زرتگ ات-

گل ءِ جارکش جیئند بلوچ ءَ گشتگ ات کہ تربت سیٹلائیٹ ٹاؤن ءَ اُرش کتگ ءُ اود ءَ پاکستانی پوج ءِ شش کمکار کشتگ اَنت-

جارکش ءَ گوشتگ ات کہ پاکستانی پوج ءِ بازیں کمکار تربت سیٹلائیٹ ٹاؤن ءَ یک لوگے ءَ جھمنندی بیتگ اَنت ءُ آیاں وتی رنگ بدل کتگ ءُ کار ءَ بیتگ اَنت – اے مردم تربت ءَ پوجی بنجل ءَ روگ ءُ آیگ ءَ گندگ بیتگ اَنت-

آئی ءَ گوشتگ ات کہ اے مردماں وتی دروشم مٹ کتگ ءُ زورگریں پاکستانی پوج ءِ واستا کار ءَ بیتگ ءُ دشمن ءِ پرکاریانی گون ءَ ھوار بیتگ اَنت کہ ایشاں نام گپتیں ڈیتھ اسکواڈ ءِ مردماں لوگ ءُ بنجل داتگ اَنت-