بلوچستان نیشنل پارٹی ءِ لانگ مارچ
ٹی بی پی شونگال
ھزدار ءِ ھنکین وڈھ ءَ بازیں ماھاں سردار مینگل ءُ بلوچستان نیشنل پارٹی ءِ سروک اختر مینگل ءُ شفیق مینگل ءِ ٹولیاں یک دومیگ ءِ ھلاپ ءَ سنگر گپتگ اَنت، بی این پی یکشل ءَ ٹاہ دیگ ءَ اِنت کہ شفیق مینگل ڈیٹھ اسکواڈ جُنزینگ ءَ اِنت ءُ آئی ءَ ریاستی مستری گون اِنت کہ ایشی ءِ ھلاپ ءَ بلوچستان نیشنل پارٹی مینگل ءَ لانگ مارچ ءِ جار جتگ۔
بیست ءُ دو اکتوبر ءَ بلوچستان نیشنل پارٹی سردار اختر مینگل ءِ سروکی ءَ چہ وڈھ ءَ لانگ مارچ ءَ بندات کنت کہ آ ھزدار، کلات، سوراب ءُ مستونگ ءَ گوزان بیت داں شال ءَ سربیت ءُ ھاکی چار راہ ءِ سر ءَ بی این پی مُچی ءِ اڈ دنت ءُ دیمتری کارشونانی جار ءَ جنت۔ یات بہ بیت کہ دسمبر دو ھزار ءُ شش ءَ ھم سردار اختر مینگل ءَ گوادر ءَ بگر داں شال ءَ لشکر بلوچستان نامی ئیں لانگ مارچے ءِ جار جتگ اَت۔ چہ آ روانک ءَ پیسر آ دزگیر کنگ ءُ داں یک سالے ءَ گیش زندانی کنگ بیتگ اَت ءُ چہ بلوچستان ءِ زیدر ءَ ڈن دور دیگ بوتگ اَت۔
بلوچستان نیشنل پارٹی ءِ لانگ مارچ ءِ جار ءَ پد بلوچستان ءِ سرکار ءَ شال ءَ دفعہ 144 جتگ، ایشی ءِ سر ءَ سردار اختر مینگل ءِ گشگ اِنت کہ ریاست پُرایمنیں روانک (مارچ) ءِ ھلاس کنگ لوٹ ایت، سرپانکیں سرکار ءِ تھ ئِے کارانی وزیر سرفراز بگٹی وت گمانی پئیم ڈیرہ بگٹی ءَ شفیق مینگل ءِ پئیمیں ڈیتھ اسکواڈے جُنزینگ ءَ اِنت، سرفراز بگٹی ریاستی ادارگانی مستری ءَ امن لشکر ءِ نام ءَ گوں ڈیرہ بگٹی ءَ ٹولی ءِ جُنزینگ ءَ اِنت۔
سرپانکیں سرکار ءِ آیگ ءَ پد بلوچستان ءَ زورانسری بیگواھیانی تہ ءَ گیشی اتکگ ءُ چہ پیسر ءَ ناگیگیں جاور گنتر بیتگ اَنت۔ ڈیتھ اسکواڈانی کُشت ءُ کوشاں چہ سرجمیں بلوچستان سانمند اِنت، بی این پی مینگل لوٹ ایت کہ تھنا وڈھ ءَ بندوک مہ بیت بلکیں سرجمیں بلوچستان ءَ برجاھیں ڈیتھ اسکواڈانی ھلاسی ءِ ھاتر ءَ سیاسی زرمبشت بہ جُنزین ایت۔ سرپانکیں سرکار وڈھ اَڑ ءُ کُڑ ءِ گیواری ءُ ڈیٹھ اسکواڈانی ھلاس کنگ ءَ ابید پُرایمنیں زھرشانیانی دارگ ءِ کوشست کنگ ءُ شفیق مینگل ءِ مستری بلوچستان ءِ جاورانی گیشتر ناگیگیانی سوب جوڑ بیت اِنت ۔