کازی یاتگاری اکیڈمی ءِ نام مٹ کنگ ءُ ” مبارک کازی اکیڈمی” کنگ بوتگ

مروچی بیست ءُ دو اکتوبر ءَ یکشمبے ءِ روچ ءَ نامداریں لبزانت ءُ شائر منیر مومن ءِ سروکی ءَ مبارک کازی اکیڈمی ءِ اگدہ دار، کازی ءِ نزیکیں سنگت ءُ بلوچ شائراں مبارک کازی ہاؤس ءَ گند ءُ نند کتگ –

درسانی منگ ءَ پد کازی یاتگاری اکیڈمی ءِ نام مٹ کنگ ءُ مبارک کازی اکیڈمی کنگ بوتگ، پسنی زیرو پوائنٹ مبارک کازی ءِ بُت ءِ جوڈ کنگ ءِ تیاری، مبارک کازی میوزم ءُ آئی نوکیں کتابانی چاپ ءُشنگ ءُ ایدگہ چیزانی سر ءَ شور ءُ سلاہ کنگ بوتگ –

ھمے میان ءَ درسانی منگ ءَ پد اے ھم پیسلہ کنگ بوتگ مبارک کازی اکیڈمی ءِ جتا جتائیں بنگپانی کمیٹی اڈ دیگ بنت – لبزانکی گل ازم آزمان پسنی نیمگ ءَ نمیرانیں شائر مبارک کازی یات ءَ بیست ءُھشت اکتوبر ءَ لبزانکی مراگش ءِ برجم دارگ ءِ شور کنگ بوتگ –

دیوان ءَ مبارک کازی ءِ گاریں شئیرانء ھاتر ءَ پنچ باسکی کمیٹی ءِ اڈ دیگ بوتگ کہ آیانی تہ ءَبلوچ شائر امجد رحیم، ارشاد پرواز، اسحاق خاموش، عارف عزیز ءُ عابد علیم ھوار انت کہ آ بلوچ ازمکاراں گوں رھوت کن انت ءُ گاریں شیراں شوھاز کن انت ءُ مبارک کازی اکیڈمی ءِ دست ءَ دئینت –

گڈسر ءَ نامداریں بلوچ لبزانت ءُ شائر منیر مومن ءَ گوشتگ کہ مبارک کازی یک راجی شائر ءِ بوتگ – ھدامرزی مبارک کازی پہ ھر یک بلوچ ءِ شرپ یے –

آئی ءَ گوشتگ کہ مبارک کازی اکیڈمی ءُ ایندگہ چیزانی سر ءَ ھر کس ءَ اعتراز ءِ بیت گڈا آ مبارک کازی اکیڈمی ءِ واکداراں گوں رھوت کت کن انت –