بلوچستان ءِ شھر ھب ، منگچر ءُ ھُزدار ءَ تیرگواری ءُ کارچ جنی ءِ وئیل ءَ سے مردم بیران بیتگ اَنت-
گیشیں ھالانی رِد ءَ ھب شھر ءَ سلاہ بندیں مردمانی تیرگواری ءَ چہ یک مردمے بیران بیتگ لاش نادُراھجاہ برگ بیتگ-
پولیس ءُ دمگ انگر ءَ کتگ ءُ اے درگت ءَ گوشگ بیگ ءَ اِنت ھب شھر ءِ دمگ اکرام کالونی گلشن لسبیلہ ڈائنو کالونی ءِ دمگ ءَ وتی لوگ دپ ءَ نندوکیں بیست سالی ئیں ورناہ ریحان مگسی سر ءَ دمک ءَ پتروکیں یک پرپٹے ءَ سوار دو سلاہ بندیں مردماں تیرگواری کتگ ءُ چریشی ءِ آسر ءَ آ سک ٹپی بیتگ ءُ زوت نادُراھجاہ ءَ برگ بیتگ کہ اود ءَ آئی ءَ ٹپانی درد نہ سگ اِتگ بیران بیتگ-
پولیس گوشگ رِد ءَ وئیل ءَ پد میاربارانی پٹ ءُ پول ءَ دمگ انگر ءَ کتگ وھدے کہ وئیل ءِ سبب ءِ زانگ ءِ جُھد کنگ اَنت-
ھمے وڑ منگچر ءِ دمگ خالق آباد ءَ تیرگواری ءِ وئیل ءَ چہ یک مردمے بیران بیتگ-
انتزامیہ رِد ءَ تیرگواری ءِ وئیل ءَ محمد ایوب ء عطاء محمد ٹک گوریزئی محمد حسنی بیران بیتگ – وئیل کوھنیں دُژمنی یے گوشگ بیگ ءَ اِنت-
ھُزدار ءَ ھوٹل واھنند کارچ جتگ ءُ کُشتگ- گیشیں ھالانی رِد ءَ ھُزدار ءَ کارچ ءَ چہ نشانگ کتگ ءُ یک ورنایے عطاءاللہ ء محمد اسماعیل جتک جھمنند قادر آباد کُشتگ-
آ یک ھوٹلے واھنندے بیتگ کہ کار ھلاس کتگ ءُ لوگ ءَ روگ ءَ بیتگ کہ میاربار ءَ آئی ءِ سر ءَ اُرش کتگ ءُ کارچ سر ءَ نشانگ کتگ ءُ سک ٹپی کتگ ءُ پد آئی ءَ ٹپانی درد نہ سگ اِتگ ءُ بیران بیتگ کوش ءِ بھتام ءَ پولیس ءَ چار مردم دزگیر کتگ ءُ پٹ پول بندات کتگ-