بساک ءِ نیمگ ءَ ماں کراچی ءَ “بلوچ لٹریسی کمیئن” نام ءَ وانگی مراگش

بلوچ اسٹوڈنٹس ایکشن کمیٹی کراچی ھنکین ءِ نیمگ ءَ “بلوچ لیٹریسی کیمپین” ءِ نام ءَ ماں لیاری ءَ مراگشے برجم دارگ بیتگ – مراگش ءِ گچینی مھمان گل ءِ بنجاھی ھالرسانی کارگُشاد اُزیر بلوچ ءُ بنجاھی کمیٹی ءِ باسک سلیم بلوچ بیتگ اَنت – اے مراگش چار بھر گُشتانک، کیریئر کاؤنسلنگ، ٹیبلو، بلوچ لیٹریسی کیمپین کتابک ءِ سرپدی تہ ءَ بیتگ – مراگش ءَ بلوچستان کتاب کاروان ءِ نام ءَ کتاب اسٹال ہم جنگ بیتگ –

ماں لیاری ءَ برجاہ دارگ بوتگیں وانگی مراگش ءِ بندات گوں راجی سوت ءَ کنگ بیتگ ءُ مراگش ءِ اولی بھر گُشتانک بیتگ کہ ایشی ءِ تہ ءَ بلوچ اسٹوڈنٹس ایکشن کمیٹی ءِ بُنجائی کمیٹی ءِ باسک سلیم بلوچ ءَ وانگ ءِ ارزشت ءُ لیاری ءِ وانگی ترام ءِ سرءَ تران کُتگ –

سلیم بلوچ ءَ تران کنان ءَ گُشتگ کہ وانگءِ مانا ءُ بزانت ءَ اگاں ما شریں وڈے ءَ بہ زانیں ءُ وانگ ءِ مول ءُ مراد ءَ سرپد بہ بہ ایں گڈا وانگ ءِ ارزشت ءَ زانت کنیں – وانگ ءِ مول ءُ مراد چاگرد ءِ گھتری ءِ ھاتر ءَ ورنایانی تربیت کنگ ءُ باسمائیں ءُ باشعوریں انسان جوڈ کنگ اِنت کہ آ چاگرد ءِ دیمروئی ءِ ھاتر ءَ کار کُت بہ کن اَنت- مئے بدبھتی اِنت کہ کراچی ءَ ما ھزاراں سال اِنت آباد ایں بلے کراچی ءِ سرجمیں سیاسی ءُ مالی نزام دگہ راجانی دست ءَ اِنت ءُ بلوچ کراچی ءِ تہ ءَ مرچی اکلیت ءِ تہ ءَ اتکگ – لیاری زیکیں وھد ءَ کسانیں یونان گوشگ بیتگ کہ اِد ءَ الم، لبزانک، سیاست، فلسفہ ءُ ایدگہ سرھالانی سرءَ مدام دیوان ءُ باوست کنگ بیتگ بلے مرچی بلوچ دُژمنیں تاگتاں لیاری ءِ پجار تھنا گوں پٹبال ءُ منشیات ءَ گوں بندوک کتگ-

بانُک اَسیلہ بلوچ ءَ زالبولانی وانگی نظام ءِ سر ءَ تران کنان ءَ گُشتگ کہ لیاری ءَ زالبول سکیں کسانیں کساسے ءَ پہ وانگ ءِ ھاتر ءَ در کاینت ایشی ءِ مستریں سوْب اِش اِنت کہ کراچی ءِ زالبول لھتیں گُپتمانانی رنگ ءَ چہ وانگ ءَ گِستا کنگ بیتگ اَنت ءُ ایشی ءَ چہ ابید بازیں پت وتی زھگ ءَ اے بنیات ءَ وانگ ءَ دیم نہ دیئنت کہ وانگ ءَ باندات ءُ مول نیست-

مراگش ءِ دومی بھر کیریئر کاؤنسلنگ بوتگ کہ آئی ءِ تہ ءَ سنگت عارف بلوچ ءَ جتائیں وانگی پِڈانی درگت ءَ نودربر سرپدی داتگ انت ءُ اِشانی ارزشت ءِ سر ءَ تران کُتگ ءُ گوْشتگ کہ وانگ تھنا ڈگری گرگ نہ اِنت کہ کسے ڈگری گِپت ءُ پہ نوکری ئے ءِ واستہ جھد کنت، بلکیں وانگ وتی بودانی درنگاز کنگ ءُ آیانی درگت ءَ کار کنگ اِنت-

مراگش ءِ سیمی بھر ٹیبلو بوتگ کہ بلوچ اسٹوڈنٹس ایکشن کمیٹی ءِ نیمگ ءَ چہ جوڈ کُتگیں ٹیبلو کہ لیاری ءِ وانگی ءُ چاگردی جیڑو پیشدارگ بوتگ انت –

مراگش ءَ اتکگیں مھمان حبیب حسن ءَ بساک کراچی ھنکین ءِ منت گپتگ ءُ اے وڈیں مراگشے اڈ دیگ ءِ ستا کت ءُ گوشتگ کہ کسے پیداگ بیتگ وانندہ ئے نہ بیتگ ءُ آئی چاگرد نا وانندہ بیتگ اے آئی ءِ میار نہ اِنت بلے کسے بہ مِریت ءُ انگت آئی ءِ چاگرد ناوانندگ اِنت گُڈا اد ءَ آ میاری اِنت کہ آئی ءَ پہ وتی چاگرد ءَ ھچ کُت نہ کُتگ- اے واستہ وانگی نہ اِنت کہ کسے نوکری بہ گِپت بلکیں پہ زانگ ءَ وانگی اِنت، ایوک ءَ وانگی نہ اِنت بلکنہ زانگی اِنت –

مراگش ءِ دیمی بھر بلوچ لیٹریسی کیمپین ءِ درنگازی بوتگ کہ آئی ءِ سر ءَ ھنکینی ھالرسانی کارگُشاد ءَ بلوچ لیٹریسی کیمپئن ءِ مولاں مھلوک ءِ دیم ءَ ایر کنگ –

مراگش ءِ گُڈسر ءَ بلوچ اسٹوڈنٹس ایکشن کمیٹی ءِ بنجاھی ھالرسانی کارگشاد اُزیر بلوچ ءَ تران کُتگ ءُ گوشتگ کہ مرچی وشی بیت کہ استاد سباء دشتیاری ءِ میتگ ءَ گل ءِ نیمگ ءَ چہ اے وڈیں مراگش اڈ دیگ بیتگ ءُ لیاری ءِ زھگانی وانگ ءُ زانگ ءُ چاگرد ءِ تہ ءَ آیانی کرد ءِ بابت ءَ گپ ءُ تران بیگ اِنت۔ لیاری کہ بلوچ راج ءِ پجار ءِ بھر اِنت مرچی جتائیں پندلاں چہ اد ءِ مردم ھر وڈیں بنیادتی آسراتیاں چہ زبھر کنگ بیتگ اَنت ءُ بدواھاں اے جھد کتگ کہ ادءِ مھلوک ءُ ورنا چہ بلوچ سیاست ءَ دیر بہ بنت بلے اینچو پندلاں پد ھم لیاری چہ بلوچ راجی سیاست ءَ نہ سِستگ-

آئی ءَ گوشتگ کہ ورنایاں وتی جھد گیشتر ترند کنگی اِنت ءُ اد ءَ راجی ادارہ مھکم کنگی اَنت داں بلوچ ورنا ءُ مھلوک دریں تاگتانی دست ءَ رد مہ کپیت –

آہی ءَ گُڈسر ءَ گوشتگ کہ ما اد ءِ استاد ءُ چاگردی جھدکارانی منت واریں کہ مئے ھمکوپگ اَنت ءُ اے وڈیں کاراں مئے کمک کنگ ءَ اَنت، مئے جھد بیت کہ لیاری ءِ ھرچ وانگجاھ ءُ میتگ ءَ ھمے وڈیں مراگش برجم بہ داریں دانکہ بلوچ زھگاں وتی ماتی زبان ءَ وانینگ ءِ سکین ءُ ورنایاں چاگرد ءَ گھتریں کار کنگ ءَ سکین بہ دئیں-

مراگش ءِ گدسر ءَ مراگش ءَ اتکگیں مھمان ءُ اُستاداں چہ بساک ءِ نیمگ ءَ بی ایل سی کتابک سوگات کنگ بیتگ ءُ مراگش ھلاس کنگ بیتگ –