روکپتی بلوچستان ءِ جتا جتائیں جاھاں شش کس بیگواہ

ھاش ءُ زاھدان ءَ ایرانی لشکر ءَ شش مردم آوار جنگ ءَ پد بیگواہ کتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھاں سَے مردم آوار جتگ ءُ بیگواہ کتگ اَنت-

چہ زاھدان ءَ سر بیتگیں اھوالانی رد ءَ آوار جنگ بیتگیں مردمانی پجار یاسر نھتانی، فضل احمد تیموری ءُ حمد اللہ علیزئی ءِ نام ءَ زانگ بیتگ-

اھوالانی رد ءَ اے مردم آدینگ ءِ روچ ءَ چیریں ادارھاں دزگیر کنگ ءَ پد بیگواہ کتگ اَنت-

ھمے وڑ ءَ روکپتی بلوچستان ءِ دمگ ھاش ءَ آوار جنگ بیتگیں مردمانی پجار عبدالواحد ، یحیٰ ءُ عثمان گمشاد زئی ءِ ناماں زانگ بیتگ اَنت-

اھوالانی رد ءَ عبدالواحد الخلیل مسیت ھاش ءِ انتزامیہ اِنت ءُ یحیٰ ءِ ھواری ءَ آوار جنگ بیتگ –

اھوالانی رد ءَ عثمان چہ ھاش ءَ آوار جنگ ءَ پد آ زاھدان ءَ برگ بیتگ –

زانگ بہ بیت روکپتی بلوچستان ءَ اے دو ھپتگانی توک ءَ کساس سد مردم ءِ کچ ءَ مردم آوار جنگ بیتگ اَنت کہ آیانی توک ءَ بیگواہ بیتگیں مردمانی اُمر چِل سال ءَ جھل ءُ ھژدہ سال ءَ برز ھمے میانی اُمری مردم ھوار اَنت-