روکپتی بلوچستان: زاھدان ءَ ھوار دگہ جاھاں جمعہ خونین ءِ یات ءَ روانک

روکپتی بلوچستان ءِ جتا جتائیں شھراں جمعہ خونین ءِ یات ءَ زھرشانی کنگ بیتگ ءُ مھلوک ءَ روانک ءَ بھر زرتگ-

زاھدان ءَ مولانا عبدالحمید ءِ گوشگ ءِ پژدر ءَ مھلوک ءَ نماز جمعہ ءَ پد بے تواری دروشم ءَ روانک کش اتگ-

ھمے وڑ ءَ روکپتی بلوچستان ءِ دمگ ھاش ءَ آدینگ ءِ نماز ءَ پد ھم مھلوک ءَ روانک کش اتگ-

روانک ءَ مھلوک ءَ بھر زرتگ ءُ اود ءَ مھلوک ءَ اوگام جتگ ءُ جمعہ خونین ءِ انساپ ءِ لوٹ کتگ –

ھمے وڑ ءَ پشین ءَ ھم مھلوک ءَ زھرشانی کتگ ءُ دگانی سر ءَ ٹائر مانداشتگ اَنت ءُ اود ءَ سرکار ءِ ھلاپ ءَ اوگام جتگ اَنت –

زھرشانی ءِ پژدر ءَ شھر ءِ سیکورٹی گیش کنگ ءُ ترند کنگ بیتگ – ھمے وڑ ءَ جالیک ءَ ھم زھرشانی کنگ بیتگ –

زانگ بہ بیت روکپتی بلوچستان ءَ ھمک آدینگ ءَ مھلوک زھرشانی کن اَنت کہ آیانی لوٹ اِنت اود ءَ جمعہ خونین ءَ سدانی کچ ءَ مردم کُشگ ءُ زدگ کنگ بیتگ اَنت-