چین سی پیک ءِ سر ءَ گیشی زر کاری ءَ ترسگ ءَ انت – رپورٹ

چین ءَ پاکستان ءِ تھ ئے مستریں پروجیکٹ پاک چائینہ ایکانومک کوریڈور بزاں سی پیک ءِ سر ءَ گیشیں زرکاری ءَ بند کتگ –

جاپان ءِ مالی رسانکدر نکی ایشیا ءِ رپورٹ ءِ رِد ءَ چین ءَ پھازگی ءُ سیاسی جاورھالانی ناگیگی ءِ ترس ءِ سوب ءَ بیلٹ اینڈ روڈ رِد ءَ پاکستان ءِ نوکتریں پروجیکٹ ءِ شور نہ منّ اِتگ انت –

دو اکتوبر ءَ شنگ بوتگیں اے رپورٹ ءِ تہ ءَ ھر دو ملکانی برزی ھم لسون ءَ بوتگیں گند ءُ نند ءِ سرشون دیگ بوتگ کہ آئی ءِ تہ ءَ ایش ھم ھست انت کہ چین سی پیک ءِ سر ءَ گیشیں زرکاری کنگ ءَ ترسگ ءَ انت، کہ آ بیلٹ اینڈ روڈ انیشیٹو ءِ رِد ءَ پنجاہ بلین ڈالر ءِ شور انت –

پاکستان ءِ شورانی تہ ءَ زورمندی، موسم ءِ بدلی، لین ءُ تر ءُ تابی ءِ وڑیں تکانی ھدبندی کنگ بوتگ بلے پد ءَ ھم بیچنگ ءَ اے رد کتگ انت –

رسانکدر ءِ رِد ءَ چینی واکداراں پاکستان ءِ نیمگ ءَ گوشگ بوتگیں اے گپ کہ گوادر ءِ زِر ءِ لین ءَ گوں کراچی ءَ بندوک کنگ ءِ شور ھم رد کتگ، ایشی ءَ ابید چین ءَ اسلام آباد لاچار کتگ کہ گوادر ءَ سَے سد میگاواٹ پاور پلانٹ ءَ برجاہ بہ داریت، کہ پاکستان ءِ ارادہ بوتگ آئی ءَ چہ گوادر ءَ در بہ کنت –

نکی ایشیا ءِ رِد ءَ اپریل دوھزار ءُ بیست ءُ دو ءَ پاکستان ءِ مزن وزیر در کنگ ءُ بلوچستان ءَ چین ءِ مپادانی سر ءَ گیشیں اُرش ءُ ملک ءِ تہ ءَ سیاسی جاورھالانی ناگیگی سوب ءَ چین سی پیک ءِ سر ءَ نوں گیشتر زرکاری کت نہ کنت –

اے درگت ءَ ایس راجارتنم اسکول آف انٹرنیشنل اسٹڈیز ءِ جیمز ایم ڈور سی ءَ نکی ایشیا ءِ گون ءَ تران کنان ءَ چین ءِ مپاداتانی سر ءَ ھمے زوتاں بوتگیں اُرشانی سر ءَ چمشانک داتگ ءُ گوشتگ کہ بیچنگ ھمے ترس انت کہ آ وتی مڈی ءُ پروجیکٹ ءِ سر ءَ کار کنوکیں مردم ھترہ ءِ توک ءَ انت –

زانگ بہ بیت اگست ءِ ماہ ءَ گوادر ءِ تہ ءَ چینی انجینئرانی کاروان ءِ سر ءَ بی ایل اے مجید برگیڈ ءَ اُرش ءِ کتگ ات اے اُرش ءَ بازینے مرتگ ات کہ آیانی تہ ءَ چینی ھم ھوار ات اَنت –

ھمے سال ءِ اگست ماہ ءَ بوتگیں اے اُرش ءَ پد بی ایل اے ءَ وتی درشانے ءِ تہ ءَ چین نود روچ ءِ مھلت داتگ ات کہ چین چہ بلوچستان ءَ در بہ ایت ءُ آئی ءَ وتی اُرشانی تہ ءَ گیشی آرگ بیھار ھم داتگ ات –

وھدیکہ بی ایل اے ءِ سروک بشیر زیب ءَ وتی تامری کلوہ ءِ تہ ءَ چین ءَ ھوار ایندگہ ڈیھ دلگوش گور کتگ ات انت کہ بلوچستان ءِ تہ ءَ زرکاری مہ کن انت –

یکشلیں بیھار ءُ بی ایل اے ءِ مکن کنگ ءِ پژدر ءَ سی پیک ءِ سر ءَ چین ءِ گیشیں زرکاری ترس وتی کارمندانی سلامتی ترس گندگ آیگ ءَ انت –