نیشنل ڈیموکریٹک پارٹی ءِ جارکش ءَ پنچ اکتوبر ءَ میان اُستمانی روچ ءِ درگت ءَ شنگ کتگیں درشان ءِ تہ ءَ گْوشتگ کہ چاگرد ءَ استاد ءِ کرد باز ارزشت دار اِیت – بیست ءُ یکّمی کرن ءَ زانشتی پڑ ءَ دیمروئی کنگ ءَ اَبید ھچ راج دیمروئی کتگیں راجاں ھوار بیت نہ کنت ءَ اے پڑ ءَ ھمگرنچ سرین ھڑ ءِ بیستار ءَ داروکیں استاد اَنت کہ آؤکیں باندات ءِ زھگاں سما رودینت ھمے استاداں دروت ندر کنگ ءِ ھاتر ءَ یونیسیف ءُ یونیسکو ءِ نیمگ ءَ چہ نونزدہ سد نَود چار پنچ اکتوبر ءَ چہ استادانی روچ ایر کنگ بیتگ آ روچ ءَ بگر تاں مروچی سرجمیں جھان ءَ استاد دروت ندر کنگ بنت، آیانی جُھد ستا شان اَنت ءُ آیانی زندمان ءَ دیم ءَ کپتگیں جنجالانی کُٹینگ ءِ ھاتر ءَ گپ ءُ رپ کنگ بیت-
جارکش ءَ گْوشتگ کہ بلوچستان ءَ بے کساس استاد اَنت کہ آیاں ناں تھنا نودربر زانشتی ءَ چہ جوڑ کتگ اَنت بلکیں راجی شئور ءُ زانت دیگ ءِ ھاتر ءَ ھم بلوچ نودربرانی رھشونک کتگ- مروچی پنچ اکتوبر ءَ بلوچ نیشلزم ءِ استاد نواب خیر بخش مری ، شھید صبا دشتیاری ، پروفیسر رزاق ، زاھد آسکانی ، نزیر مری ، پروفیسر اشرف بلوچ ، شھید ماسٹر بیت اللہ ءَ ھوار اے سرجمیں استاداں دروت ندر کن ایں کہ آیاں وتی زندمان راج جُھدکاری رھشونی ءَ ندر کتگ ءُ نودربراں یک نوکیں زانشتی ءِ ھمراھی ءَ راجی شئور ءُ زانت ودینگ ءِ ھاتر ءَ کرد پیلو کتگ ءُ گَڈی ساہ ءَ تاں بلوچ ڈیھ ءِ وپاداری ءِ کرد پیلو کتگ –
جارکش ءَ دیمتر ءَ گْوشتگ کہ بلوچستان ءَ استادانی زندمان انچیں اڑ ءُ جنجالاں گوازیگ بیت ھاسکار ھما استادانی واستا آیاں راجی زانت ءِ کندیل ءِ روک کنگ ءِ کرد پیلو کتگ-انچیں استادانی زندمان ناں تھنا جنجلانی دیمپانی کتگ بلکیں آیانی زندمان ءَ زورانسری آوار جنی ءُ تیرانی نشانگ ءِ دروشم ءَ اسر کتگ اَنت- بلوچ استادانی سر ءَ پرز بیت کہ ناں تھنا زانشت ءِ پڑ ءَ نودربرانی رھشونی بکنت بلکیں آؤکیں بانداتاں راجی جیڑھاں چہ سرپد کنگ ءَ زانت ءُ شئوری سلاہ بند بکن اَنت تاں ھمے نودربر بیست یکّمی کرن لوٹانی پُژدر ءَ بچار اَنت دیمروئی راجانی دیم پہ دیمی کنگ ءِ ھمراھی ءَ راجی رھشونی ءِ ھاتر ءَ آں وتی کرد ءَ پیلو کُت بکن اَنت-