مبارک کازی ءِ شائری پارسی ءِ تہ ءَ رجانک کنگ بیت انت – ڈائریکٹر خانہ فرہنگ ایران

ڈائریکٹر آف کلچر بلوچستان ءِ چیردستی ءَ بلوچی زبان ءِ نامداری شائر مبارک کازی ءِ ستک شانی ندر کنگ ءِ ھاتر ءَ ماں نوری نصیر خان کلچر کمپلکس دیوان ءِ برجم دارگ بوتگ –

مراگش ءِ بندات گوں کران وانی ءَ بوتگ کہ ڈپٹی ڈائریکٹر خدا رحیم ءَ تلاوت کتگ ءُ عمر فاروق ءَ مبارک کازی ءُ مستونگ ءِ وئیل ءَ نمیران بوتگیں مردمانی روھ ءِ آسودگی ءَ دوا لوٹ اِتگ – اے دیوان ءَ بلوچی زبان ءُ لبزانک ءِ نامداریں مردماں ھوار فرہنگ ایران ءِ ڈائریکٹر ابولحسن میری ءَ ھم بھر زرتگ ءُ مبارک کازی ءِ پہ بلوچی زبان ءُ لبزانک ءَ داتگیں ھزمتانی ستاہ کتگ ءُ گوشتگ کہ آ تھنا بلوچستان ءَ ناکہ ایران ءِ تہ ءَ زانگ بیت انت –

آئی ءَ خانہ ءِ فرہنگ ءِ نیمگ ءَ مبارک کازی ءِ شئیرانی ماں بلوچی تہ ءَ رجانک کنگ ءُ ھمے زوتاں بلوچی، براہوئی ءُ پشتو زبان ءَ مراگشانی اڈ دیگ ءِ وش ھبری داتگ –

ایران ءِ تھئیر فیسٹیول ءَ ڈائریکٹوریٹ آف کلچر بلوچستان ءِ نیمگ ءَ تھیٹر ازمکارانی بھر زورگ وشی ءِ درانگاز اِتگ، سیکٹریری کلچر منظور حسین ءَ تران کنان ءَ مبارک کازی دروت ندر کتگ ءُ گوشتگ کہ ما اے گرانیں ساھتاں آئی ءِ کھول ءِ گمانی شریدار ایں – آئی ءَ گوشتگ کہ مبارک کازی ءِ پگر ءُ ھیال آئی ءَ بلاھیں شائرے کن انت –

مراگش ءَ ڈاکٹر رحیم بخش مہر، ڈاکٹر زینت ثنا بلوچ، ممتاز یوسف، افضل مراد، ڈاکٹر قیوم بیدار، ڈاکٹر زاہد دشتی، عبدالحکیم مینگل ءُ بانک صورت بلوچ ءَ مبارک کازی ءِ زند ءُ ازم ءِ سر ءَ وتی ھیال در شان اِتگ انت –

مراگش ءَ گوستگیں ڈائریکٹر داؤد ترین ھم ھوار بوتگ ءُ مراگش ءَ نودربراں گوں وشیں توار ءَ مبارک ءِ شئیر الھان کتگ انت –