پنجگور ءُ کاٹھور ءَ نمیرانیں مبارک کازی ءِ یات ءَ مراگش ءُ روانک

بلوچستان ءِ دمگ پنجگور ھوار کراچی ءِ دمگ کاٹھور ءَ بلوچی زبان ءِ نامداریں آشوبی ءُ مھری شائر نمیرانیں مبارک کازی ءِ یات ءَ مراگش برجم دارگ ءُ روانک کشگ بوتگ ، دومی نیمگ ءَ بالیچہ ءَ مبارک کازی ءِ یات ءَ دیوانے ءِ برجم دارگ ءِ جار جنگ بوتگ –

ماں پنجگور بلوچ اسٹوڈنٹس ایکشن کمیٹی پنجگور ڈگری کالج ءِ بنزہ ءِ نیمگ ءَ نمیرانیں مبارک کازی ءِ یات ءَ مراگشے برجم دارگ بیتگ، کہ اودا مردماں نمیرانیں مبارک کازی ءِ زند ءُ ازم ءِ سر ءَ تران کُتگ-

اے مراگش چار بھرانی تہ ءَ بوتگ کہ گشتانک، شائری، کتاب، سازءُ زیملی دیوان ءُ کتاب میڑہ ھوار بوتگ اَنت-

مراگش نمیرانیں مبارک کازی ءِ یات ءَ دو دمان بے تواری ءَ پد بندات کنگ بوتگ ءُ چریشی ءَ پد مبارک ءِ زند، ازم، شائری تکانی سر ءَ مصدق بلوچ ،پیرجان بلوچ، گمشاد بلوچ ءُ ملا مراد ءَ تران کتگ –

مراگش ءِ دومی بھر شائری بوتگ کہ نودربراں مبارک کازی ءِ شئیر ونتگ اَنت ءُ آئی ءِ پگر ءُ پلپسہ دیم ءَ آورتگ-

مراگش ءَ بلوچستان کتاب کاروان ءِ نام ءَ کتاب میڑہ ھم اڈ دیگ بوتگ کہ اود ءَ بلوچستان، بندپتر، سیاست، لبزانک، سائنس ءُ ایدگہ سرھالاں بندوکیں کتاب ایر کنگ بوتگ اَنت – کتاب میڑہ ءَ گل ءِ تاکبند نوْشت، زھگانی تاک گام ءُ بلوچ لٹریسی کیمپئن ءِ کتابُک ھم ایر کنگ بوتگ انت –

کتابی میڑہ ءَ استاد ءُ نودربراں اسٹال سیل کرتگ ءُ وتی دوستیگیں کتاب پہ وانگءَ زُرتگ اَنت –

مراگش ءِ گڈی بھر ساز ءُ زیملی دیوان ءِ بوتگ کہ آئی ءِ تہ ءَ نادر بلوچ، مسرور بلوچ ءُ کلیم اللہ بلوچ ءَ مبارک کازی شئیر گوں وتی وشیں توار ءَ الھان کرتگ اَنت ءُ رند ءَ مراگش آسر کنگ بوتگ –

ھمے وڈ کراچی ءِ دمگ کاٹھور ءَ ھم مروچی سے شمبے ءِ روچ ءَ آشوبی لچہ کار نمیرانیں مبارک کازی ءِ یات ءَ روانکے کشگ بوتگ – روانک ءَ بلوچی زبان ءِ شائر، سیاسی ءُ چاگردی کارکن، زھگ ءُ جنیناں مزنیں کچے ءَ بھر زرتگ –

مردماں مبارک کازی ءِ اکس ءُ بلوچستان ءِ آدگہ نمیرانی مردمانی اکس ایر کرتگ اَنت ءُ اکسانی سر ءَ پل ریتکگ ءُ اکسانی دیم ءَ ڈیوا بالینتگ ءُآ ستک شانی ندر کرتگ انت –

دیوان ءَ کران وانگ ءُ پہ نمیرانیں مبارک کازی ءُ آدگہ شھیدانی ارواہ ءَ دوا لوٹگ بوتگ ءُ پدا رند ءَ مبارک کازی ءِ شئیر وشگٹی ءَ الھان کنگ بوتگ انت –

دیوان ءَ اسد مراد ءَ نمیرانیں مبارک کازی ءِ زند ءُ شائری ءِ کتابانی سر ءَ چمشانک داتگ۔

کادر بکش کلمتی ءُ اکبال ھاشمی ءَ نمیرانیں مبارک کازی ءِ زند ءُ آئی شائری ءِ سر ءَ شریں وڑے ءَ تران کرتگ ءُ وتی ھیال درشان کرتگ اَنت۔

رند ءَ سیپ کریم ءَ نمیرانیں مبارک کازی ءِ پربند ءُ شاھنواز کلمتی ءُ رھمت ءَ رزا ءَ وتی شئیر ونتگ اَنت –

دومی نیمگ ءَ باند ءَ بزاں پنچ اکتوبر ءِ بیگاھے ادار سَے ءَ ماں تمپ ءِ دمگ بالیچہ ءِ وانگجاہ ءَ مبارک کازی ءِ یات ءَ دیوانے برجم دارگءِ جار جنگ بوتگ-

جار ءِ تہ ءَ گوشگ بوتگ کہ دیوان ءَ ڈاکٹر غفور شار، ارشاد پرواز، فضل، خلیل تگرانی، عارف عزیز، مقبول ناسر، ظفر اکبر، ازگر مھرم، اھد الاھی، ابد ھلیم ءُ دگہ شائر ءُ ادیب بھر زور اَنت –

جار ءِ رِد ءَ اے دیوان ءَ کواس ءُ زانتکار نمیرانیں مبارک کازی ءِ زند ءُ ازم ءِ سر ءَ تران کن اَنت ءُ لچہ کار وتی شئیر وان اَنت – چہ مردماں لوٹ کنگ بوتگ کہ اے دیوان ءَ بھر بہ زور انت –