بلوچستان ءِ تیاب دپی دمگ گوادر گنز ءَ نمیرانیں مبارک کازی ءِ یات ءَ روانک کشگ ءُ مراگش ءِ برجم دارگ بوتگ، ءُ اے مراگش ءَ گنز لس کتاب جاہ ءِ نام مٹ کنگ بوتگ ءُ “مبارک کازی لس کتاب جاہ گنز ” ایر کنگ بوتگ –
گنز انسٹیٹیوٹ آف سوشل سروسز (گِس) ءِ چیر دستی ءَ گوستگیں روچ ءَ بزاں یک اکتوبر دوھزار ءُ بیست ءُ سَے ءَ بلوچی زبان ءِ نامداریں شائر نمیرانیں مبارک کازی ءِ یات ءَ روانک ءِ کشگ بوتگ ءُ پدا آئی ءِ اکس ایرکنگ ءُ چراگ بالینگ بوتگ –
اے روانک ھاجی چاپڑی ءَ بندات کنگ بوتگ ءُ مردماں اوگام جنان ءَ کمیونٹی سنٹر ءَ شتگ ءُ آسر کتگ پدا ھمودا مبارک کازی ءِ یات ءَ چراگ بالینگ بوتگ انت ءُ مراگش بندات کنگ بوتگ کہ اودا مبارک کازی ءِ شئیر دپگال کنگ بوتگ ءُ آ دروت ندر کتگ –
گِس ءِ سر کماش انجینئر سمیع ءَ مراگش ءِ میان ءَ گنز لس کتاب جاہ ءِ نام مٹ کنگ کنگ ءُ مبارک کازی لس کتابجاہ گنز ایر کنگ ءِ منگ نامہ داتگ کہ مراگش ءَ ساڑی ایں مردماں منگ نامہ من اِتگ ءُ نام مٹ کتگ –
زانگ بہ بیت مبارک کازی ءِ نمیرانی ءَ پد بازیں جاہ ءُ چار راھانی نام مباک ءِ نام ءَ نامینگ بوتگ انت، بلے اے وھدی اولی رند انت کہ یک کتاب جاھے ءِ نام ھم ھمائی ءَ نام ءَ نامینگ بوتگ –
مردمانی ھم ھمے گوشگ انت کہ مبارک کازی ءِ پہ بلوچی زبان ءُ لبزانک ءِ ھاتر ءَ آئی ءِ بلاھیں کرد ءِ ھست، ءُ آئی ءِ اے کردانی سر ءَ چاران ءُ کتاب جاہ ءُ دگہ زانشتی ادارھانی نام ءَ گوں آئی ءَ نامینگ جوانیں گامگیج یے –