بلوچستان اکیڈمی تربت ءِ ھمک ماھی دیوان برجم دارگ بوتگ

کیچ ءِ بنجاھی شھر تربت ءَ مروچی بزاں یک اکتوبر دوھزار ءُ بیست ءُ سَے بلوچستان اکیڈمی ءِ ھمک ماھی لبزانکی دیوان ماں اکیڈمی ءِ بنجاھی کارگس ءَ برجم دارگ بوتگ – اے دیوان بلوچی زبان ءِ نمیرانیں شائر مبارک قاضی ءِ نام ءَ برجاہ دارگ بوتگ – اے دیوان ءِ پاگواجہ ڈاکٹر غفور شاد ءُ گچینی مھمان غنی پرواز ءُ واجہ یوسف عزیز گچکی بوتگ انت –

اے دیوان دو بھر ءَ بزاں شائری ءُ ردانکی ءَ بوتگ ،ردانکی بھر ءِ سرجمیں نبشتانک مبارک قاضی ءِ درگت ءَ بوتگ انت –

دیوان ءَ مقبول ناصر ءَ تران کنان ءَ گشت کہ مبارک قاضی بلوچ ءِ subconsciousness انت – قاضی کدی کدی ملا فاضل ءِ وڈا شئیر ءِ گڈ سرا وتی پنتاں ازمی رنگ ءَ وتی راج ءَ سر کنت –

فضل بلوچ ءَ تران کنان ءَ گشت قاضی nonconformist شائرے ،قاضی ءَ ازمی رنگ ءَ ہر زوراکی ءِ بابت ءَ آواز چست کتگ۔
آیانی گوشگ ات کہ قاضی ھر ھلک و کوچگ ءِ شائر انت ،قاضی ءَ دیوان ءَ گپ گپ ءِ تہ ءَ شئیر نبشتہ کتگ –

بلوچستان اکیڈمی ءِ چیئرمین ڈاکٹر غفور شاد ءَ تران کنان ءَ گشت کہ قاضی ءَ وتی توار لوگ لوگ ءَ، کنڈ کنڈ ءَ سر کتگ – ھر پیر ورنا ،گوانڈو ءَ زانت مبارک قاضی شائرے – شاد ءَ تران کنان ءَ گشت کہ بلوچی شائری ءَ وت یک ربیتے است۔شئیر تھنا کتابی فارمولایانی حساب ءَ چارگ مہ بیت۔بلکیں ھمے شئیری ربیت اوں زانگی انت ھر شئیر ءَ وت ءَ تاریکے است ، تھزیبے است، ھر شئیر ءِ پرریچگ ھم ارزان نہ انت قاضی ہر بلوچ ءِ شائر انت۔ آئی ءِ گورا رسانک ءِ جتائیں ھنرے بوتگ،ھرکس قاضی ءَ پہمیت –

یوسف عزیز ءَ گشت کہ قاضی ءَ درد نبشتہ کتگ ۔ھما قاضی ءِ درشانداب انچوش ات کہ قاضی ءَ لبزانی ھاجت نیست ات، بلکیں لبز وت تچان اتاں کہ مارا نبشتہ بکن –

دیوان ءِ گڈسر ءَ پروپیسر غنی پرواز ءَ تران کت ءُ گشت کہ قاضی ءَ جتا جتائیں ٹیکنیکانی سرا شئیر گشتگ ،شئیرانی تہ ءَ وتن دوستی، گلزمین ءِ دوستی، انسان دوستی گندگ بیت –

دیوان ءِ دومی بھر شائری بوتگ کہ عارف عزیز ، منوار علی رٹہ ءُ دگہ ورنایاں وتی شئیر ونت انت –

اے دیوان ءَ بلوچستان اکیڈمی ءِ لس کارگشاد شگراللہ ، مقبول ناصر ، سغیر احمد، عبید شاد، جمال منظور، جمال پیر محمد ءُ راشد حسرت ھم ساڑی بوتگ انت-
بلوچستان اکیڈمی ءِ کماش ڈاکٹر غفورشاد ءَ گڈسرا دیوان ءِ منت گپت ءُ دیوان ءِ آسری ءِ جار جت –