کراچی، مستونگ ءُ سبی ءَ یک ورنایے وتکشی کتگ ءُ دو مردم تیرگواری ءِ نشانگ کنگ بیتگ-
گیشیں ھالانی رِد ءَ مستونگ ءَ ناشناسیں سلاہ بندیں پرپٹ سواریں مردماں تیرگواری کتگ ءُ یک ورنایے کُشتگ ءُ آئی ءِ نام جمیل نام ءَ چہ بیتگ-
پولیس ءَ لاش وتی دستیگ کتگ گیشیں پٹ ءُ پول بندات کتگ کوش سوب زانگ نہ بیتگ-
ھمے وڑ کراچی ءَ بلوچستان ءِ دمگ ڈیرہ بگٹی ءِ جھمنند بلوچی زبان ءِ شائر مسک علی بگٹی ءِ چُک محمد نیاز بگٹی دو ناشناسیں سلاہ بندیں پرپٹ سواریں مردماں چست کتگ ءُ پد ءَ آ کُشتگ لاش دور داتگ-
زانگ بہ بیت نیاز بگٹی دوھزار شش ءِ جنگ ءَ پاکستانی پوج ءِ ھمکروچی زرواکیاں آیاں لڑ ءُ بار کتگ کراچی ءَ اتکگ ءُ جھمنند بیتگ اَنت اشی ءَ پد ڈیرہ بگٹی ءَ پاکستانی پوج بلوچی زبان ءِ شائر مسک علی بگٹی شھید کتگ-
ھمے وڑ سبی ءَ لوگ جیڑھانی سر ءَ ورنایے ءَ وتکشی کتگ- گیشیں ھالانی رِد ءَ لوگ جیڑھانی سبب ءَ راجہ موندارانی ءِ چُک ءَ وتکشی کتگ-
زانگ بہ بیت سرجمیں بلوچستان ءَ وتکشی ءِ دْرچ یکشلہ برجاہ ءَ اِنت- گوستگیں چار ھپتگانی تہ ءَ وتکشی ءِ اے دھمی وئیل اِنت اشی ءَ ساری گوادر ، ھُزدار ، آواران ، ھب چوکی ءُ شال ءَ ھم وتکشی ءِ ھال دی بلوچستان پوسٹ سر بیتگ اَنت-