مستونگ ءِ اندوھناکیں وئیل
ٹی بی پی شونگال
بیست ءُ نُھ ستمبر ءَ مستونگ ءَ یک اندوھناکیں (المناک) وئیلے ات، ائید میلاد النبی ءِ مُچی ءِ سر ءَ الفلاح مسیت ءِ نزیک ءَ یک وتکُشیں تراکے کنگ بیت کہ اِیشی ءِ تہ ءَ پنجاہ ءَ گیشتر مردم بیران بیتگ انت ءُ چِل مردم ءَ گیش ٹپیگ اَنت، بیرانیانی تہ ءَ گیشی ءِ تُرس ھست اِنت پرچاکہ اُرش ءَ ٹپی بیتگیں بازیں مردمانی جاور ھال باز نگیگ اَنت۔ بلوچ کواسانی گْوشگ اِنت کہ بلوچ آجوئی ءِ جُنز ءَ ھلاس کنگ ءِ ھاتر ءَ پاکستانی پوج ءَ بلوچستان ءِ تہ ءَ نیکراھی ناشرکاری ءِ توم کِشتگ ءُ ایشاں مھکم کنگ ءُ تالان کنگ ءِ کوشست کنگ ءَ اِنت۔
بلوچ کواس ءُ ناشرکاری ءِ بگیریں پریس کار یکشل ءَ گوں ھمے تُرس ءِ درشان ءَ کنگ ءَ اَنت کہ نیکراھی ناشرکارانی رودینگ ءَ چہ بلوچ جنگ ءِ راہ دارگ بیت نہ کنت بلے چہ اے پالیسیاں سرجمیں دمگ سانمند بیت اِنت۔
پاکستان گمانی دروشم ءَ نیکراھی ناشرکارانی ھما توم ءَ کہ بلوچستان ءُ پشتون سرڈگار ءِ سر ءَ کِشگ ءَ اِنت آئی ءِ سان پاکستان ءِ سر ءَ ھم کپ اَنت۔ پاکستانی ریاست ءِ نیمگ ءَ نیکراہ ءَ ایردستیں راجانی بگیر ءَ سلاہ ءِ پئیم ءَ کارمرز کنگ ءِ شوربندیاں انچیں جاور ودی کُتگ اَنت کہ چریشی ءَ بلوچستان ءِ تہ ءَ ترندیں نیکراھی ناشرکاری ودگ ءَ اَنت۔
مستونگ مزنیں وھدے ءَ چہ نیکراھی ناشرکارانی بنجاہ جوڑ بیان اِنت۔ چہ اے وئیل ءَ پیش دوھزار ءُ ھژدہ ءَ یک وتکُشیں تراکے ءِ تہ ءَ دو سد ءَ گیش مردم بیران بیتگ اِت اَنت۔ ھزارہ برادری ءِ سر ءَ یکشلی ءَ گوں اے دمگانی تہ ءَ اُرش کنگ بیتگ اَنت۔ ریاست اے ارشاں گوں دگہ ڈیھاں بندگ ءَ گوں چُشیں اندوھناکیں وئیلانی سان ءَ ھلاس کنگ ءِ کوشست کنت ءُ پد ءَ لھتیں وھد ءَ رند دروگیں پولیس میڑانی تہ ءَ زورانسری بیگواھیں کُش ایت ءُ اُرشانی بھتام ءَ آیانی سر ءَ لڈ اِیت۔
بلوچ جنگ ءِ ھلاس کنگ ءِ ھاتر ءَ ریاست ءِ برجاھیں شوربندیاں بلوچستان ءِ تہ ءَ سیاسی ادارگ نزور کُتگ اَنت، چریشی ءِ سوب ءَ نیکراھی ناشرکاری ءِ دارگ ءِ ھاتر ءَ مھکمیں سیاسی تاکتے نیست اِنت، اے جاورانی تہ ءَ راجدوست ءُ آجوئی لوٹوکیں ادارگانی زمہ واری گیشتر ود انت کہ آ سیاسی سنگر ءَ گھتریں دروشم ءَ کارمرز کنان ءَ شوربندی اڈ بہ دے اَنت کہ چرایاں بلوچ چاگرد ءِ تہ ءَ ترندیں دوستی ءِ دارگ ءَ پہ سیاسی جُنز مھکم کنگ بہ بیت اِنت۔