بلوچستان ءِ دمگ چہ پنجگور ءَ پاکستانی پوج ءَ یک مردمے آوار جتگ ءُ ناشناسیں جاھے ءَ برتگ ، وھدے کہ زورانسری آوار جنی ءِ نشانگ کنگ بیتگیں دو مردم آجو بیتگ ءُ وتی لوگاں سر بیتگ اَنت-
بیگواہ کنگ بیتگیں ورنائے پجّار عدیل ء مراد جان نام ءَ چہ بیتگ کہ پنجگور سِند جھمنند اِنت- کہ پاکستانی پوج ءَ بیست پنچ ستمبر ءَ پروم ءِ دمگ چہ جیرک ءَ گولڈ سمت لائن ءَ آوار جتگ ءُ بیگواہ کتگ-
بیگواہ کنگ بیتگیں ورنائے درگت ءَ گْوشگ بوگ ءَ اِنت کہ آ تیل ءِ باپاری ءَ گوں ھمگرنچ بیتگ کہ آ گاڑی ءَ ھوار پاکستانی پوج ءَ آوار جتگ ءُ ناشناسیں جاھے ءَ برتگ-
زانگ بہ بیت اشی ءَ ساری ھم ورناہ پاکستانی پوج ءَ ستمبر دوھزار نوزدہ آوار جتگ ءُ دو سالاں تاں آزارجاھاں بند کنگ ءَ پد مرچی یکرندے پد آ آوار جتگ-
دومی نیمگ ءَ بیست ھپت جون ءَ چہ آواران ءَ بیگواہ کنگ بیتگیں قادر بخش ء دوست محمد ءُ زاھد ء دلبود آزارجاھاں چہ آجو بیتگ ءُ وتی لوگاں سر بیتگ اَنت-