فدا بلوچ ھنکینی کارمستر ءُ عمران بلوچ ھنکینی کارگُشاد گچین کنئگ بیتگ انت۔
بلوچ اسٹوڈنٹس ایکشن کمیٹی حیدر آباد ھنکین ءِ نیمگ ءَ چہ ھنکینی لس دیوان ھنکینی کارمستر زبیر بلوچ ءِ سروکی ءَ برجم دارگ بیتگ، دیوان ءِ ھاسیں مھمان بُنجاھی کمیٹی ءِ باسک سلیم بلوچ ءُ گچینی مھمان شیراز بلوچ بیتگ اَنت۔ دیوان ءَ بنجاھی سرکیولر، گوستگیں ھنکینی اھوال، شرگداری، گل کاری، ھندی ءُ میان استمانی سیاسی جاور ھال ءُ آؤکیں گامگیج ءِ بنگپانی سر ءَ گپ ءُ تران بیتگ۔
بُنجاھی سنگتاں تران کنان ءَ گشت کہ اے ھند ءُ دمگاں وھد ءِ لوٹ ھمیش انت کہ گل ھندی نودربر ءُ لس مہلوک ءِ تک ءَ سر کنگ بہ بیت۔ مزن شاھدربرجاھاں ابید ھرچ ھما ھند ءَ کہ بلوچ جھمنند انت گل ءِ اود ءَ سر کنگ وھد ءِ لوٹ اَنت۔ ھمے ھاتر ءَ سنگت جُھد بہ کن اَنت کہ ھما ھنداں بلوچ آبادی است اِنت اود ءَ کسان ءُ مزنیں مراگش اڈ بہ دے اَنت ۔ دیمتر ءَ سنگتاں نگد کنان گْوشتگ کہ نودربر سیاست ءِ تہ ءَ اژدری اِیں شئے لٹریچر انت بلے گندگ ءَ کئیت کہ سنگت لٹریچر ءَ ھمک باسک ءِ تک ءَ سر کنگ ءَ شریں وڑے ءَ سوب مند نہ بوتگ اَنت۔ نودربر سیاست ءِ تہ ءَ زمینی راستی ءِ زانگ اژدری ایں چیزے,باز زمینی راستی انچش بنت کہ بگندے بازیں کار ءُ پالیسیانی دروشم مٹ کنگ کپیت,سنگت وتی زمینی راستیاں بہ چار اَنت ءُ دیمترا ھما رنگ ءَ وتی کاراں بہ جُنزین اَنت۔
دیمتر ءَ بُجاھی سنگتاں تران کنان ءَ گُشت بلوچ نودربر جتائیں ٹولیانی نیمگ ءَ چہ وتگڈیں ھیال ءُ لیکھانی بنیاد ءَ سیاست ءَ چہ دور دارگ بوھگ ءَ اَنت ایش روشتاں یک مھکمیں سیاسی پروگرام ءُ لٹریچرے داشت کت کنت، بلوچ نودربرے ءِ بستار ءَ مارا بلوچ چاگرد ءُ جُنز ءِ استیں لوٹانی ھساب ءَ وتی لٹریچر ترتیب دئیگی اِنت ءُ وانگ ءِ عمل دیم ءَ برگی اِنت داں ایش وتگڈیں روشتانی دیما داشت کُت بہ کنیں۔
جتائیں بنگپانی سرا گپ ءُ تران ءَ پد دیوان ءِ گُڈی بنگپ آؤکیں گامگیج ءِ تہ ءَ گوستگیں ھنکینی کابینہ ھلاس کنگ بوت ءُ نوکیں کابینہ ءِ ھاترا فدا بلوچ کارمستر، زبیر بلوچ کمک کارمستر، عمران بلوچ کارگشاد، غلام مصطفیٰ بلوچ کمک کارگشاد ءُ مزمل الھی بلوچ ھالرسانی کارگشاد گچین کنگ بوتگ اَنت۔ دیوان ءِ گُڑ سر ءَ نوک گچین بوتگیں کابینہ ءَ سوگند دیگ ءَ پد دیوان ءِ ھلاسی یے جار جنگ بوتگ۔