جھل مگسی ءَ امداد جویو کوش کیس، کھول ءِ زھرشانی

امداد فقیر جویو کوش ءِ کیس ءِ کُشکارانی نہ گرگ ءِ بگیری ءَ کُشگ بیتگین ءِ کھول نیمگ ءَ چہ جھل مگسی ءَ زھرشانی ئیں روانک کشگ بیتگ ءُ نندانک جتگ-

بلوچستان ءِ دمگ جھل مگسی ءَ کُشگ بیتگیں دھکانکار امداد فقیر جویو ءِ کُشکارانی نہ گرگ ءِ بگیری ءَ مروچی یکرندے پد ءَ آئی ءِ چُک ارباب جویو ءَ دمگ مردمانی ھمراھی ءَ روانک کش اِتگ ءُ کمشنر نصیرآباد ڈویڑن ءِ کارگس ءِ ڈن ءَ زھرشانی کنگ بیتگ ءُ نندانک جتگ ءُ تُرندیں ناراہ جنگ بیتگ-

کُشگ بیتگین ءِ کھول ءَ جھل مگسی میرپور لیویز ءِ بگیری ءَ تُرندیں ناراہ جتگ ءُ کمشنر نصیرآباد ءَ چہ نوٹس زرتگ ءُ کُتکارانی دزگیری ءِ لوٹ کتگ-

ارباب جویو ءِ گْوشگ اِنت کہ کُتکار دزگیر کنگ نہ بیت اَنت گُڑا سندھ بلوچستان ءِ راجی شھدگ پٹ فیڈر کینال ڈیرہ مراد جمالی ءِ ھند سر ءَ بند کنگ بیت-

ھمے درگت ءَ زھرشانی ءَ جھل مگسی ءِ سوشل ورکرز ، سیاسیی راھشون ءُ سول سوسائٹی ءِ مردماں بھر زرتگ-

زھرشانی ءُ نندانک ءَ چہ تران کنان ءَ نیشنل پارٹی ءِ دمگی صدر جاگن خان مغیری، اعجاز احمد، عمرانی، چاگردی جلال خان ءَ ھوار دگراں گْوشتگ کہ جھل مگسی ءَ کُشک بیتگیں دھکانکار امداد فقیر جویو ءِ کُشکاراں زوت ءَ چہ زوت دزگیر بکن اَنت ءُ کھول ءَ انساپ بدے اَنت، دو ماہ ءَ گیش گوزگ ءَ اَبید ھم جھل مگسی لیویز انتزامیہ کُتکاراں دزگیر کنگ ءَ بے سوب بیتگ-

آئی ءَ گْوشتگ کہ انساپ رسگ ءَ تاں مئے جُھد برجاہ بیت-

مردمانی گْوشگ اِنت کہ لیویز فورس میرپور ءِ اسرکپتگینانی گوم ءَ ھچ وڑیں کُمک کنگ ءَ نہ اِنت ءُ آ کُتکارانی دزگیری ءَ وتی کرد ءَ پیلو کنگ ءَ نہ اِنت ءُ لیویز فورس سرجمی ءَ بے سوب بیتگ اگاں کُتکار دزگیر کنگ نہ بیت اَنت گُڑا سندھ بلوچستان ءِ راجی شھدگ پٹ فیڈر کینال ءِ ھند ءَ بند کنگ بیت-

امداد فقیر جویو کوش بگیری ءَ زھرشانی اشی ءَ پد کمشنر نصیرآباد ڈویڑن طارق قمر بلوچ ءِ سوبمندیں دیوانے ءَ پد آسر کتگ-