کازی ماں پسنی ءَ کل ءُ کسارت کنگ بوتگ، بساک ءَ سَے روچ ءَ پرس دارگ ءِ جار جتگ

بلوچی زبان ءِ نامداریں مھر ءُ آشوبی شائر مبارکیں کازی ماں پسنی ءَ ہائیر سیکنڈری سکول ءَ نماز جنازہ ءِ وانگ ءَ پد ما مانشجاہ ءَ برگ ءُ کل ءُ کسارت کنگ بوتگ، بلوچ اسٹودنٹس ایکشن کمیٹی ءَ سَے روچ ءَ پُرس دارگ ءِ جار جتگ وھدیکہ بلوچ رھشون ڈاکٹر اللہ نزر بلوچ ، راجکاریں رھشون ءُ نودربراں ھوار ھر تک ءُ پھناتاں سیادی داروکیں مردم ءُ گلاں مبارک کازی ءِ اناگتی بیرانی ءَ دلپدردی درشان اِتگ ءُ آئی ءَ را ستک شانی درشان کتگ –

ھستیں وھدے بلوچی زبان ءِ نامداریں شائر مبارک کازی ءِ نماز جنازہ آئی ءِ بنکی ھنکین پسنی ءَ وانگ بوتگ – آئی ءِ نماز جنازہ ءَ مزنیں کچے ءَ مردماں بھر زرتگ –

مبارک کازی بلوچ بیست ءُ چار دسمبر سال نوزدہ سد ءُ پنجاہ ءُ شش ءَ ماں پسنی گوادر ءَ ودی بوتگ آئی ءِ کماش نام کھدہ امان اللہ بوتگ – آئی ءَ وتی بنداتی وانگ چہ بنکی ھنکین ءَ دربرتگ ءُ پدا سال نوزدہ سد ءُ ھپتاد ءُ شش ءَ کراچی ءَ شتگ ءُ سندھ مسلم لاء کالج ءَ داکلہ زرتگ ـ لھتے وھد ءَ رند وانگ ءِ یلا دیگ پد واتر کراچی ءَ شتگ ءُ پرائیوٹ چکاس داتگ ءُ انترمیڈیٹ پاس کتگ –

کازی ءَ وتی وانگ برجاہ داران ءَ بی اے کتگ ءُ سال نوزدہ سد ءُ ھشتاد ءُ سَے ءَ اردو آرٹس کالج ءِ دگری گپتگ ءُ پدا نوزدہ سد ءُ ھشتاد ءُ شش ءَ شال ءَ بلوچستان شھدربرجاہ ءَ بین الاقوامی تعلقات (آئی آر ) تہ ءَ ایم اے کتگ ـ پدا کازی وتی بنکی ھنکین پسنی ءَ اتکگ ءُ فش ہاربر پسنی ءَ ڈائریکٹر بوتگ ـ کازی ھما بلوچستان ءِ نامداریں مردمانی رم ءَ ھوار انت، آ وتی راجدوستی ءُ لبزانکی کارانی پجارگ بیت ـ آئی آشوبی شئیر نبشتگ کنگ ءَ پد بندیگ ھم کنگ بوتگ پرچا کہ آئی ءَ بلوچ راج ءِ ھک ءَ سرکار ءِ بگیری ءَ آشوبی شئیر نبشتگ –

نامداریں شائر مبارک کازی ءِ اناگتیں بیرانی ءِ درگت ءَ بلوچ اسٹودنٹس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشانے ءِ تہ ءَ آئی ءِ بیرانی ءَ دلپدردی درشان اِتگ ءُ گوشتگ کہ بلوچ ڈیھ چہ یک ابدمانیں راجی ءُ گھگیریں شائرے ءَ زبھر بوت – اے دلپدردیں ھالءِ گوما گل سئے روچی موتکے ءِ جار ءَ جنت –

جارکش ءَ وتی درشان ءِ تہ ءَ گوشتگ کہ ھرچ ڈیھ ءُ زمینے ءَ راجی شائر، لبزانت ءُ ایدگہ پڈانی زانتکار ءُ کواسانی جتائیں ارزشت ءُ کردے بیت- ھرچ باسمائیں راجی زانتکار ءُ لبزانت وتی چاگرد ءُ ڈیھ ءِ راستیانی بنیاد ءَ وتی زمہ واریاں گیشین ایت ءُ وتی کردے پیلو کنت۔ اے درگت ءَ بلوچ ڈیھ ھم سَنٹ نہ بوتگ ءُ نہ انت – خیربخش مری ءُ صبادشتیاریءِ پلسپہ ءِ چیدگ مبارک کازی اوں ھمے سرپ ءَ نمیران بوت کہ آئی ءِ شائری وت وتی پلسپہءِ درانگازی ءَ کنت –

جارکش ءَ گوشتگ کہ بلوچ ڈیھ ءُ راجی گہگیری ءِ مزن نامیں شاعر ءُ زانتکار مبارک قاضی ءِ ناگتیں بیرانی پہ بلوچ ڈیھ ءُ گہگیری ءِ لبزانکءَ مزنیں تاوانے ۔ مبارک قاضی نہ تہنا بلوچی زبان ءِ مزن بالادیں شاعر ءُ لبزانتے اَت بلکیں بلوچ راج ءِ باسمائیں جہگیرے ات ھم ۔ بلوچ ڈیھءِ جاورالانی سرجمیں توارے ات۔ آئیءِ شاعری سرجم گوں وتی ڈیھ ءُ ڈگارءِ راستیں جاورہالاں پیوست ات۔ ھستیں اھد ءِ ھما کرداراں چہ یکے اَت کہ ھرچ وڑیں زوراکیانی دیم ءَ اوشتوک ات ءُ پہ بدیں دژماناں آئیءِ آشوبیں توار شہمات ءُ زِبرّیں ھکّلے ات۔ آئیءَ مدام وتی شائریءَ تچکیں راستیءِ پدرائی کُت ءُ بلوچستان ءِ جہگیری کت۔بلوچ گہگیری شائری ءُ راجی پِگر ءَ چکاریں راجی بامرد بلوچستان ءِ بن دپتر ءِ تاکاں نمیران بوت –

ھمے درگت ءَ بلوچ نیشنل مومنٹ ءِ بنجاھی جارکش ءَ وتی دلپدردی درشان ءِ تہ ءَ گوشتگ کہ مبارک کازی ءِ بیرانی ءَ سرجمیں راج دلپدرد اِنت۔ مبارک کازی راجی لچہ کارے اَت ، آئی ءَ گوں وتی لچہ کارے ءَ بلوچ راج ءِ مارشتانی جھگیری کرتگ۔ پہ زبان ءُ ندانک ( ادب) آئی ءِ کرد ءُ کارانی سر ءَ بی این ایم پہ آئی ءَ ستک شانی نْدر کنت۔

آئی ءَ گْوشتگ مبارک کازی ءَ گوں وتی لچہ کاری ءَ راج ءِ راھشونی کرتگ۔ آئی ءِ ند دو زھیں زھمے ءِ پیم ءَ اَت ۔ نیمگے آئی ءَ گوں وتی لچہ کاری ءَ زورگریں پاکستان ایر جتگ ءُ راجی زْرمبشت ءِ پلہ مرزی کرتگ ، دومی نیمگ ءَ چاگردی ھرابی ءُ چاگرد ءِ کلپیں سیاسی ءُ دگہ تک ءِ مردمانی بگیری ءَ تچکے ءَ نبشتہ کرتگ۔ آئی ءِ لچہ کاری ءِ سر ءَ آئی ءِ سر ءَ پہ کوش ءَ ارش کنگ بیتگ- آزار دیگ ءُ زندان ءَ بند کنگ بیتگ بلے آ چہ وتی لیکھاں بوگے ھم پد نہ کنز اتگ ءُ ناں کہ آئی ءِ ھاٹیگ ءِ تہ ءَ کمی اتکگ-

جارکش ءَ گْوشتگ آئی ءِ راجدوستیں لیکھانی پد ءَ آئی ءِ چک کمبر کازی بلوچ آجوئی ءِ جھد ءَ سرمچارانی ھمراہ بوت ءُ پندلے ءِ پد ءَ دژمن ءِ چیریں کارداراں شھید کرت۔پہ واجہ مبارک کازی ءَ اے جھلیں ٹپے اَت بلے آئی ءَ پہ راجی آجوئی ءَ وتی چک ءِ دیمونی سگ ات ءُ وتی چک ءِ شھیدی ءَ مدام پھر بستگ اَت –

بلوچی زبان ءِ شائر منیر مومن ءَ دلپدردی درشانتگ ءُ گوشتگ کہ کازی ساب ھمے کساس ءَ زندگیں مردمے اَت کہ آئی ءِ بیران بوگ ھچ باور نہ بوگ ءَ انت –

کازی اے تئی زوراکی اِنت کہ تو جھان بدل کُت- بلئے تئی کِرد ءِ رنگ ھمینچو باز ءُ زندگ اَنت ، دل نہ منّیت کہ تو اچ مئے نیام ءَ در کپتگ ئے –

بلوچ راجی رھشون ڈاکٹر اللہ نزر بلوچ نبشتہ کنت کہ آجوئی ءِ جھد ھر وھد ءَ تازہ انت (مبارک قاضی)
کازی اھد سازیں شائر ءُ راجی جھد ءِ سروک ات –

بلوچ سوشل میڈیا ایکٹوسٹ پیردان بلوچ آئی ءِ شئیرے نبشتہ کنت
“شاریؔ ءِ ارواہ شْدریں شپ چراگے بْرمشؔ دنت،ما اوں کازی یک ءُ دو پُلّ رھگْوزی زرشان کُتیں” کہ وانگ ءِ وھد ءُ زمانگ ءَ جنرل ضیا ءِ ترندیں زوراکیانی روچاں مچ جیل ءَ زند گوازینوک ءُ جنرل مشرف وھد ءَ تربت سنٹرل جیل ءَ بند ءُ ازیت اوپار کنوکیں آشوبی شئر گشوکیں کازی ءَ اے جھان یل داتگ –

سید ہاشمی ریفرنس کتابجاہ ،کراچی ملیر ءَ وتی دلپدردی درشان ءِ تہ ءَ نبشتگ کہ؛ ملکموت مستیں لیڑہے بوتیں برتیں ماں کَور ءَ جور چارینتیں
بلوچی زبان ءِ نامداریں شاعر واجہ مبارک قاضی ءِ بیرانی پہ بلوچی زبان ءُ بلوچ راج ءَ زنڈیں تاوانے ءُ داں صداں سالاں کازی ءِ کَنڈ ءَ کس گپت نہ کنت-

بلوچی میوزک پروموٹرز سوسائٹی دلپدردی درشان اِتگ کہ بلوچی زُبان ءِ مزن نامیں شاعر واجہ مُبارک قاضی بیران بُوت۔ بلوچی لبزانک ءِ پِڑ ءَ مُبارک کازیؔ یک اھدے ءِ نام اَت۔ واجہ مبارک کازی ءِ بیرانی پہ بلوچی زُبان ءُ لبزانک ءَ مزنیں تاوانے۔ ما ، واجہ مُبارک کازی ءِ اے اناگتی مرگ ءَ بژن ءُ ارمانیگ ایں ءُ آئی ءِ کھول ءِ گماں شریدار ایں-

ڈاکٹر مھرنگ بلوچ وتی دلپدری درشان ءِ تہ ءَ نبشتہ کنت کہ نامداریں شائر ءُ بلوچی لبزانت مبارک کازی مار ءَ چہ جتا بوتگ کہ آئی ءَ وتی زند پہ بلوچی زبان، دود ءُ پہ لبزانک ءَ کربان کتگ، آ یک نمیرانیں زھگے ءِ پت ءُ بلوچ زرمبشت ءَ گوں بندوک بوتگ آ یک گوستانکی مردمے نام ءَ یات کنگ بیت –

بی این ایم ءِ رحیم بلوچ نبشتہ کنت کہ ‏بلوچی زبان ءِ نامداریں شائر ھدامرزی واجہ کازی مبارک وتی بے مٹیں شائری، قوم دوست وانسان دوست،سیاسی و چاگردی پگر و ھزمتانی برکت ءَ نمیران انت – پہ بلوچ قوم و بلوچی زبان و لبزانک ءِ دیمروی ءَ آئی ھزمت داں کرنانی کرن شموشگ نہ بنت –

گیشیں سرپدی ءِ ھاتر ءَ اے لنک ءَ پچ بہ کن ات-