ڈیرہ بگٹی ءَ چی بوگ ءَ انت؟

گوستگیں سَے روچ انت کہ ڈیرہ بگٹی ءَ مزنیں کچے ءَ لشکر کشی برجاہ انت، تنی وھدی بازیں مردمے زورانسری آوار جنگ ءُ بیگواہ کنگ بوتگ انت، وھدیکہ مروچی شال ءِ کور کماندار آصف غفور ءُ آئی جی ایف سی ھم ڈیرہ بگٹی ءَ شتگ انت –

راجدوست ھمے گمان کنگ ءَ انت کہ اے اپسرانی ڈیرہ بگٹی ءَ روگ ھمے زاھر کنت کہ اے لشکر کشی ءِ تہ ءَ گیشی کار انت –

ڈیرہ بگٹی ءَ لشکر کشی پرچا بوگ ءَ انت؟

گوستگیں روچاں ھژدہ ستمبر ءَ ناشناسیں سلاہ بندیں مردماں جانی بیڑ ءِ ھند ءَ سپرے ءَ رؤکیں ھژدہ مردم داشتگ انت کہ آیانی پجار کنگ ءَ پد شش مردم ھما وھد ءَ آوار جتگ انت وھدیکہ آ چہ ڈیرہ بگٹی ءَ دیم پہ سبی ءَ رؤگ ءَ بوتگ انت –

آوار جنگ بوتگیں مردمانی درگت ءَ چہ رسانکدراں ھمے ھال شنگ بوتگ کہ اے مردم فٹبالر انت –

سرکار ءِ گوشگ:
سرکار ءِ گوشگ انت کہ اے لشکر کشی پہ آوار جنگ بوتگیں مردمانی یل کنائینگ ءِ ھاتر ءَ کنگ بوگ ءَ انت –

بلے پدا ھم راجدوست ھمے گوشگ انت کہ اے لشکر کشی ءَ پوج لس مھلوک ءَ نشانگ کنگ ءَ انت، وھدیکہ لشکر کشی ءِ میان ءَ پوج ءَ مزنیں کچے ءَ مردم زورانسری آوار جتگ ءُ بیگواہ کتگ انت –

اے کئیا آوار جتگ انت؟

ڈیرہ بگٹی ءَ پاکستانی پوج ءُ آئی ءِ کمکار ءُ سرکاری ادارھانی سر ءَ اُرش کنوکیں گل ” بلوچ لبریشن ٹائیگر ” ءَ رسانکدراں وتی شنگ کرتگیں درشانے ءِ تہ ءَ گوشتگ کہ اے آوار جنگ بوتگیں شش ایں مردم آئی ایس آئی ءِ ایجنٹ انت ءُ ما آوار جتگ انت –

جارکش ءَ وتی درشان ءِ تہ ءَ گوشتگ کہ رسانکدراں ھما کہ فٹبالر گوشگ بوگ انت راستی ءَ آ آئی ایس آئی ءِ چاریگ انت کہ آیاں ڈیرہ بگٹی ءِ تہ ءَ دست گوشیں مردم آوار جتگ ءُ آیانی شھید کنگ ءَ اشانی دست تچکی ءَ مان انت –

اے وھدی ڈیرہ بگٹی ءَ چی بوگ ءَ انت؟

گوستگیں سَے روچ انت کہ ڈیرہ بگٹی ءَ پراھگ ءَ جنگی بالگرد تر ءُ گرد کنگ ءَ انت وھدیکہ دومی نیمگ ءَ پوجی کاروان ھم آیگ ءَ انت ءُ بازیں جاھاں پوج ءِ نیمگ ءَ پٹ پول کنگ بوگ انت –

دمگی مردمانی رِد ءَ ڈیرہ بگٹی ءُ سوئی اے وھدی پوج ءِ انگر انت وھدیکہ پوج ءَ تنی وھدی مزنیں کچے ءَ مردم آوار جتگ ءُ بیگواہ کتگ انت کہ آیانی تہ ءَ یازدہ مردمانی پجار کنگ بوتگ انت –

آوار جنگ بوتگیں مردمانی تہ ءَ دمگی شائر عزیز بگٹی ، سلیمان بگٹی، حاجی میاں خان، نوجوان علی بخش، پٹھان، ہاشم بگٹی، بابل بگٹی، یعقوب بگٹی، کریم بگٹی، مصطفٰی بگٹی ءُ بجار بگٹی ھوار انت –

ھمے گوشگ بوگ ءَ انت کہ آوار جنگ بوتگیں مردمانی کچ سک باز انت بلے دمگ ءِ تہ ءَ برجاھیں لشکر کشی ءُ پوج ءِ انگر ءِ سوب ءَ ایندگہ مردمانی پجار تنی وھدی کنگ نہ بوتگ –

لشکر کشی ءِ میان ءَ پوج ءُ سلاہ بندانی میان ءَ میڑے ھال ھم اتکگ انت –

دومی نیمگ ءَ بلوچ لبریشن ٹائیگر ءِ جارکش ءَ گیس پائپ ءُ پوج ءِ کاروان ءِ سر ءَ بوتگیں ارشانی زمہ واری منّ اِتگ، وھدیکہ سرکار پوج ءِ سر ءَ بوتگیں اُرشانی درگت ءَ ھچ گوشگ ءَ نہ انت بلے گیس پائپانی سر ءَ بوتگیں اُرشانی ھبر راست بوتگ انت –