ڈاکٹر اے آر داد ءِ آزمانکانی سیمی کتاب زوت چاپ ءُ شنگ بیت

بلوچی زبان ءِ نامداریں ندکار ءُ آزمانکار پروفیسر ڈاکٹر اے آر داد ءِ آزمانکانی سیمی کتاب “ایرمانیں شھر” زوت چاپ ءُ شنگ بیت –

ڈاکٹر اے آر داد ءِ سیمی آزمانکانی کتاب ایرمانیں شھر چہ ساچ در لبزانکی گل مکران ءِ نیمگ ءَ چاپ ءُ شنگ بوگ انت – ڈاکٹر ءِ چدوپیسر آزمانکی دو کتاب “گپ روان کنت، دریا دیم ءَ پیداک انت چاپ ءُ شنگ بوتگ انت –

ساچ در لبزانکی گل مکران ءَ ڈاکٹر ءِ کتاب ءِ سرتاک شنگ کتگ ءُ گوشتگ کہ ساچ در مدام جھد کنگ ءَ انت کہ بلوچی لبزانک ءِ ھنچیں مڈی دیم ءَ بیاریت دانکہ بلوچی لبزانک ءِ ھمک تک ءِ در پُر بہ بنت – ھمے رِد ءَ بلوچی آزمانک ءِ نامداریں نبشتہ کار اے آر داد ءِ آزمانکانی سیمی دپتر “ایرمانیں شھر ” ھمے زوتاں وانوکانی دست ءَ بیت اِنت –

کتاب ءِ سرتاک ءَ ساجد حسین ءِ دانک نبشتہ انت کہ اے آر داد ھما نویس کار انت کہ آئی ءَ ماں بلوچی لبزانک ءَ شعوری صورت ءَ جدیدیت ءُ چیدگ نویسی مئیل دیم ءَ آرگے جھد کتگ – آئی ءِ دست ءِ چیر ءَ در اتکگیں سَے ماھی تاک “درد” آئی ءِ تہ ءَ چاپ بوتگیں نبشتانکانی گچین اے گپ ءِ گواہ انت –

آ چہ ھما ساچشت کاراں یکے کہ آ گوں وتی واباں کار داریت ءُ ھماواں نبشتہ کنت – من پہ دو دانکی بازیں سنگتانی زبان ءَ اشکتگ کہ داد وتی زات ءَ چہ وتی اندر ءَ در اتک نہ کنت آ یکتاھی پسندے گوں چاگردی جاوراں کار نہ داریت، آئی ءَ اے سُد نیست کہ دنیا ءَ چی بوگ ءَ انت چی بوگ ءَ نہ انت – داد وت ھم وتی نگدی نبشتانکانی تہ ءَ داخل پسندی، چیدگ نویسی، یکتائی پسندی ءُ واب نویسی ءِ میلانی پلامرزی ءَ کنت –

شرف شاد ءَ نبشتگ کہ شعر بہ بیت یا آزمانک لبزانک ءِ ساچگ ءَ ھر کسی وتی یک لیکھے، پہ کسی ءَ دلوشی ءِ سامان پہ کسی ءَ دل ءِ گکانی کشگ ءِ راھے ـ کسے اشی ءَ نہ دیستگیں جھاناں سر کشگے نام ءَ.دنت ءُ کسے وتی زات ءِ تھاریاں سپر کنگ گوش ایت – گوشگ تری ھرچی بہ بیت بلے درائیں گپانی ھمے یکیں مانا درکیت کہ لبزانک زندگی ءُ کائنات ءِ اسراراں سر بوگ بنی آدم ءِ ھما جھد ءُ کوشش ءَ گوں ھمگرنچ انت کہ آئی ءِ بنیاد ءَ چہ وتی زات ءَ.چست کنت – گوں ھمے جھد ءُ مھنت ءَ بنی آدم ھست ءُ نیستی ءِ درائیں راز ءُ اسرار بستگ انت –

سلیم ھمراز ءَ نبشتگ کہ اے آر داد وتی دور ءُ باریگ ءِ ھمسریں آزمانکارانی تہ ءَ یک جدائیں درشانداب ءُ اسلوب ءِ واھند انت – آئی ءَ بلوچی آزمانک روایتی یا بنگیجی سیمسراں کش اِتگ ءُ نوکیت ءِ ھد ءُ ابیلاں آؤرتگ ءُ سر کتگ – پمیشکہ باز وانوک (روایتی وانوک) آئی ءِ زبان ءُ بیان ءَ پوہ نہ بنت ءُ وت ءَ ھما جاہ ءَ سر کت نہ کن انت کہ اودا اے آر داد ءِ ساچشتی سہر بندات بیت – آسر ھمے بیت کہ وانوک اے آر داد ءَ یک وتگڑ ءُ پوچیں آزمانکارے لیک ایت – بلوچی روایت ءُ زمین ءَ چہ سستگیں آزمانکارے ءِ نام ءَدنت بلے راستی ءَ اگاں چارگ ءُ ٹپاسگ بہ بیت تا اے لیکہ چٹ رد ءُ بے بنیادیں باوستے جوڈ بیت-