بلوچستان ءِ جتاجتائیں دمگاں تیرگواری ءِ وئیل آسر ءَ زالبولے ءَ ھوار سے مردم کُشگ بوتگ ءُ یک لاشے دزکپتگ

بلوچستان ءِ جتاجتائیں دمگ کیچ ، ھُزدار ءُ ھب چوکی ءَ تیرگواری ءِ وئیل آسر ءَ زالبولے ءَ ھوار سے مردم کُشگ بیتگ اَنت وھدے کہ ھرنائی ءَ پنجاب ءِ جھمنندیں مردمے لاش دزکپتگ-

گیشیں ھالانی رِد ءَ کیچ ءِ دمگ دشت ءِ ھند جنگل کراس نزیک ءَ ناشناسیں پرپٹ سواریں سلاہ بندیں مردمانی تیرگواری ءَ چہ ثناء اللہ ء نصرت اللہ جھمنند سورک دشت بیران بیتگ-

زانگ بہ بیت چیزے ماہ ءَ ساری ھم ثناء اللہ ءِ سر ءَ ناشناسیں سلاہ بندیں مردماں اُرش کتگ اَت آ ٹپی بیتگ اَت-

دمگی مردمانی گوشگ رِد ءَ ثناءاللہ پیسر ءَ یک آجوئی لوٹوکیں سلاہ بندیں گلے ءِ بھر بوتگ ءُ پد ءَ آئی ءِ وتی سلاہ پوج دیم ءَ چگل داتگ اَنت-

وئیل سوب انگت زانگ نہ بوتگ نانکہ دگہ سلاہ بندیں گلے ءَ اے اُرش زمہ واری منّ اِتگ-

دومی نیمگ ءَ ھُزدار ءِ دمگ درنیلی نال ءَ سلاہ بندیں مردمانی تیرگواری ءَ چہ یک زالبولے بیران بیتگ ءَ وئیل سوب انگت زانگ نہ بیتگ-

ھمے وڑ بلوچستان ءِ باپاری شھر چہ ھب چوکی ءَ ساکران دگ ءَ برجاھیں الغوثیہ پان شاپ سر ءَ دُزی ءِ وھد ءَ تیرگواری ءَ چہ شاپ کیپر گل محمد شیخ بیران بیتگ-

اُرشکارانی تہ ءَ یکے شیخ موباھل مارکیٹ ءُ دگہ دو پرنس ھوٹل نزیک ءَ چہ شھریاں دزگیر کتگ ءَ پولیس ءِ دست ءَ داتگ اَنت-

بلوچستان ءِ دمگ ھرنائی ءَ چیزے روچ ءَ ساری آوار جنگ بیتگیں پنجاب ءِ جھمنندے ءِ لاش دزکپتگ-

چہ زیارت ھرنائی ءِ کراس ءَ آوار جنگ بیتگیں ارشاد محمود ء بشیر احمد جھمنند شیخوپورہ ءِ لاش کچ ھرنائی دگ ءَ چہ کساس دو کیلومیٹر ءَ دیر یک ویرانیگے ءَ لیویز کارندھاں دزکپتگ-

لاش لیویز ءَ وتی دستیگ کتگ ءُ پٹ پول بندات کتگ-

اشی ءِ ھمراھی ءَ آ دگہ چاریں مردم سلاہ بندیں مردماں ھما وھد ءَ آوار جتگ اَنت وھدے آ زیارت دگ سر ءَ سپر کنگ ءَ بیتگ اَنت، آ دگہ ھم پنجاب جھمنند گوشگ بوگ ءَ اَنت بلے آیانی درگت ءَ ھچ ھال دیم ءَ نیتکگ-