بلوچستان ءِ تیاب دپی شھر ءَ ناشناسیں مردماں پاکستانی نیوی نشانگ کُتگ ءُ تتکگ اَنت۔
گوادر ءَ جی ٹی گیٹ ءِ برجاھیں پاکستانی نیوی ءِ بنجل ناشناسیں مردماں مروچی سھب سرءَ دستی بمب ارشے تہءَ نشانگ کُتگ ءُ تتکگ اَنت۔
ھندی اھوالانی ردءَ تراک ءِ توار داں دیرءَ اِش کَنگ بیتگ وھدیکہ تراکے آسرءَ نیوی ءِ کارمنداں جانی تاوان ءِ دیمپانی ءِ ھال اِنت۔
واکداراں دان انگت اے درگت ءَ ھچ پئیمیں اھوال نہ داتگ۔
گوادر ءَ پاکستانی لشکری ءُ سی پیک شوربندیاں بندوکیں کارمندانی سرءَ بلوچ آجوئی لوٹوکیں گلانی نیمگ ءَ چہ اُرشانی دیمپانی اِنت۔
گوستگیں ماہ ءَ گوادر شھر ءَ یک شرکت ءَ بندوکیں چینی شھریانی کاروان ءِ بلوچ لبریشن آرمی ءَ اُرش ءِ تہءَ نشانگ کُتگ اَت۔
اے اُرش ءَ چینی شھریاں ھوار پاکستانی لشکریانی کارمنداں ھم تاوانءِ دیمپانی کنگ کپتگ اَت وھدیکہ اے اُرش بی ایل اے مجید برگیڈ ءِ دو “پدائیں” اں کُتگ اَت۔
چار روچ پیسر گوادر ءَ پاکستانی زر لشکر ءِ یک بالی پرگ ءِ کپتگ ءُ آدُراہ بیتگ اَت، اشی آسرءَ دو اپسراں ھوار سئے کارمند مُرتگ اِت اَنت۔
پاکستانی زر لشکر ءِ جارکش ءَ ٹاہ داتگ ءُ گُشتگ کہ گوادر ءَ پاکستانی زر لشکر ءِ بالی پرگ ھیلکاری بال ءِ نیام ءَ وئیل آماچ بیتگ، وئیل ءِ آسرءَ پاکستانی زرلشکر ءِ دو اپسراں ھوار دگہ یک کارمند ءِ مُرتگ اَنت۔
مُرتگیں کارمندانی پجار لیفٹیننٹ کمانڈر جواد، لیفٹیننٹ کمانڈر حمزہ ءُ ایل یو ڈبلیو ٹی حسنین ءِ ناماں چہ بیتگ۔