بلوچستان ءِ دمگ آواران ءِ ھنکین مشکے ءَ یک مردمے تیر گواری کنگ ءُ کُشگ بیتگ۔
سربیتگیں اھوالانی ردءَ آدینگ ءِ بیگاہ ءَ ناشناسیں سلاہ بندیں مردماں مشکے کئور ءَ تیرگواری کُتگ ءُ 37 سالی ایں رحیم داد ء امیت محمد حسنی جھمنند کالار مشکے بیران کُتگ۔
ھندی اھوالانی ردءَ کوشکارانی سیادی گوں سرکاری پلہ مرزیں کُشندہ ٹولیاں اِنت۔
دومی نیمگ ءَ بی این ایم ءِ مردمی اگبالانی تک پانک ءِ گُشگ اِنت کہ کُشگ بیتگیں مردم 5 جون ءَ پاکستانی لشکریاں دزگیر کنگ ءَ پد بیگواہ کُتگ بیتگ ءُ آ ھمے ھپتگءَ چہ زنداناں آجوہ بیتگ اَت وھدیکہ مروچی آ مشکے ءَ پاکستانی پوج ءِ پلہ مرزی ءَ کارکنوکیں سلاہ بندیں ٹولی ڈیتھ اسکواڈ ءَ تیر گواری کُتگ ءُ کُشتگ۔
چدوپیسر لھتیں روچ ءَ پیش خضدار ءَ یک اسکول ءِ استاد جاوید لہڑی تیر گواری کنگ ءُ کُشگ بیتگ اَت۔ ھندی اھوالانی ردءَ ھمے مردم ھم گمانی پئیم ءَ سرکاری پلہ مرزیں ٹولی ڈیتھ اسکواڈز ءَ کُشتگ اَنت۔