یک ھپتگے ءِ میان ءَ دوازدہ ءَ گیش مردم دروگیں میڑاں کشگ بوتگ انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجیں گل وائس فار بلوچ مسنگ پرسنز ءِ دراجکشیں زھرشانی بنجل ءَ مروچی پنچ ھزار ءُ یک سد ءُ شست ءُ سَے روچ سرجم بوتگ انت –

مروچی بی ایس او ءِ گوستگیں سرکماش مہیم خان بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ یک ھپتگے ءِ میان ءَ دوازدہ ءَ گیش زورانسری آوار جنگ بوتگیں مردم دروگیں میڑاں کشگ بوتگ انت کہ آیانی تہ ءَ گیشتریں مردمانی نام مئے بیگواھیں مردمانی لڑءَ ھوار بوتگ انت –

آئی ءَ گوشتگ کہ پاکستان وتی گزر ءُ لٹ پُل ءِ ھاتر ءَ انسانی ھکانی لگتمالی ءَ ھچ چک ءُ پد نہ بیت ءُ زورانسری آوار جنگ بوتگیں مردمانی درگت ءَ میان استمان ءِ درشاناں پادانی چیر ءَ کنگ ءُ بلوچ چکچینی پالیسی ءَ سر ءَ اوشتوک انت –

آئی ءَ گوشتگ کہ پاکستان ءِ جوڈ بوگ چہ ھما اولی روچ ءَ پہ بلوچ ءَ ھترھے بوتگ بلے ھمے وڈا ھما اولی روچ ءَ بگر ھاسکر گوستگیں یک دھکے ءَ پاکستان میان استمانی ایمنی ءَ پہ ھم ھترھے جوڈ بوتگ نوں اے ناکہ پہ بلوچ ءَ بلکنہ سرجمیں جھان ءَ پہ جیڑھے جوڈ بوتگ –

ماما قدیر بلوچ ءَگوشتگ کہ پاکستان انسانی ھکانی لگتمالی ءَ درساں دیم ءَ انت پاکستانی پوج ایردستیں بلوچستان ءَ ھوار سندھ ءَ ھم انسانی ھکانی لگتمالی ءَ کنگ ءَ انت ءُ دومی نیمگ ءَ وتی لاپ ءَ جوڈ کتگیں مزھبی گنوکاں رودینگ ءُ مزن کنگ انت تانکہ سرجمیں جھان ءَ ناشرکاری ءِ نرسری جوڈ بہ کنت –