گوریچانی کوریا ءِ سروک ٹرین ءِ سر ءَ روس ءَ تر ءُ تاب ءِ دلمانگ اِنت

گوریچانی کوریا ءِ سروک کِم جونگ ان ھمے ماہ ءَ روس ءَ روگ ءَ دلمانگ اِنت – آئی ءِ مول ءُ مراد یوکرین ءِ جنگ ءَ دزبندیں ماسکو ءِ جنگی ساز ءُ سامانانی سرکنگ ءِ گمان ءِ سر ءَ چار ءُ ٹپاسی بوگ ءَ اِنت-

گمان کنگ بوگ ءَ اِنت کہ کِم جونگ ان پیانھ یانگ ٹرین ءِ سر ءَ روس ءِ تیابدپی شھر والاڈہ واسٹک ءَ روگی اِنت – روس ءِ اے شھر گوریچانی کوریا ءِ سیمسر ءَ اِنت-

امریکہ ءِ روتاک نیوریارک ٹائمز ءَ امریکہ ءُ ھمسنتیں ڈیھانی درور دیان ءَ رپورٹ کتگ کہ کِم جونگ ان ءِ گند ءُ نند گمانی رنگ ءَ ھمے شھر ءَ روس ءِ سروک ولادیمیر پوٹن ءَ گوں بیت اِنت-

کِم جونگ ان باز کم ڈیھاں شتگ بیتگ – نیویارک ٹائمز ءِ رپورٹ ءِ رد ءَ گوریچانی کوریا ءِ سروک یک گچینی سلاہ کشیں ٹرینے ءَ گوں روس ءَ سر بیت اِنت-

کم جونگ ان ءِ روس ءِ تر ءُ تاب ءِ ھال یک ھنچیں وھدے ءَ دیم ءَ آیگ ءَ اِنت ھمے وٹ ماسکو ءِ لشکر یوکرین ءِ جنگ ءَ گوں دزبند اِنت- یوکرین ءَ امریکہ ءُ روکپتی ڈیھاں رس اتگیں لشکری کمکانی سبب ءَ روس ءِ لشکر ءَ مشکلانی دیمپانی اِنت-

گوریچانی کوریا اے گپ ءَ یکشل ءَ رد کنگ اِنت آ روس ءِ گون ءَ جنگی ساز ءُ سامانی بارو ءَ ھچ گپ جنگ ءَ نہ اِنت-

روس ءَ پیش ءَ اے گپ جتگ کہ آ گوریچانی کوریا ءِ گون ءَ لشکری سیادی ءِ گھتری ءِ واھشت مند اِنت-

نیویارک ٹائمز ءِ رپورٹ ءِ رد ءَ سروک پوٹن ءِ جھد بیت اِنت آ کم جنگ ان روس ءَ توپ گولہ ءُ ٹینک ءِ تباہ کنوکیں میزائل ءِ سر کنگ ءَ منوک بیت اِنت-

دومی نیمگ ءَ کم جونگ ان ءِ درگت ءَ گوشگ بوگ ءَ اِنت آ ماسکو ءَ سیٹلائٹ ءِ نوکتریں ٹیکنالوجی ءُ جوھری آب دوزانی سر ءَ کڈن کت کنت اِنت- ھمے وڑ ءَ گوریچانی کوریا ءِ رھشون ءِ جھد بیت اِنت آ وتی ڈکالداری ءِ ھاتر ءَ راج ءِ واستا وردنی ءِ مسامے بہ کنت-