اے وڑیں مردمانی گون ءَ گپ ءُ تران کنگ نہ بیت کہ آ وتی ناھاری ءِ وھد ءَ وت گشینت مہ کنت – ڈاکٹر اللہ نزر

بلوچ رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ وتی آفیشل اکاؤنٹ ایکس ءَ پاکستان ءِ انیگیں مزن وزیر ءِ نیمگ ءَ دلگوش گْور کُرتگ ءُ نبشتگ کہ تو ھما پوج ءِ گچین کُرتگین ئے کہ آئی ءِ دست ھزاراں بلوچانی ھوناں گوں ھونین انت – بلوچ پوج ءِ ھردوکاں (نندگ ءُ باوست، تاکت ءِ کارمرزی) ءَ نہ منّ ایت –

آئی ءَ انور الحق کاکڑ دلگوش گور کتگ ءُ گوشتگ کہ ھچ کس گوں چوشیں مردمے ءَ گپ ءُ تران نہ کنت کہ آ وتی ناھاری ءِ وھد ءَ وت گشینت مہ کنت-

زانگ بہ بیت پاکستان ءِ انیگیں سر وزیر انورالحق کاکڑ ءَ پاکستانی اھوالکار سلیم صافی ءَ گوں گند ءُ نندی گلگدار ءَ اے جست ءِ پسو ءَ کہ تو بلوچ سلاہ بندیں گلاں گوں گپ جن ئے؟ گڑا انور ءَ گوشتگ کہ ریاست وھد ءُ جاورانی رِد ءَ (تاکت ءِ زور ءُ گند ءُ نند) ھردو آپشناں کارمرز کنت –

آئی ءَ گوشتگ ما ھردوکانی سرا باور کناں – ھمے انٹریو ءِ سر ءَ ڈاکٹر اللہ نزر بلوچ ءَ گوشتگ کہ ھما مردم بید ءِ پوج ءِ مرزی ءَ وتی سھب ءِ ناھاری ءِ وھد ءَ وت گشینت مہ کنت آئی ءِ گند ءُ نندی درشان بس وتی وش کنگ انت –

ڈاکٹر ءَ دیمتر ءَ نبشتگ کہ بلوچاں ھپت دھک ءَ گیش اِنت کہ ریاست ءِ زوراکیانی دیمپان اِنت، بس اگست ءِ ماہ ءَ شست ءُ پنچ بلوچ نودربر آوار جنگ ءُ بیگواہ کنگ بوتگ انت –

آئی ءَ گوشتگ کہ ما یک راجے ءِ بستار ءَ چہ اقوام متحدہ ءَ گوں لوٹ کن ایں کہ آ پاکستانی ڈیپ ریاست ءِ بلوچانی سر ءَ ھپت دھکاں برجاھیں زوراکیانی جُست بہ گیپت –