بلوچستان ءِ جتاجتائیں دمگاں تیرگواری ءِ وئیل ءِ چار مردم بیران وھدے کہ یکے ٹپی بیتگ-
بلوچستان ءِ بُنجاھی شھر شال ءَ ھاکی چوک ءِ نزیک کسٹم کارندھاں ٹرک سر ءَ تیرگواری کتگ ، ڈرائیور ھما دمان ءَ مرتگ ، تیرگواری ءِ وئیل ءِ ھال سر بوگ ءَ پد پولیس ءُ چھیپا ایمبولینس وئیلجاہ سر ءَ بوتگ اَنت لاش سول نادُراھجاہ برتگ-
کسٹم کارندھاں تیرگواری ءَ چہ بیران بیتگیں مردم ٹرک ڈرائیور ءِ پجّار محمد قسیم نام ءَ چہ بیتگ ءُ آئی ءِ سیادی قلعہ عبداللہ ءَ گوشگ بوگ ءَ اِنت-
کُشگ بیتگیں ڈرائیور ءِ سیادانی رِد ءَ کارندھانی سر ءَ ایف آئی آر نکش کنگ وتیجاہ آئی ءِ کھول ءَ سرکاری زورگار ءِ دیگ ءِ لب ءُ لالچ دیگ ءَ اَنت ءُ بیھار دیگ ءُ ایف آئی آر نکش نہ کنگ ءَ جتائیں ھُنر ءُ ھِلّ کارمرز کنگ اَنت
ھمے وڑ چہ ھب ءَ ھالانی رِد ءَ ساکران تھانہ ءِ ھاک ءَ پولیس ءِ میڑ ءَ سے دُز کُشگ بیتگ اَنت-
کُشگ بیتگیں دُزانی لاش جام میر غلام قادر نادُرھجاہ ءَ برتگ اَنت- بلے لاشانی پجّار انگت نہ بیتگ اَنت- پولیس گوشگ رِد ءَ دُز شھریاں گوں دُزی ءَ دلگوش بیتگ اَنت کہ پولیس ھما دمان ءَ ست بیتگ ءُ میڑ ءَ سئیں دُز کُشتگ اَنت-
دگہ یک وئیلے بلوچستان ءِ دمگ نصیرآباد ءِ دمگ ڈیرہ مراد جمالی ءَ سلاہ بندیں مردمانی تیرگواری ءَ چہ یک مردمے سک ٹپی بیتگ- پولیس ءِ رِد ءَ گوستگیں روچ ءَ ڈیرہ مراد جمالی ءَ اللہ والے چوک نزیک ءَ سلاہ بندیں مردماں تیرگواری کتگ ءُ قیدی شاخ ءِ جھمنند نظر محمد سک ٹپی کتگ ءُ تتکگ اَنت- وئیل ءَ پد کُتکار ھما وھد ءَ تکگ اَنت پولیس رِد ءَ وئیل کوھنیں دُژمنی یے بیتگ-