ایران ءِ آمیدگس ءَ دو دمگی اھوالکار ڈیھ ءِ ھلاپ ءَ پندل کنگ ءِ بھتام ءَ یک ماھے ءِ سزا ءِ ھکم داتگ انت-
ھال سرکنوکیں ادارہ اے ایف پی ءَ ایران ءِ رسانکدر ءِ درور دیان ءَ گوشتگ اھوالکار نگین باقری ءُ ایلناز مھمدی ءَ را سَے سال کید ءِ دزکشی ءِ ھکم داتگ ءُ آ یک ماھے ءَ داں زاندانی کنگ بنت اِنت –
ایران ءِ روتاک ھم میھن ءَ گپ کنان ءَ زالبولانی وکیل عامر رئیسیان ءَ گوشتگ کہ زندانی ءِ پشکپتگیں وھد ءَ داں پنچ سال ءَ دزکش کنگ بیتگ اَنت ءُ اے وھداں آیاں شرپ دربرگی اِنت ءُ ھردوکیں زالبولاں ڈیھ ءَ ڈن روگ ءِ ھم بندش جتگ بیتگ-
وکیل عامر رئیسیان ءَ اے گپ راست نہ کتگ آمیدگس ءِ پیسلہ ءِ ھلاپ ءَ دزبندی کنگ بیت اِنت یا ناں ءُ نانکہ ایران ءِ رسانکدر ءَ اھوالکارانی ھلاپ ءَ جتگیں بھتامانی سرپدی دیم ءَ آوارتگ اَنت-
ایلناز مھمدی ءِ گوھار الھہ ستمبر دوھزار ءُ بیست ءُ دو ءَ چہ زندان ءَ اِنت آ پولیس ءِ دزگیری ءَ بیران بیتگیں بیست ءُ دو سالیگیں مھسا امینی ءِ جنازہ ءِ وھد ءَ رپورٹنگ ءِ پژدر ءَ گرگ بیتگ-
زانگ بہ بیت شانزدہ ستمبر دو ھزار ءُ بیست ءُ دو ءَ ایران ءِ کرد زالبول مھسا امینی برکہ ءِ نہ کنگ ءِ پژدر ءَ اکلاکی پولیس ءَ دزگیر کتگ ات ءُ دزگیری ءِ وھد ءَ آئی ءِ بیرانی بیتگ ات-
اے وئیل ءَ پد بازیں ماھاں سرجمیں ڈیھ ءَ زھرشانی بیتگ اَنت- انسانی ھکانی میان اُستمانی گلانی رد ءَ مھسا امینی ءِ اولی سالروچ ءَ پیسر بازیں دزگیری بیتگ اَنت-
نگین باقری دمگی روتاک ھپت صبح ءِ واستا کار کنت اِنت ءُ ایلناز مھمدی فروری ءِ ماہ ءَ دزگیر کنگ بیتگ ءُ داں انگت ءَ ایوین ءِ زندان ءَ بندیگ اِنت ءُ آئی ءِ دزگیری ءِ بارہ ءَ دگہ گپ دیم ءَ نیتکگ اَنت-
گوستگیں سال ءَ زھرشانیانی وھد ءَ بازیں سکیورٹی کارمنداں ھوار سدانی مردم بیران بیتگ اَنت ءُ ھزارانی ھساب ءَ دزگیر کنگ بیتگ اَنت- زھرشانی ءِ وھد ءَ سکیورٹی پورس ءِ کشگ ءُ جنگ ءِ بھتام ءَ ھپت مردم پاھو دیگ بیتگ اَنت-
گوستگیں ماہ ءَ دمگی رسانکدر ءَ رپورٹ کتگ ات کہ زھرشانیان پد ایران ءِ واکداراں داں انگت ءَ نود ءَ گیش اھوالکار جست ءُ پرس کتگ اَنت-
گوستگیں چارشمبے ءَ سرکاری ھال سرکنوک ءَ گوشتگ ات کہ اھوالکار نازیلا معروفیان گدانی دود ءِ لگتمال کنگ ءِ پژدر ءَ دزگیر کنگ بیتگ ءُ اگست ءِ ماہ ءَ زمانت ءِ سر ءَ یل بیتگ ءُ پد ءَ دودانی لگتمال ءِ پژدر ءَ دزگیر کنگ بیتگ-