بی ایل اے ءِ سروک بشیر زیب ءِ تامری کلوہ چین ءُ ایندگہ میان اُستمانی تاکتاں

بلوچ لبریشن آرمی ءِ سروک بشیر زیب بلوچ ءَ وتی نوکتریں تامری درشانے ءَ میان اَستمانی تاکت ءُ ھاسکر چین ءِ دلگوش گور کنائینتگ ءُ گوشتگ چین ءُ پاکستان پنجاپیانی یک گوستانکی راج ءُ راجدپترے ءِ واھندیں بلوچ راج ءِ مال ءُ مڈیانی لٹ ءُ پُل ءَ یل بہ کن انت –

بلوچ لبریشن آرمی ءِ آفیشل چینل ھکل ءَ شنگ بوتگیں اے ھشت ملٹی تامر بندی ءِ تہ ءَ بی ایل اے ءِ سروک بشیر زیب چین، ھلیجی ڈیھ ایندگہ میان اُستمانی تاکتاں ھوار ھوار بلوچ راج ءَ دلگوش گور کنائینت ءُ تران کنگ ءَ گندگ بیت اِنت – تامر ءِ تہ ءَ گندگ بیت کہ بی ایل اے ءِ سروک پوجی پوشاک ءِ تہ ءَ انت وھدیکہ آئی ءِ ھمراھی ءَ بی ایل اے ءِ جتا جتائیں ٹولیانی باسک نوکیں سلاھاں گوں سلاہ بند انت ءُ آئی ءِ گور ءَ اشتاتگ انت ـ اے مردمانی پوشاک ءُ بیج آں چہ ھمے زانگ بیت کہ ایشانی تہ ءَ بی ایل اے مجید برگیڈ ءِ پدائیاں ھوار اسٹو اس ءُ بی ایل اے فتح اسکواڈ ءِ باسک ھوار انت –

بی ایل اے ءِ سروک بشیر زیب بلوچ وتی تامری کلوہ ءِ تہ ءَ گوش ایت کہ سیندک بہ بیت یا گوادر یا بلوچ ءِ ایندگہ مڈی آیاں پاکستان چین ءُ دگہ ڈیھانی گور ءَ لیلام کنگ ءَ انت ـ چین ءِ راج کہ وت ءَ جمھوریت لوٹوک ءُ دودمان ءُ آشوبی یے گوش ایت ءُ وتی رکینگ ءَ آئی ءَ مزنیں جنگ ھم کتگ آئی ءِ پرز انت کہ آ مکاریں پنجاپیانی ھمراھی ءَ بلوچ راج ءِ مال ءُ مڈیانی لٹ ءُ پُل ءَ بند بہ کنت، آ ھما وھد ءَ گوں بلوچ ءَ نزیکی بہ کنت وھدیکہ پنجاپی مئے زمین ءَ یل کن انت ءُ رؤ انت –

آئی ءَ گوشتگ کہ بلوچ ءِ مڈیانی واھند آ بلوچ نہ انت کہ پنجاپی ءَ وتی ایجنٹ جوڑ کتگ انت ءُ آ وزیر ءُ نمائندگ ءِ نام داتگ انت ـ اے دراہ پوج ءِ ایجنٹ انت بلوچ ءِ نمائندگ ھما انت کہ راجی آجوئی ءِ جنگ ءَ دیم ءَ برگ ءَ انت ءُ پہ بلوچ سرڈگار ءِ رکینگ ءَ مزاھمت کنگ ءَ انت –

آئی ءَ گوشتگ کہ چین ءَ ھوار ھلیج، یورپ، کنیڈا ءُ مئے ھمساھگیں ڈیھ سرپد بہ بنت کہ بلوچ وتی مال ءُ مڈیانی لٹ ءُ پُل ءَ ھچبر اوپار کرت نہ کنت ـ مئے گوں دومی راجاں ھچ وڑیں دژمنی ءِ نیست اگاں کسے ءَ بلوچ ءِ مال ءُ مڈیانی لٹ ءُ پُل کت، بلوچ ءِ چکچینی ءَ پنجاپی ءُ پاکستان ءِ ھمراھداری کت گڈا بلوچ اے نہ چاریت کہ آ چینچو مزنیں تاکتے ـ اے تاکتاں گوریلہ جنگ ءُ راجی جزبگ ءِ درگت ءَ شری ءَ سرپدی دار انت ـ بلوچ ءِ مزاھمت ءَ جزبہ سک باز بیمناک بیت ھر کسے ادا باپاری کنت آئی ءِ دراہ زوال ءَ رؤ انت –

آئی ءَ گوشتگ بلوچ یک گوستانکی راجے ءُ دومی راجاں پہ لاچاری ءَ گامگیج زور ایت –

بشیر زیب ءَ وتی تامری کلوہ ءِ تہ ءَ بلوچ راج دلگوش گور کتگ ءُ گوشتگ کہ رکینگی جنگ ءَ بلوچ ءِ مڈی ءُ پجار ءِ رؤگ ءَ انت بلوچ مرگ ءَ انت در پہ در انت، ھمک روچ درپہ دری، مرگ ءُ دلسیاھی ءَ گھتر انت آ بیا انت اے راجی جنگ ءِ بھر بہ بنت ءُ ایشی ءَ دیم ءَ بہ بر انت –

بی ایل اے ءِ سروک ءَ گوشتگ کہ بلوچ ھزارانی کچ ءَ پہ مزاھمت ءَ دیم ءَ بیا انت گوادر، ریکوڈک، سیندک دراہ رک انت، پاکستان چنکس جنت؟ مرگ ءَ ھرکس ءَ مرگی انت بلے آؤکیں پدریچ اے نہ گوش ایت کہ اے بس چارگ ءَ بوتگ انت مئے مڈی پُلگ بوتگ انت پجار گار کنگ بوتگ –

آئی ءَ گوشتگ کہ مارا وتی زمیر جست کنگی انت مروچی بلوچ ورنا پہ چیگی وتی جاناں دیگ ءَ انت آیانی ھم زند ءِ ھست، گس ءُ چک مات ھست انت پرچا درساں کربان کنگ ءَ انت اے پرچا پاکستان ءُ چین ءَ گوں جنگ کنگ ءَ انت –

آئی ءَ گوشتگ کہ پہ پرس دارگ ءُ گریوگ ءِ بدل ءَ اے جنگ ءَ ھوار بہ بہ ئے جھان ءُ چین ءِ دیم ءَ پدر بہ کن ات کہ بلوچ وتی رکینگ ءَ زانت مرگ ءُ کشگ ھم زانت –

آئی ءَ گوشتگ کہ ھنچوش دگہ جھان ءِ دگہ راجاں وتی رکینگ ءَ پدر کتگ مار ءَ ھم اے جنگ ءِ بھر بوگی انت راج دیمروئی کنگی انت –

بی ایل اے ءِ سروک ءَ گوشتگ کہ ما کوھانی تہ ءَ نشتگ ءُ وتی زند ءَ دیگ ءَ انت اے دراہ پہ راج ءِ ھاتر ءَ کنگ بوگ ءَ انت مئے وتی ھچ مول ءُ مپاد نیست انت – مارا گلامی ءِ تہ ءَ دراہ رس ات کنت بلے ازت ءُ آبرو ناں کہ ایشی ءَ مئے زمیر ءُ پگر نہ من ایت ھمے ھاتر ءَ ما جنگ ءِ راہ گچین کتگ ـ ما سرپدیں اے راہ بیمناکیں، گران ایں بلے ھوسلہ برز انت ءُ مارا باور انت کہ اے جنگ ءَ ما کٹ ایں –