ٹی بی پی شونگال
زورانسری بیگواھیانی سامندیں مردمانی جھانی روچ گُوستگ بلے بلوچستان ءَ ھمے روچ ءَ ھم زورانسری بیگواھیانی برجاھیں درچ نہ اُوشتاتگ۔ بیست ءُ ھشت اگست ءَ بلوچستان ءِ بنجاھی شھر چہ شال ءَ سبی ءِ جھمنند نور خاتون ءُ آئی ءِ زھگ چہ یونائیٹڈ ھوٹل ءَ زورانسری بیگواہ کنگ بیتگ اَنت ءُ سِی اگست ءَ یک سالے پیسر چہ مستونگ ءَ بیگواھیں غلام فاروق زھری ءِ جون چہ شال ءَ دزکپتگ۔
بلوچستان ءَ زورانسری بیگواھیانی میان اُستمانی روچ زھرشانیانی تہ ءَ گوست۔ سائرہ پنچ سالاں چہ زورانسری بیگواھی ءِ آماچیں براتانی ھاتر ءَ آیانی زھگانی پجیگ ءَ واکداری ءِ بنجاہ اسلام آباد ءَ زھرشانی کنگ ءَ اِنت دانکہ بنجاہ ءِ واکانی تہ ءَ آیانی گوشاں ایشانی توار ءَ گوش داشت بہ کن اَنت۔
سمی دین، حمیدہ، فوزیہ ءُ سیما بلوچ ایندگہ بازیں زورانسری بیگواھیں مردمانی کھول ءَ گوں کراچی ءَ وتی دوستیگیں مردمانی ھاتر ءَ دزبندی کنان اَنت بلے ڈیھی ادارگ آیانی دزبندیانی گُوشدارگ ءَ ابید آیانی توار ءَ گوں تاکت ءِ زوراں ھلاس کنگ ءِ کوشست ءَ کنگ ءَ اَنت۔
شال ءَ راشد بلوچ ءِ مات ءَ انساپ ءِ درستیں دروازگ ٹُک اتگ اَنت بلے انساپ ءِ بیرکدار ھاموش اَنت۔ سعیدہ بلوچ ءِ براتانی یل کنگ ءَ ابید آیاں بیھار دئیگ بئیگ ءَ اِنت ءُ ماما کدیر زورانسری بیگواھیانی ھلاسی ءِ اوست ءَ پنچ ھزار روچاں چہ وتی زھرشانی برجاہ داشتگ ۔
جنگ زدگیں بلوچستان ءَ زورانسری بیگواھیانی ھاتر ءَ زھرشانی برجاہ اَنت بلے نی زورانسری بیگواھیں مردمانی کوش ءَ پد آیانی لاشانی دزگرگ ءِ ھاتر ءَ ھم زھرشانی ءِ کمک زیرگ کپ ایت۔ جھانی مردمی اگبالانی ادارگانی ھاموشی ءُ چہ پاکستان ءِ نیمگ ءَ بلوچستان ءِ تہ ءَ برجاھیں زورانسری بیگواھیانی سر ءَ جُست گِری نہ کنگ ءَ بلوچستان ءِ تہ ءَ ھزارانی کچ ءَ زورانسری بیگواھیانی سوب ءَ مردمی لاچاری ودی بیتگ انت۔